មន្ត្រីក្នុងទីក្រុងម៉ិកស៊ីកូ ប្រទេសម៉ិកស៊ិក និយាយថា ផ្លូវរថភ្លើងលើអាកាសមួយកន្លែង បានបាក់ធ្លាក់ជាមួយនឹងទូរថភ្លើងចុះក្រោមមកសង្កត់លើផ្លូវថ្នល់ដែលមានចរាចរណ៍យ៉ាងមមាញឹកនិងមនុស្សអ៊ូអរ ដោយបានសម្លាប់មនុស្សប្រមាណ២៣នាក់ និងជាច្រើននាក់ផ្សេងទៀត បានរងរបួស។
អភិបាលក្រុងម៉ិកស៊ីកូ អ្នកស្រី Claudia Sheinbaum បានប្រាប់ក្រុមអ្នកសារព័ត៌មានថា ធ្នឹមមួយរបស់ស្ពានអាកាសនោះ ទំនងបានដាច់ និងធ្វើឲ្យស្ពានអាកាសសម្រាប់រថភ្លើងឆ្លងកាត់នេះបាក់ធ្លាក់ចុះ។
អ្នកស្រីបានបន្តថា យ៉ាងហោចណាស់មានមនុស្ស៦៥នាក់ ត្រូវរបួស ហើយពេលនោះអ្នកធ្វើដំណើរបានស្ថិតក្នុងទូរថភ្លើងនៅឡើយនៅពេលដែលវាធ្លាក់ចុះមក។ រថយន្តស្ទូច ត្រូវបានគេបញ្ជូនទៅកាន់កន្លែងកើតហេតុ ដើម្បីស្ទូចលើកទូរថភ្លើងដែលធ្លាក់នោះ ដើម្បីឲ្យក្រុមអ្នកជួយសង្គ្រោះ បន្តស្វែងរកជនរងគ្រោះដែលត្រូវទូរថភ្លើងនោះសង្កត់ពីលើ។
ដោយឡែករដ្ឋមន្ត្រីមហាផ្ទៃម៉ិកស៊ិកវិញ បានប្រាប់ក្រុមអ្នកសារព័ត៌មានថា ឧប្បទ្ទវហេតុនេះ កើតឡើងនៅម៉ោងប្រមាណ១០:២៥នាទីយប់ ហើយផ្លូវដែលរថភ្លើងនេះឆ្លងកាត់ ជាខ្សែផ្លូវថ្មីបំផុតមួយរបស់រដ្ឋធានីម៉ិកស៊ិកនេះ ដែលជាខ្សែផ្លូវលេខ១២។
អភិបាលក្រុងម៉ិកស៊ីកូអ្នកស្រី Scheinbaum និយាយថា គេបានចាប់ផ្តើមស៊ើបអង្កេតស៊ីជម្រៅអំពីគ្រោះថ្នាក់នេះហើយ និងកំពុងត្រួតពិនិត្យឡើងវិញនូវគម្រោងសំណង់នៃខ្សែផ្លូវលេខ១២ទាំងមូល៕
