ជនជាតិភាគតិចរ៉ូហ៊ីងយ៉ាយ៉ាងតិចណាស់ក៏២០នាក់ដែរបានស្លាប់នៅឯសមុទ្រក្នុងប៉ុន្មានសប្តាហ៍ថ្មីៗនេះ។ នេះបើតាមការបញ្ជាក់របស់ទីភ្នាក់ងារទទួលបន្ទុកជនភៀសខ្លួនរបស់អង្គការសហប្រជាជាតិ (UNHCR)នៅថ្ងៃអង្គារនេះ។
ទូកដឹកអ្នកកាន់សាសនាអ៊ីស្លាមដែលត្រូវបានគេធ្វើទុកបុកម្នេញរាប់រយនាក់នេះបានមកដល់ប្រទេសឥណ្ឌូណេស៊ី ខណៈដែលទូកផ្សេងទៀតត្រូវបានគេជឿថាបានរសាត់នៅក្នុងមហាសមុទ្រឥណ្ឌា។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
ទូកមួយគ្រឿងបានរសាត់មកដល់ឆ្នេរសមុទ្រខេត្ត Aceh នៃប្រទេសឥណ្ឌូណេស៊ីកាលពីថ្ងៃចន្ទម្សិលមិញដែលមានដឹកជនជាតិភាគតិចរ៉ូហ៊ីងយ៉ា ១៧៤ នាក់ ភាគច្រើននៃអ្នកទាំងនោះបានខ្សោះជាតិទឹក អស់កម្លាំងហើយត្រូវការការថែទាំសុខភាពជាបន្ទាន់ បន្ទាប់ពីបានស្ថិតនៅក្នុងសមុទ្ររាប់សប្តាហ៍។ នេះបើតាមពួកមន្ត្រីទីភ្នាក់ងារគ្រោះមហន្តរាយក្នុងមូលដ្ឋាន។
លោក Chris Lewa នៃគម្រោង Arakan ដែលផ្តល់ការជួយឧបត្ថម្ភដល់ជនជាតិភាគតិចរ៉ូហ៊ីងយ៉ា បាននិយាយថា ទូកនោះដូចគ្នានឹងទូកមួយគ្រឿងដែលត្រូវបានគេរាយការណ៍កាលពីដំបូងថាបានបាត់ ហើយត្រូវបានគេភ័យខ្លាចថាបានលិច។
ទីភ្នាក់ងារ UNHCR បានបញ្ជាក់កាលពីថ្ងៃចន្ទថា ឆ្នាំ ២០២២ នេះ អាចជាឆ្នាំដែលមានមនុស្សស្លាប់ច្រើនបំផុតនៅឯសមុទ្រនៅក្នុងរយៈពេលជិតមួយទសវត្សរ៍ សម្រាប់ជនជាតិភាគតិចរ៉ូហ៊ីងយ៉ា នៅពេលដែលចំនួនរបស់ពួកគេបានកើនឡើង ដើម្បីគេចចេញពីស្ថានភាពដ៏យ៉ាប់យ៉ឺននៅក្នុងជំរំជនភៀសខ្លួន នៅក្នុងប្រទេសបង់ក្លាដែស។
ជនជាតិភាគតិចរ៉ូហ៊ីងយ៉ាបានត្រូវគេធ្វើទុកបុកម្នេញជាយូរយារណាស់មកហើយ នៅក្នុងប្រទេសភូមាដែលមានអ្នកកាន់ព្រះពុទ្ធសាសនាភាគច្រើន និងមានព្រំដែនជាមួយប្រទេសបង់ក្លាដែស។ អស់រយៈពេលជាច្រើនឆ្នាំមកហើយ ជនជាតិភាគតិចរ៉ូហ៊ីងយ៉ាជាច្រើនបានរត់គេចខ្លួនទៅកាន់ប្រទេសនានាដូចជាថៃ និងប្រទេសម៉ាឡេស៊ីនិងឥណ្ឌូណេស៊ី ដែលមានអ្នកកាន់សាសនាអ៊ីស្លាមភាគច្រើន នៅរវាងខែវិច្ឆិកានិងមេសានៅពេលដែលសមុទ្រមានភាពស្ងប់ស្ងាត់។
ជនភៀសខ្លួនជិត ១ លាននាក់បានរស់នៅពពាក់ពពួនគ្នានៅក្នុងប្រទេសបង់ក្លាដែសរួមទាំងជនភៀសខ្លួនរាប់សែននាក់ទៀតដែលបានរត់គេចខ្លួនពីការបង្ក្រាបដ៏ប្រល័យដោយពួកយោធាមីយ៉ាន់ម៉ានៅក្នុងឆ្នាំ ២០១៧៕
