ទីផ្សារភាគហ៊ុននៅអាស៊ីបានធ្លាក់តម្លៃនៅពេលជួញដូរក្នុងថ្ងៃអង្គារនេះ ខណៈដែលផលប៉ះពាល់ពីការធ្លាក់តម្លៃយ៉ាងខ្លាំងជាប្រវត្តិសាស្ត្រនៃតម្លៃប្រេងឆៅសហរដ្ឋអាមេរិកបន្តជះឥទ្ធិពលដល់ទីផ្សារនានា។
ទីផ្សារ Nikkei ក្នុងប្រទេសជប៉ុនបានបិទដោយធ្លាក់១,៩% ខណៈដែលទីផ្សារនៅអូស្ត្រាលី ហុងកុង និងតៃវ៉ាន់ បានជួញដូរក្នុងតម្លៃ២%ទាបជាងមុនពេលជួញដូរនៅរសៀលថ្ងៃអង្គារនេះ ហើយទីផ្សារនៅសៀងហៃធ្លាក់ថ្លៃ១,៣%។
ក្នុងទីផ្សារប្រេងសហរដ្ឋអាមេរិក ប្រេងឆៅ West Texas Intermediate បានកើនតម្លៃវិញបន្តិចមកតម្លៃ១ដុល្លារ៣៦សេនក្នុងមួយបារ៉ែល ដែលនេះជាដំណឹងល្អបន្តិចសម្រាប់អ្នកវិនិយោគដែលទើបបានឃើញតម្លៃប្រេងធ្លាក់យ៉ាងគំហុកដល់ដក៣៧ដុល្លារ៦៣សេនក្នុងមួយបារ៉ែលកាលពីថ្ងៃចន្ទ ដែលនេះជាលើកទីមួយក្នុងប្រវត្តិសាស្ត្រអាមេរិកដែលតម្លៃប្រេងបានធ្លាក់តម្លៃដល់ក្រោមសូន្យដុល្លារក្នុងមួយបារ៉ែល។
សកម្មភាពសេដ្ឋកិច្ចនានានៅជុំវិញពិភពលោកបានត្រូវផ្អាកទាំងស្រុងដោយសារមានរាតត្បាតនៃជំងឺកូវីដ១៩ ដែលនេះបានធ្វើឲ្យលែងមានតម្រូវការប្រេងនិងនាំឲ្យអ្នកផលិតប្រេងផលិតហួសតម្រូវការខ្លាំងរហូតអ្នកផលិតប្រេងអាចជួលអតិថិជនខ្លួនឲ្យយកប្រេងដែលលើសចំនួនទៅប្រើប្រាស់៕
