ការផ្ទុះឡើងវិញនៃវីរុសកូរ៉ូណាក្នុងបណ្តាប្រទេសនៅអាស៊ី ដែលត្រូវបានគេសរសើរថាជាប្រទេសគំរូក្នុងការទប់ស្កាត់ជំងឺរាតត្បាតនោះ គូសបញ្ជាក់ពីភាពធន់របស់វីរុសនិងផលប៉ះពាល់ការធ្វើដំណើរក្នុងចំណោមប្រទេសដែលស្ថិតក្នុងតំបន់សុវត្ថិភាព។
ប្រទេសវៀតណាម ហុងកុង អូស្ត្រាលី និងជប៉ុន បានឃើញការរីករាលដាលនៃវីរុសលឿនខ្លាំងបំផុតកាលពីខែកក្កដា ដែលការណ៍នេះអាចនឹងបណ្តាលឲ្យបន្តផ្អាកដំណើរការក្នុងប្រទេសតទៅទៀត។ ចិនដីគោកដែលជាប្រភពផ្ទុះវីរុសនោះ ក៏មានករណីកើនឡើងដែរ។
ប្រទេសទាំងនោះមួយចំនួនបានចូលរួមកិច្ចពិភាក្សាស្តីពីការធ្វើដំណើរទៅកាន់បណ្តុំប្រទេសជិតខាងដែលទប់ស្កាត់ជំងឺកូវីដ១៩បានសម្រេច ឬ«travel bubbles»ដែលត្រូវបានស្នើឡើងពេលមានការរាតត្បាតភ្លាមៗ ដើម្បីជួយពង្រឹងសេដ្ឋកិច្ចឡើងវិញដោយបើកឲ្យមានការធ្វើដំណើរអាជីវកម្មអន្តរជាតិនិងទេសចរដែលមិនត្រូវធ្វើចត្តាឡីស័ក។
លោក Ken Atkinson អនុប្រធានក្រុមប្រឹក្សាទេសចរណ៍វៀតណាម ដែលបានបញ្ចុះបញ្ចូលរដ្ឋាភិបាលវៀតណាមឲ្យពិចារណាអំពីការបើកឲ្យធ្វើដំណើរក្នុងចំណោមប្រទេសដែលស្ថិតក្នុងតំបន់សុវត្ថិភាព«travel bubbles» បាននិយាយថា៖ «វាគឺពិតរឿងដ៏ស្មុគស្មាញ។ ខ្ញុំគិតថារហូតដល់ឆ្នាំក្រោយទើបយើងអាចមើលឃើញការធ្វើដំណើរដោយមិនចាំបាច់ធ្វើចត្តាឡីស័កពីគ្រប់កន្លែង»។
ការផ្ទុះឡើងវិញនៅវៀតណាម
ដើម្បីយល់ពីការលំបាកក្នុងការលុបបំបាត់វីរុសកូរ៉ូណា យើងមិនបាច់មើលទីណាក្រៅពីវៀតណាមទេ។ រហូតដល់ខែកក្កដា ប្រទេសដែលមានប្រជាជន៩៥លាននាក់បានរាយការណ៍ពីករណីឆ្លងវីរុសនេះប្រមាណ៤៥០ករណីហើយគ្មានករណីស្លាប់។ នេះក៏ដោយសារវិធានការធ្វើចត្តាឡីស័កទាន់ពេលនិងការតាមដានទំនាក់ទំនងយ៉ាងហ្មត់ចត់។
ប្រទេសវៀតណាមមិនមានករណីឆ្លងក្នុងស្រុកអស់រយៈពេលជិត១០០ថ្ងៃ ដែលជាលទ្ធផលគួរឲ្យភ្ញាក់ផ្អើលសម្រាប់ប្រទេសដែលមានព្រំដែនជាមួយប្រទេសចិន។ ប៉ុន្តែភាពជោគជ័យនេះមិនគ្រប់គ្រាន់ក្នុងការបង្កាមិនឲ្យផ្ទុះឡើងវិញនោះទេ។
អំឡុងសប្តាហ៍ចុងក្រោយនៃខែកក្កដា ប្រទេសវៀតណាមបានរាយការណ៍អំពីការឆ្លងថ្មី៩៣ករណីដែលជាផ្នែកនៃរលករាតត្បាតថ្មីនៅកណ្តាលក្រុងដាណាង។ ចាប់តាំងពីពេលនោះមក អាជ្ញាធរបានជម្លៀសមនុស្ស៨០,០០០នាក់ភាគច្រើនជាភ្ញៀវទេសចរក្នុងស្រុក ហើយបានពន្យាការហោះហើរទៅនិងមកទីក្រុងរមណីយដ្ឋានដ៏មានប្រជាប្រិយនេះ ដែលឥឡូវស្រដៀងនឹងទីក្រុងខ្មោច។
ក្នុងទីក្រុងហាណូយរដ្ឋធានីនៃប្រទេសវៀតណាមបារ និងក្លិបកម្សាន្តពេលរាត្រីត្រូវបានបិទហើយការប្រមូលផ្តុំទ្រង់ទ្រាយធំត្រូវបានហាមឃាត់។ ឆ្នេរសមុទ្រក្នុងប្រទេសនេះជាច្រើនដែលតែងតែពេញដោយភ្ញៀវទេសចរក្នុងស្រុកឥឡូវនេះទទេស្អាត។
លោក Marcel Renes ម្ចាស់មជ្ឈមណ្ឌលទេសចរ Ninh Binh ដែលមានផ្តល់សេវាកម្មទេសចរនិងអ្នកបើករថយន្តផ្ទាល់ខ្លួនក្នុងដែនដីសណ្តទន្លេហុងភាគខាងជើងវៀតណាមបាននិយាយថា៖ «យើងមានអ្នកបើករថយន្តនិងមគ្គុទេសទេសចរណ៍ជាច្រើននាក់ដែលនៅផ្ទះហើយគ្មានការងារធ្វើ»។
ខណៈដែលប្រទេសវៀតណាមបានបិទព្រំដែនជាច្រើនខែមកហើយ សណ្ឋាគារ រមណីយដ្ឋានជាច្រើន និងផ្នែកផ្សេងទៀតនៃឧស្សាហកម្មទេសចរបានយុទ្ធសាស្រ្តផ្តោតលើភ្ញៀវទេសចរណ៍ក្នុងស្រុកជាងជនបរទេស។ ប៉ុន្តែការផ្ទុះឆ្លងរាលដាលថ្មីចុងក្រោយបង្អស់នេះបានបង្កហានិភ័យខ្លាំងសូម្បីភ្ញៀវក្នុងស្រុក។
លោក Renes និយាយថា៖«ខ្ញុំមិនដឹងថាឥឡូវយើងអាចធ្វើអ្វីបានទេ។ ព្រំដែននៅតែបិទ ហើយខ្ញុំគិតថាវានឹងបន្តបិទក្នុងពេល៦ខែទៀត»។
ប្រភពនៃការឆ្លងរាតត្បាតក្នុងប្រទេសវៀតណាមមានភាពមិនច្បាស់លាស់ ។ តាំងពីករណីថ្មីៗត្រូវបានរកឃើញមក វៀតណាមបានបង្រ្កាបអន្តោរប្រវេសន៍ខុសច្បាប់ពីប្រទេសចិន ទោះជាអាជ្ញាធរមិនបានភ្ជាប់ទំនាក់ទំនងរវាងករណីឆ្លងណាមួយទៅនឹងការឆ្លងព្រំដែនខុសច្បាប់ក៏ដោយ។
ការបន្ទោសលើការធ្វើដំណើរដើម្បីអាជីវកម្មនៅហុងកុង
ហុងកុងក៏បានជួបរលកថ្មីនៃការរាតត្បាតបន្ទាប់ពីមិនមានការរាយការណ៍អំពីករណីថ្មីអស់បីសប្តាហ៍។ អំឡុងពេល១០ថ្ងៃចុងក្រោយក្នុងខែកក្កដា ហុងកុងរាយការណ៍ការឆ្លងថ្មី១០០ករណីក្នុងមួយថ្ងៃ។
ដែនដីចិនដែលសេដ្ឋកិច្ចពឹងផ្អែកលើការហោះហើរបែបទស្សនកិច្ចការងារអន្តរជាតិ បានអនុញ្ញាតឲ្យតែអ្នកធ្វើដំណើរកាន់តំណែងជាក់មួយចំនួន ដែលរួមមានតំណែងនាយកមួយចំនួន បុគ្គលិកអាកាសចរណ៍ និងមន្ត្រីរដ្ឋាភិបាលរួចផុតពីច្បាប់ដាក់ឲ្យនៅដាច់ដោយឡែកពីគេ។
មនុស្សជាង២៩ម៉ឺននាក់ត្រូវបានបានលើកលែងចេញពីច្បាប់នេះតាំងពីខែកុម្ភៈ យោងតាមតួលេខផ្លូវការ។ អាជ្ញាធរសុខាភិបាលឥឡូវទទួលស្គាល់ថាការលើកលែងទាំងនោះយ៉ាងហោចណាស់រួមចំណែកក្នុងការធ្វើឲ្យមានការផ្ទុះរាតត្បាតវីរុសនេះឡើងវិញ៕
ប្រែសម្រួលដោយទុំ ម្លិះ
