ប្រទេសក្នុងទ្វីបអាស៊ីមួយចំនួនកំពុងឆ្លងជំងឺកូវីដ១៩ដ៏ខ្លាំងនៅចុងឆ្នាំនេះ ហើយបានចាត់វិធានការទប់ស្កាត់ការហក់ឡើងខ្ពស់នៃជំងឺរាតត្បាតនេះ ដោយមិនបានបិទសកម្មភាពសេដ្ឋកិច្ច ដូចអ្វីដែលពួកគេបានធ្វើក្នុងពេលកន្លងមកនោះទេ ដោយដាក់ចេញនូវវិធានការគ្រប់គ្រងជាបន្ទាន់ និងការគោរពតាមពីសាធារណជន។ នេះបើតាមការលើកឡើងពីប្រភពមួយចំនួននៅក្នុងប្រទេសដែលកំពុងទទួលរងការប៉ះពាល់នៃជំងឺនេះ។
ទីក្រុងហុងកុង ប្រទេសជប៉ុន ម៉ាឡេស៊ី កូរ៉េខាងត្បូង កោះតៃវ៉ាន់ និងប្រទេសវៀតណាម មានករណីឆ្លងជំងឺកូវីដ១៩ ហក់ឡើងខ្ពស់ចាប់តាំងពីពាក់កណ្តាលខែវិច្ឆិកាមក ខណៈពេលដែលអាកាសធាតុចុះត្រជាក់ និងមានពលរដ្ឋរបស់ខ្លួនមួយចំនួនបានត្រឡប់មកប្រទេសកំណើតវិញ ពីប្រទេសដែលរងការឆ្លងខ្លាំងនៅបស្ចិមប្រទេសផងដែរ។ តួលេខនៃចំនួនឆ្លងជំងឺកូវីដ១៩ បានធ្លាក់ចុះក្នុងចំណោមប្រទេសទាំង៦នោះ នៅពាក់កណ្តាលឆ្នាំ២០២០នេះ បន្ទាប់ពីការផ្ទុះរីករាលដាលក្នុងឆមាសទី១មក។
មន្ត្រីសុខាភិបាលនៅក្នុងប្រទេសទាំងនោះ បានបង្កើនវិធានការត្រួតពិនិត្យរបស់ខ្លួន ដោយមិនបានបិទហាងទំនិញ ឬបញ្ជាឲ្យពលរដ្ឋស្នាក់នៅក្នុងផ្ទះនោះទេ។ ពួកគេផ្តោតជាសំខាន់ទៅលើវិធានការត្រួតពិនិត្យនានាដែលបានដាក់ចេញកាលពីដើមឆ្នាំ ក្នុងពេលដែលជំងឺកូវីដ១៩ បានកើតមានឡើងជាលើកដំបូង ដែលធ្វើឲ្យប្រទេសអាស៊ីក្លាយជាប្រទេសដំបូងគេ ដែលទទួលរងផលប៉ះពាល់ដោយសារជំងឺនោះ។ វិធានការទាំងនោះរួមមានការដាក់អ្នកឆ្លងជំងឺកូវីដ១៩ឲ្យនៅឆ្ងាយពីគេឯង ស្វែងរកអ្នកពាក់ព័ន្ធនឹងអ្នកឆ្លងជំងឺកូវីដ១៩ និងការតម្រូវឲ្យនៅឃ្លាតគ្នាកាន់តែខ្លាំង នៅតាមទីកន្លែងសាធារណៈជាដើម។ ចំណែកព្រំដែនអន្តរជាតិនៅតែបិទទ្វារដដែលសម្រាប់ទេសចរទាំងអស់៕
