អ្នកនាំពាក្យក្រសួងការបរទេសឥណ្ឌូណេស៊ី លោក Roy Soemirat បានប្រាប់អ្នកសារព័ត៌មានកាលពីថ្ងៃព្រហស្បតិ៍ថា សមាជិកនៃប្លុកអាស៊ានគ្រោងនឹងបើកកិច្ចប្រជុំថ្នាក់រដ្ឋមន្ត្រីនៅប្រទេសថៃនៅចុងខែនេះ ដើម្បីពិភាក្សាអំពីវិបត្តិនៅក្នុងប្រទេសមីយ៉ាន់ម៉ា។ នេះបើយោងតាមទៅភ្នាក់ងារសារព័ត៌មាន Reuters។
លោក Roy Soemirat បាននិយាយថា តាមការអញ្ជើញរបស់ប្រទេសឡាវ ដែលជាម្ចាស់ផ្ទះអាស៊ានបច្ចុប្បន្ន កិច្ចប្រជុំនឹងពិភាក្សាអំពីមធ្យោបាយដើម្បីដោះស្រាយវិបត្តិដែលបានកើតមានឡើងនៅប្រទេសមីយ៉ាន់ម៉ាចាប់តាំងពីរដ្ឋប្រហារយោធាឆ្នាំ២០២១មក រួមដោយរួមមានការអនុវត្តផែនការកិច្ចព្រមព្រៀងប្រាំចំណុចរបស់អាស៊ានផងដែរ។
កិច្ចព្រមព្រៀងប្រាំចំណុចនេះបានធ្វើឱ្យមានការវិវឌ្ឍតិចតួច ចាប់តាំងពីការដាក់បង្ហាញក្នុងខែមេសា ឆ្នាំ២០២១ ត្រឹមតែប៉ុន្មានខែបន្ទាប់ពីយោធាមីយ៉ាន់ម៉ាបានដករដ្ឋាភិបាលជាប់ឆ្នោតចេញពីតំណែង។
របបយោធាបាននិងកំពុងប្រយុទ្ធនឹងការបះបោរដែលបានផ្ទុះឡើង បន្ទាប់ពីខ្លួនបានដណ្តើមអំណាច។ រដ្ឋាភិបាលយោធាក្នុងរយៈពេលពីរឆ្នាំកន្លងមកនេះ ភាគច្រើនមិនអើពើនឹងការអំពាវនាវរបស់ប្រទេសអាស៊ីអាគ្នេយ៍ជិតខាងរបស់ខ្លួន ឱ្យបញ្ឈប់អរិភាព និងចូលទៅក្នុងកិច្ចសន្ទនាជាមួយគូប្រជែងរបស់ខ្លួន។
ក្នុងអំឡុងកិច្ចប្រជុំកំពូលអាស៊ានក្នុងខែតុលា ប្លុកអាស៊ានបានអំពាវនាវឱ្យ «បញ្ឈប់ជាបន្ទាន់» នូវអំពើហិង្សា និងបង្កើត «បរិយាកាសអំណោយផលសម្រាប់ការផ្តល់ជំនួយមនុស្សធម៌ និងការសន្ទនាថ្នាក់ជាតិរួម» ដែល «គ្រប់គ្រងនិងដឹកនាំដោយមីយ៉ាន់ម៉ា» ។
លោក Roy Soemirat បាននិយាយថា កិច្ចប្រជុំនេះត្រូវបានគេរំពឹងថានឹងចាប់ផ្តើមនៅថ្ងៃទី២០ ខែធ្នូ ហើយរដ្ឋមន្ត្រីការបរទេសឥណ្ឌូណេស៊ីត្រូវបានគេរំពឹងថានឹងចូលរួម៕
