សមាជិកបណ្តាប្រទេសនៅអាស៊ីអាគ្នេយ៍ត្រៀមនឹងពិភាក្សាពីវិបត្តិអភិបាលកិច្ចនៅមីយ៉ាន់ម៉ា ក្នុងកិច្ចប្រជុំកំពូលមួយនៅរដ្ឋធានីហ្សាការតា ប្រទេសឥណ្ឌូណេស៊ី នៅថ្ងៃសៅរ៍ ទី ២៤ ខែមេសានេះ។
សមាជិកភាគច្រើននៃបណ្តាប្រទេសសមាជិកអាស៊ានទំនងនឹងបញ្ជូនតំណាងរបស់ខ្លួន ជាជាងប្រមុខរដ្ឋដើម្បីចូលរួមក្នុងកិច្ចប្រជុំកំពូលនេះ ហើយគេនៅមិនច្បាស់ថា តើរដ្ឋាភិបាលយោធាមីយ៉ាន់ម៉ា នឹងចូលរួមដែរឬទេ។
សេចក្តីប្រកាសពីសំណាក់សមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន ដែលមានប្រទេស ១០ ជាសមាជិក កាលពីថ្ងៃអង្គារ ទី ០៣ ខែមេសា ត្រូវបានធ្វើឡើងមួយថ្ងៃ បន្ទាប់ពីសហភាពអឺរ៉ុបបានដាក់ទណ្ឌកម្មដ៏ធ្ងន់ធ្ងរលើមីយ៉ាន់ម៉ា ដែលកំពុងស្ថិតក្រោមការគ្រប់គ្រងដោយពួកយោធា ហើយដែលជាប្រទេសសមាជិកអាស៊ានមួយផងដែរនោះ។
យោធានៅក្នុងប្រទេសមីយ៉ាន់ម៉ា បានទម្លាក់រដ្ឋាភិបាលជាប់បោះឆ្នោតរបស់មេដឹកនាំលោក ស្រី អោងសាន ស៊ូជី ចេញពីអំណាចកាលពីដើមខែកុម្ភៈ ដោយបង្កឲ្យមានតវ៉ាប្រឆាំងពីពលរដ្ឋទូទៅ ដោយការបង្រ្កាបហិង្សាមកលើបាតុករ និងជនស៊ីវិល ដែលចង់ឲ្យមានការវិលត្រឡប់មកកាន់របបលទ្ធិប្រជាធិបតេយ្យឡើងវិញ។
មនុស្សយ៉ាងហោចណាស់ ៧៣៨ នាក់ ត្រូវបានសម្លាប់ដោយកងកម្លាំងសន្តិសុខរបស់យោធាមីយ៉ាន់ម៉ា ចាប់តាំងពីការបង្រ្កាបបានចាប់ផ្តើមមក។ នេះបើយោងទៅតាមសមាគមជំនួយអ្នកទោសនយោបាយ (Assistance Association for Political Prisoners)។
បណ្តាញផ្សព្វផ្សាយក្នុងស្រុកប្រាប់ឲ្យដឹងថា កងកម្លាំងសន្តិសុខបានសម្លាប់អ្នកភូមិចំនួន ៦ នាក់ កាលពីថ្ងៃអង្គារ ទី ០៣ ខែមេសា។
គោលការណ៍របស់អាស៊ានស្តីពីការមូលមតិនិងការមិនជ្រៀតជ្រែក បានរឹតត្បិតសមាគមនេះមិនឲ្យលូកដៃចូលក្នុងកិច្ចការផ្ទៃក្នុងរបស់បណ្តាប្រទេសសមាជិក ប៉ុន្តែបណ្តាប្រទេសសមាជិកភាគច្រើននិយាយថា ពួកគេមានផែនការបញ្ជូនអ្នកតំណាងរបស់ខ្លួនទៅចូលរួមកិច្ចប្រជុំនោះ ជាជាងប្រមុខរដ្ឋ។
ឧបនាយកមន្រ្តីថៃនិងអ្នកការទូតកំពូលលោក Don Pramudwinai នឹងចូលរួមកិច្ចប្រជុំកំពូលនេះជំនួសមុខឲ្យនាយករដ្ឋមន្រ្តីលោក Prayuth Chan-ocha។ លោក Prayuth បានថ្លែងប្រាប់ក្រុមអ្នកសារព័ត៌មានក្នុងប្រទេសថា «ប្រទេសមួយចំនួនទៀតនឹងបញ្ជូនរដ្ឋមន្រ្តីការបរទេសរបស់ខ្លួនផងដែរ»។
គេនៅមិនទាន់ច្បាស់នៅឡើយថា តើសមាជិកយោធាមីយ៉ាន់ម៉ានឹងចូលរួមក្នុងកិច្ចប្រជុំកំពូលនេះឬទេ ក៏ប៉ុន្តែមន្រ្តីរដ្ឋាភិបាលថៃមួយរូបបាននិយាយថា មេដឹកនាំយោធាមីយ៉ាន់ម៉ាលោក Min Aung Hlaing នឹងទៅរដ្ឋធានីហ្សាការតា។ នេះតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ស្របពេលដូចគ្នានេះដែរ សហភាពអឺរ៉ុបបានដាក់ទណ្ឌកម្មលើមេដឹកនាំយោធាទាំង ១០ រូប របស់មីយ៉ាន់ម៉ា។ ទណ្ឌកម្មនេះក៏មានផលប៉ះពាល់លើស្ថាប័នយោធាធំៗ ចំនួន ២ ចំពោះ «ការធ្វើឲ្យខូចលទ្ធិប្រជាធិបតេយ្យនិងនីតិរដ្ឋ» នៅមីយ៉ាន់ម៉ា។
សហភាពអឺរ៉ុបបានបញ្ជាក់ទៀតថា ទណ្ឌកម្មនេះគឺដើម្បីឆ្លើយតបទៅនឹងការរំលោភសិទ្ធិមនុស្សប្រឆាំងនឹងជនស៊ីវិលនិងបាតុករដែលទាមទារឲ្យវិលត្រឡប់ទៅកាន់ការគ្រប់គ្រងតាមបែបលទ្ធិប្រជាធិបតេយ្យឡើងវិញ៕
ប្រែសម្រួលដោយលោក ណឹម សុភ័ក្រ្តបញ្ញា
