ភ្នំពេញ —
គណបក្សសង្គ្រោះជាតិនិងអង្គការសង្គមស៊ីវិលក្នុងស្រុក នៅថ្ងៃសុក្រនេះ បានរិះគន់អាជ្ញាធរថៃដែលបានបញ្ជូនពលករកម្ពុជាមកកាន់មាតុប្រទេសវិញតាមច្រកព្រំដែនអន្តរជាតិប៉ោយប៉ែត។
អាជ្ញាធរកម្ពុជាបានឲ្យដឹងថា រដ្ឋាភិបាលយោធាថៃបានបញ្ជូនពលករកម្ពុជាខុសច្បាប់ជិត៣ម៉ឺននាក់ត្រឡប់មកកម្ពុជាវិញ។ ពលករដែលបានទៅធ្វើការនៅថៃភាគច្រើនបានធ្វើខាងផ្នែកកសិកម្ម នេសាទ សំណង់ និងជំនួយការផ្នែកលក់ដូរជាដើម ត្រូវបានបញ្ជូនដោយរថយន្តមានទ្រុងបិទជិតមកកាន់កម្ពុជា តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យចាប់តាំងពីយោធាថៃបានឡើងកាន់អំណាចក្រោយពីរដ្ឋប្រហារទម្លាក់លោកស្រីនាយករដ្ឋមន្ត្រី យីងឡាក់ ស៊ីណាវ៉ាត់ កាលពីខែ ឧសភា។
គណបក្សសង្គ្រោះជាតិបាននាំយកពលករប្រមាណជិត១០០នាក់មកកាន់ទីស្នាក់ការរបស់ខ្លួនដើម្បីថ្លែងប្រាប់ក្រុមអ្នកយកព័តមាន។ ពលកររួមមានកុមារតូចៗ យុវជន និងស្ត្រី បានប្រាប់អ្នកយកព័ត៌មានថា ពួកគេមិនមានអាហារទទួលទានចំនួនពីរថ្ងៃដោយសារតែអ្នកនាំផ្លូវយកពួកគេទៅទម្លាក់ចោលក្នុងព្រៃខ្លះនិងខ្លះទៀតត្រូវបាននាំមកកាន់ច្រកអន្តរជាតិព្រំដែនប៉ោយប៉ែត។
ពលករ នឹម សំអាត អាយុ៥០ឆ្នាំ កំពុងទទួលទាននំបុ័ងមួយកំណាត់ដែលគណបក្សសង្គ្រោះជាតិផ្តល់ឲ្យ បានបញ្ជាក់ថា មានពលករខ្មែរប្រមាណ៥០នាក់ផ្សេងទៀតកំពុងជាប់ឃុំនៅស្រុកអារញ្ញប្រទេសថៃដោយសារតែពុំមានប្រាក់ឲ្យតម្រួតថៃជាថ្នូរនឹងការដោះលែងពួកគេឲ្យមកស្រុកកំណើតវិញ។ លោក នឹម សំអាត ជាកសិករមកពីខេត្តកំពង់ស្ពឺ ហើយបានចេញទៅធ្វើការជាកម្មករសំណង់ក្នុងប្រទេសថៃមួយឆ្នាំ។ លោកបញ្ជាក់ថា គាត់ត្រឡប់មកកម្ពុជាវិញដោយសារតែទាហ៊ានថៃចាប់ផ្តើមបោសសម្អាតពលកររស់នៅដោយខុសច្បាប់ក្នុងប្រទេសថៃ។
«ខ្ញុំមើលទូរទស្សន៍ ឃើញរដ្ឋាភិបាលថៃគេនិយាយព័ត៌មានតាមទូរទស្សន៍។ គេថាបើសិនគេឲ្យមកហើយមិនចេញទេ ដល់ថ្ងៃក្រោយ គេចាប់បានខ្លាចក្រែងមានគ្រោះថ្នាក់ដល់រាងកាយ»។
អ្នកស្រី តាំង រតនា អាយុ២៧ឆ្នាំ មកពីខេត្តព្រៃវែង ជាកម្មករនៅកន្លែងសិប្បកម្មធ្វើស្រោមជើងក្នុងខេត្តបុទុមថានី មានប្រសាសន៍ថា អ្នកស្រីបានបង់ឲ្យទាហានថៃចំនួន៥០០បាតក្នុងម្នាក់ៗ។ អ្នកស្រីបានបញ្ជាក់ថា ការសម្រេចមកកម្ពុជាវិញគឺធ្វើឡើងដោយស្ម័គ្រចិត្ត ដោយសារភ័យខ្លាចស្ថានភាពក្នុងប្រទេសថៃ។
«ដោយសារមានរឿងជ្រួលច្រល់អញ្ចឹងបានត្រឡប់មកវិញ។ កុំអីមិនមកទេ»។
លោក សម រង្ស៊ី ប្រធានគណបក្សសង្គ្រោះជាតិបានទម្លាក់ការទទួលខុសត្រូវនេះទៅលើរដ្ឋាភិបាលលោកហ៊ុន សែន ដែលមិនមានសមត្ថភាពផ្តល់ការងារឲ្យពលករទាំងនេះ បានជាពួកគាត់រាប់ម៉ឹននាក់ចេញទៅលក់កម្លាំងពលកម្មនៅក្រៅប្រទេស។
«អ្នកដែលថៃបញ្ជូនមកនេះត្រូវដោះស្រាយបញ្ហាមុន។ គឺបញ្ហាភាពក្រីក្រ បញ្ហាអត់ការងារធ្វើដែលបង្ខំឲ្យពលរដ្ឋខ្មែរដែលមានយុវជនខ្មែរជាច្រើនចាកចេញពីប្រទេស គេហៅថាចំណាកស្រុកទៅថៃហ្នឹងជាបរាជ័យរដ្ឋាភិបាលរបស់លោកហ៊ុន សែន»។
របាយការណ៍ពីអង្គការនានាឲ្យដឹងថា ពលករកម្ពុជាខុសច្បាប់និងស្របច្បាប់នៅប្រទេសថៃមានចំនួនប្រមាណជាង៤០ ម៉ឺននាក់។ ពលករទាំងនេះធ្វើការភាគច្រើននៅក្នុងខេត្តជាប់ព្រំដែនកម្ពុជា ដូចជាខេត្តឈុនបូរី ខេត្តបូរីរ៉ាំ និងខេត្តបុទុមឋានីជាដើម។
សមាគមសិទ្ធិមនុស្សអាដហុក និងសម្ព័ន្ឋនិស្សិតបញ្ហាវ័ន្តកម្ពុជាបានចាត់ទុកការបញ្ជូនពលករកម្ពុជាថាជាអំពើមនុស្សធម៌ដែលអាជ្ញាធរថៃបានធ្វើមកលើពលរដ្ឋកម្ពុជា៕
អាជ្ញាធរកម្ពុជាបានឲ្យដឹងថា រដ្ឋាភិបាលយោធាថៃបានបញ្ជូនពលករកម្ពុជាខុសច្បាប់ជិត៣ម៉ឺននាក់ត្រឡប់មកកម្ពុជាវិញ។ ពលករដែលបានទៅធ្វើការនៅថៃភាគច្រើនបានធ្វើខាងផ្នែកកសិកម្ម នេសាទ សំណង់ និងជំនួយការផ្នែកលក់ដូរជាដើម ត្រូវបានបញ្ជូនដោយរថយន្តមានទ្រុងបិទជិតមកកាន់កម្ពុជា តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យចាប់តាំងពីយោធាថៃបានឡើងកាន់អំណាចក្រោយពីរដ្ឋប្រហារទម្លាក់លោកស្រីនាយករដ្ឋមន្ត្រី យីងឡាក់ ស៊ីណាវ៉ាត់ កាលពីខែ ឧសភា។
គណបក្សសង្គ្រោះជាតិបាននាំយកពលករប្រមាណជិត១០០នាក់មកកាន់ទីស្នាក់ការរបស់ខ្លួនដើម្បីថ្លែងប្រាប់ក្រុមអ្នកយកព័តមាន។ ពលកររួមមានកុមារតូចៗ យុវជន និងស្ត្រី បានប្រាប់អ្នកយកព័ត៌មានថា ពួកគេមិនមានអាហារទទួលទានចំនួនពីរថ្ងៃដោយសារតែអ្នកនាំផ្លូវយកពួកគេទៅទម្លាក់ចោលក្នុងព្រៃខ្លះនិងខ្លះទៀតត្រូវបាននាំមកកាន់ច្រកអន្តរជាតិព្រំដែនប៉ោយប៉ែត។
ពលករ នឹម សំអាត អាយុ៥០ឆ្នាំ កំពុងទទួលទាននំបុ័ងមួយកំណាត់ដែលគណបក្សសង្គ្រោះជាតិផ្តល់ឲ្យ បានបញ្ជាក់ថា មានពលករខ្មែរប្រមាណ៥០នាក់ផ្សេងទៀតកំពុងជាប់ឃុំនៅស្រុកអារញ្ញប្រទេសថៃដោយសារតែពុំមានប្រាក់ឲ្យតម្រួតថៃជាថ្នូរនឹងការដោះលែងពួកគេឲ្យមកស្រុកកំណើតវិញ។ លោក នឹម សំអាត ជាកសិករមកពីខេត្តកំពង់ស្ពឺ ហើយបានចេញទៅធ្វើការជាកម្មករសំណង់ក្នុងប្រទេសថៃមួយឆ្នាំ។ លោកបញ្ជាក់ថា គាត់ត្រឡប់មកកម្ពុជាវិញដោយសារតែទាហ៊ានថៃចាប់ផ្តើមបោសសម្អាតពលកររស់នៅដោយខុសច្បាប់ក្នុងប្រទេសថៃ។
«ខ្ញុំមើលទូរទស្សន៍ ឃើញរដ្ឋាភិបាលថៃគេនិយាយព័ត៌មានតាមទូរទស្សន៍។ គេថាបើសិនគេឲ្យមកហើយមិនចេញទេ ដល់ថ្ងៃក្រោយ គេចាប់បានខ្លាចក្រែងមានគ្រោះថ្នាក់ដល់រាងកាយ»។
អ្នកស្រី តាំង រតនា អាយុ២៧ឆ្នាំ មកពីខេត្តព្រៃវែង ជាកម្មករនៅកន្លែងសិប្បកម្មធ្វើស្រោមជើងក្នុងខេត្តបុទុមថានី មានប្រសាសន៍ថា អ្នកស្រីបានបង់ឲ្យទាហានថៃចំនួន៥០០បាតក្នុងម្នាក់ៗ។ អ្នកស្រីបានបញ្ជាក់ថា ការសម្រេចមកកម្ពុជាវិញគឺធ្វើឡើងដោយស្ម័គ្រចិត្ត ដោយសារភ័យខ្លាចស្ថានភាពក្នុងប្រទេសថៃ។
«ដោយសារមានរឿងជ្រួលច្រល់អញ្ចឹងបានត្រឡប់មកវិញ។ កុំអីមិនមកទេ»។
លោក សម រង្ស៊ី ប្រធានគណបក្សសង្គ្រោះជាតិបានទម្លាក់ការទទួលខុសត្រូវនេះទៅលើរដ្ឋាភិបាលលោកហ៊ុន សែន ដែលមិនមានសមត្ថភាពផ្តល់ការងារឲ្យពលករទាំងនេះ បានជាពួកគាត់រាប់ម៉ឹននាក់ចេញទៅលក់កម្លាំងពលកម្មនៅក្រៅប្រទេស។
«អ្នកដែលថៃបញ្ជូនមកនេះត្រូវដោះស្រាយបញ្ហាមុន។ គឺបញ្ហាភាពក្រីក្រ បញ្ហាអត់ការងារធ្វើដែលបង្ខំឲ្យពលរដ្ឋខ្មែរដែលមានយុវជនខ្មែរជាច្រើនចាកចេញពីប្រទេស គេហៅថាចំណាកស្រុកទៅថៃហ្នឹងជាបរាជ័យរដ្ឋាភិបាលរបស់លោកហ៊ុន សែន»។
របាយការណ៍ពីអង្គការនានាឲ្យដឹងថា ពលករកម្ពុជាខុសច្បាប់និងស្របច្បាប់នៅប្រទេសថៃមានចំនួនប្រមាណជាង៤០ ម៉ឺននាក់។ ពលករទាំងនេះធ្វើការភាគច្រើននៅក្នុងខេត្តជាប់ព្រំដែនកម្ពុជា ដូចជាខេត្តឈុនបូរី ខេត្តបូរីរ៉ាំ និងខេត្តបុទុមឋានីជាដើម។
សមាគមសិទ្ធិមនុស្សអាដហុក និងសម្ព័ន្ឋនិស្សិតបញ្ហាវ័ន្តកម្ពុជាបានចាត់ទុកការបញ្ជូនពលករកម្ពុជាថាជាអំពើមនុស្សធម៌ដែលអាជ្ញាធរថៃបានធ្វើមកលើពលរដ្ឋកម្ពុជា៕
