នៅពេលដែលប្រធានាធិបតីសហរដ្ឋអាមេរិក ដូណាល់ ត្រាំ បានពិភាក្សាអំពីការសម្រេចរបស់លោកដើរចេញពីលទ្ធភាពនៃកិច្ចព្រមព្រៀងជាប្រវត្តិសាស្រ្តជាមួយប្រទេសកូរ៉េខាងជើងកាលពីថ្ងៃព្រហស្បតិ៍ លោកបានព្រមានថា រដ្ឋាភិបាលក្រុងវ៉ាស៊ីនតោនអាចធ្វើដូចគ្នាជាមួយរដ្ឋាភិបាលក្រុងប៉េកាំង ប្រសិនបើកិច្ចព្រមព្រៀងនោះមិនល្អ។
ចិននិងសហរដ្ឋអាមេរិកបាននិយាយថា ពួកគេកំពុងធ្វើឲ្យមានការជឿនលឿនពិតប្រាកដនៅក្នុងការខំប្រឹងប្រែងរបស់ខ្លួនដើម្បីដោះស្រាយការខ្វែងគំនិតគ្នាយ៉ាងខ្លាំងអំពីបញ្ហាពាណិជ្ជកម្ម។ កាលពីសប្តាហ៍មុន ការចរចាដែលត្រូវបានគេសន្មត់ថា បញ្ចប់នៅថ្ងៃសុក្រ បានបន្តរហូតដល់ថ្ងៃអាទិត្យ ហើយប្រធានាធិបតីត្រាំ បានយល់ព្រមពន្យារពេលការយកពន្ធគយបន្ថែមលើទំនិញរបស់ចិនដែលមានតម្លៃ២០០ពាន់លានដុល្លារ ជាពេលកំណត់ដែលកាលពីដំបូងត្រូវបានកំណត់នៅថ្ងៃសុក្រ។
មន្រ្តីនិយាយថា ភាគីទាំងពីរកំពុងខិតខំធ្វើការ ហើយនិងធ្វើផែនការសម្រាប់ប្រធានាធិបតី ត្រាំ ដើម្បីអញ្ជើញលោក ស៊ី ជីងពីង ប្រធានាធិបតីចិនជួបគ្នានៅឯគេហដ្ឋានរបស់លោកនៅកន្លែងលំហែកាយ Mar-a-Lago នៅខែមីនា។
ទោះជាយ៉ាងណាក៏ដោយ មានការព្រួយកង្វល់ដែរថា មេដឹកនាំទាំង២ប្រហែលមិនអាចកាត់បន្ថយការខ្វែងគំនិតរបស់ខ្លួនអំពីអ្វីដែលចិនត្រូវធ្វើដើម្បីបើកចំហរសេដ្ឋកិច្ចរបស់ខ្លួននោះ។
នេះជាការបង្ហាញចេញពីកំណត់សម្គាល់របស់ប្រធានាធិបតី ត្រាំ ក្នុងអំឡុងនៃសន្និសីទកាសែតកាលពីថ្ងៃព្រហស្បតិ៍ក្នុងទីក្រុងហាណូយ។ បន្ទាប់ពីការផ្លាស់ប្តូរគម្រោងភ្លាមៗដែលកាលពីដំបូងត្រូវគេរំពឹងនឹងបញ្ចប់ដោយមានពិធីចុះហត្ថលេខានោះ លោកប្រធានាធិបតីនិយាយថា ការចរចាភាគច្រើនជាមួយកូរ៉េខាងជើងក្នុងប្រទេសវៀតណាម ក៏ដូចជាការចរចាពាណិជ្ជកម្មជាមួយចិន អាចធ្វើរបៀបគ្នានេះដែរ។
ប្រធានាធិបតី ត្រាំ បាននិយាយថា៖ «បើនិយាយពីចិនវិញ យើងកំពុងដោះស្រាយឲ្យដល់គោលដៅពិសេសរបស់យើង ក៏ប៉ុន្តែ យើងនឹងឃើញ។ ខ្ញុំជានិច្ចកាល បានប្រុងប្រៀបដើរចេញ។ ខ្ញុំមិនដែលខ្លាចដើរចេញពីកិច្ចព្រមព្រៀងនោះទេ ហើយខ្ញុំនឹងធ្វើអញ្ចឹងដែរជាមួយចិន ប្រសិនបើជំនួបនោះមិនមានដំណើរការ»។
ក្នុងកំណត់សម្គាល់ទៅកាន់អ្នកយកព័ត៌មាន ប្រធានាធិបតី ត្រាំ បានសង្កត់ពីតួនាទីដែលលោកបាននិយាយថា ចិនបានដើរតួនាទីក្នុងការជួយធ្វើឲ្យជឿនលឿនដល់ការគ្មានអាវុធនុយក្លេអ៊ែរនៅឧបទ្វីបកូរ៉េ ប្រសិនបើរដ្ឋាភិបាលក្រុងព្យុងយ៉ាងទម្លាក់ចោលមហិច្ឆិតានុយក្លេអ៊ែររបស់ខ្លួន ហើយទទួលយកការអភិវឌ្ឍសេដ្ឋកិច្ច។ លោកប្រធានាធិបតី ត្រាំ បាននិយាយទៀតថា បញ្ហាចិនក៏បានត្រូវពិភាក្សាក្នុងអំឡុងនៃជំនួបនោះដែរ។
ប្រធានាធិបតី ត្រាំ បាននិយាយថា៖ «យើងបានពិភាក្សាពីបញ្ហាប្រទេសចិននៅថ្ងៃនេះ។ លោក គីម មានទំនាក់ទំនងដ៏ល្អជាមួយចិន ហើយយើងក៏មានទំនាក់ទំនងល្អដែរ»។
ប្រធានាធិបតី ត្រាំ មិនបាននិយាយថា អ្វីដែលលោកបានពិភាក្សាជាក់លាក់នោះទេ។ លោកបាននិយាយទៀតថា ចិនបានផ្តល់ការគាំទ្រខាងសេដ្ឋកិច្ចដ៏សម្បើមដល់កូរ៉េខាងជើង ក៏ប៉ុន្តែប្រធានាធិបតី ត្រាំ បានបន្ថែមទៀតថា កូរ៉េខាងជើងធ្វើសេចក្តីសម្រេចដោយខ្លួនឯងហើយមិនទទួលបញ្ជាមកពីនរណាទេ។
ការខ្វែងគំនិតភាគច្រើនដែលរដ្ឋាភិបាលក្រុងវ៉ាស៊ីនតោនមានជាមួយរដ្ឋាភិបាលក្រុងព្យុងយ៉ាង គឺវិធានការអ្វីដែលត្រូវធ្វើមុនការដាក់ទណ្ឌកម្មត្រូវដកចេញ។ មានការព្រួយកង្វល់ថា មេដឹកនាំចិនមិនមានឆន្ទៈគ្រប់គ្រាន់នៅក្នុងការឆ្លើយតបទៅនឹងការទាមទាររបស់សហរដ្ឋអាមេរិកដើម្បីធ្វើកំណែទម្រង់រចនាសម្ព័ន្ធ ដូចជាការបញ្ចប់ការជួយឧបត្ថម្ភថវិការបស់រដ្ឋដល់ក្រុមហ៊ុនចិន ការផ្ទេរបច្ចេកវិទ្យាដោយការបង្ខំនិងឧបសគ្គដល់ការចូលទីផ្សាររបស់ចិន។
លោក Liao Qun ប្រធានសេដ្ឋវិទូនៅធនាគារអន្តរជាតិ CITIC បាននិយាយថា រដ្ឋាភិបាលក្រុងប៉េកាំងទំនងទទួលយកកំណត់សម្គាល់របស់ប្រធានាធិបតីត្រាំដោយមិនប្រតិកម្មខ្លាំង។ លោកនិយាយទៀតថា ចិនស៊ាំនិងយុទ្ធវិធីរបស់លោក។ លោក Liao បាននិយាយបន្ថែមទៀតថា កំណត់សម្គាល់របស់ប្រធានាធិបតី ត្រាំ មានន័យថា កិច្ចព្រមព្រៀងនោះមិនទាន់សម្រេច១០០ភាគរយទេ។
លោក Liao បាននិយាយទៀតថា៖ «ដូចជាលោក ត្រាំ បាននិយាយ អាចថានឹងមិនមានកិច្ចព្រមព្រៀង។ ដូច្នេះ កុំមានសុទិដ្ឋិនិយមខ្លាំងពេក ហើយកុំធ្វេសប្រហែស។ អ្នកខ្លះអាចមានសុទិដ្ឋិនិយមច្រើនហួស បន្ទាប់ពីការចរចាកាលពីសប្តាហ៍មុន ការពន្យារពេលនៃកាលបរិច្ឆេទ និងការលើកឡើងរបស់លោកត្រាំ ពីលទ្ធភាពនៃជំនួបជាមួយប្រធានាធិបតីចិន លោក ស៊ី ជីងពីង។
លោក Liao និយាយថា៖ «ជាទូទៅ ខ្ញុំគិតថា ប្រទេសទាំងពីរកំពុងបោះជំហានឆ្ពោះទៅកាន់ទិសដៅវិជ្ជមានមួយ»។ លោកនិយាយទៀតថា ការណ៍នេះក៏ហាក់ដូចជាពួកមន្រ្តីសហរដ្ឋអាមេរិកកំពុងព្យាយាមបន្ថយមនោសញ្ចេតនា និងក្តីសង្ឃឹម។
លោក Robert Lighthizer ជាអ្នកចរចាកំពូលរបស់ប្រធានាធិបតីត្រាំ និងជាតំណាងពាណិជ្ជកម្មសហរដ្ឋអាមេរិកបានប្រាប់សភាអាមេរិកកាលពីថ្ងៃពុធថា កិច្ចព្រមព្រៀងពាណិជ្ជកម្មថ្មីជាមួយចិន មិនបានខិតជិតទៅនឹងការបញ្ចប់ទេ។
លោក Lighthizer បាននិយាយថា៖ «ប្រសិនបើយើងអាចបញ្ចប់ការខំប្រឹងប្រែងនេះ ហើយជាថ្មីម្តងទៀត ខ្ញុំនិយាយថា ប្រសិនបើយើងអាចឈោងដល់សេចក្តីសម្រេចមួយលើបញ្ហានៃលទ្ធភាពនៃការប្រតិបត្តិ យើងអាចមានកិច្ចព្រមព្រៀងមួយដែលអាចធ្វើឲ្យយើងមានទំនាក់ទំនងកាន់តែប្រសើរឡើងជាមួយចិន៕
ប្រែសម្រួលដោយជឹង ប៉ូជីន
