ទីផ្សាររូបិយវត្ថុរបស់ពិភពលោកបានចាប់ផ្តើមធ្លាក់ចុះកាលពីសប្តាហ៍មុន នៅពេលដែលភាពចលាចលខាងសេដ្ឋកិច្ចរបស់តួកគីបានបណ្តាលឲ្យមានការភ័យខ្លាចនៅពេលថ្មីៗនេះ និងមានការព្យាករណ៍ថា ទុកសោករបស់តួកគីអាចបណ្តាលឲ្យមានបញ្ហាហិរញ្ញវត្ថុសាកលលោកម្តងទៀត ដូចកាលពីឆ្នាំ២០០៨។
តម្លៃភាគហ៊ុនរបស់ធនាគារអឺរ៉ុប ដែលជាធនាគារផ្តល់ប្រាក់កម្ចីដ៏ធំមួយទៅឲ្យតួកគីបានដាំក្បាលចុះ ហើយរូបិយវត្ថុរបស់ចិន ប្រេស៊ីល និងម៉ិកស៊ិកបានធ្លាក់ចុះតម្លៃ។
លោក Tim Lee អ្នកនិពន្ធនៃព្រឹត្តិបត្រហានិភ័យនៃការវិនិយោគទុនដែលមានឈ្មោះថា piEconomics បានប្រាប់កាសែត The New York Times ថា «យើងកំពុងមានបញ្ហាវិបត្តិរូបិយវត្ថុមួយទៀតដែលអាក្រក់ជាងឆ្នាំ២០០៨»។
ពួកអ្នកវិភាគឥឡូវនេះនិយាយថា ផលវិបាកសេដ្ឋកិច្ចកាន់តែខ្លាំងឡើងពីបំណុលនិងវិបត្តិរូបិយវត្ថុរបស់តួកគីភាគច្រើននឹងមានកម្រិត ដោយផលប៉ះពាល់ដ៏ខ្លាំងបំផុតហាក់ដូចជាធ្លាក់លើចក្រភពអង់គ្លេស ដែលធនាគាររបស់ប្រទេសនោះបានផ្តល់ប្រាក់កម្ចីភាគច្រើនទៅឲ្យតួកគី។ នេះតាមលោក Oliver Harvey អ្នកវិភាគនៅធនាគារ Deutsche។
ពាណិជ្ជករនិងក្រុមហ៊ុនលក់ផ្ទះសម្បែងរបស់តួកគីបានងាកទៅរកប្រាក់កម្ចីបរទេសដែលមានការប្រាក់ថោកៗជាប្រាក់ដុល្លារជាងសមភាគីរបស់ខ្លួននៅសេដ្ឋកិច្ចទីផ្សារកំពុងរីកលូតលាស់ផ្សេងទៀត។ ពួកគេបានប្រើប្រាស់ប្រាក់កម្ចីដើម្បីផ្តល់ថវិកាកសាងអាគារ Apartment រោងចក្រ និងហាងលក់ដូរទំនិញធំៗដែលបានបង្កើតអាគារខ្ពស់ៗហើយនិងទីក្រុងនានានៅទូទាំងប្រទេសចាប់តាំងពីទីក្រុងអ៊ីស្តង់ប៊ុលនៅភាគខាងជើងរហូតដល់ទីក្រុង Gaziantep នៅផ្នែកខាងត្បូង៕
