នៅថ្ងៃពុធនេះ អ្នកនយោបាយនៅកម្ពុជាទទូចឲ្យកងប្រដាប់អាវុធកម្ពុជាបំពេញកាតព្វកិច្ចខ្លួន ដូចដែលបានកំណត់នៅក្នុងរដ្ឋធម្មនុញ្ញ ខណៈអ្នកឃ្លាំមើលស្ថានការណ៍នយោបាយយល់ថា មន្ត្រីជាន់ខ្ពស់នៃកងកម្លាំងប្រដាប់អាវុធមួយចំនួនហាក់មានទំនោរទៅកាន់គណបក្សកាន់អំណាច។
លោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រី ហ៊ុន សែន និងជានាយរងសេនាធិការចម្រុះនៃកងយោធពលខេមរភូមិន្ទ ថ្លែងថា កងកម្លាំងប្រដាប់អាវុធ មានតួនាទីការពាររដ្ឋធម្មនុញ្ញ និងរដ្ឋាភិបាលស្របច្បាប់ ដើម្បីការពារសុខសន្តិភាពនិងបូរណភាពទឹកដី។
លោកបន្តថា កងកម្លាំងប្រដាប់អាវុធក្នុងឯកសណ្ឋាន មិនមែនជាឧបករណ៍របស់គណបក្សនយោបាយណាមួយនោះទេ។ ក៏ប៉ុន្តែលោកថា ពួកគេក៏មានសិទ្ធិជ្រើសរើសគណបក្សនយោបាយណាដែលពួកគេពេញចិត្ត ក្នុងនាមជាពលរដ្ឋកម្ពុជាដែរ។
លោក អេង ឆៃអ៊ាង តំណាងរាស្ត្រគណបក្សសង្គ្រោះជាតិ ថ្លែងថា គណបក្សជំទាស់ចង់ឃើញ មន្ត្រីកងប្រដាប់អាវុធប្រកាន់ជំហរអព្យាក្រឹត។ លោកថា មន្ត្រីយោធា និងកងកម្លាំងនគរបាល គប្បីធ្វើតែកិច្ចការណាដែលបម្រើផលប្រយោជន៍ជាតិប៉ុណ្ណោះ។
យ៉ាងណាក៏ដោយ លោក មាស នី អ្នកវិភាគសង្គមឲ្យដឹងថា កន្លងមក ធ្លាប់មានមន្ត្រីជាន់ខ្ពស់របស់កងប្រដាប់អាវុធខ្លះធ្លោយមាត់ថា ពួកគេជាកងទ័ពរបស់គណបក្សនយោបាយ។ លោកថា ការណ៍នេះបង្ហាញថា កងប្រដាប់អាវុធនៅកម្ពុជាហាក់មិនទាន់មានជំហរអព្យាក្រឹតពេញលេញដូចដែលបានកំណត់ក្នុងរដ្ឋធម្មនុញ្ញនោះទេ៕
