មេដឹកនាំគណបក្សប្រឆាំងនៅក្នុងប្រទេសអាមេនីត្រូវបានចាប់ខ្លួនកាលពីថ្ងៃអាទិត្យ ប៉ុន្មានម៉ោងបន្ទាប់ពីនាយករដ្ឋមន្ត្រីនៃប្រទេសនេះបានដើរចេញពីកិច្ចប្រជុំរវាងអ្នកទាំងពីរ ដែលផ្សាយលើកញ្ចក់ទូរទស្សន៍។
លោក Nikol Pashinyan មេដឹកនាំគណបក្សប្រឆាំងត្រូវបានចាប់ខ្លួនកាលពីថ្ងៃអាទិត្យ នៅក្នុងរដ្ឋធានី Yerevan នៃប្រទេសអាមេនី ខណៈដែលលោកចូលរួមក្នុងការតវ៉ាមួយក្នុងចំណោមការតវ៉ានានា ដែលបានចាប់ផ្តើមកាលពីសប្តាហ៍មុន នៅពេលដែលរដ្ឋសភាបានបោះឆ្នោតជ្រើសរើសលោក Serzh Sargsyan ជានាយករដ្ឋមន្ត្រី បន្ទាប់ពីលោកបានកាន់តំណែងជាប្រធានាធិបតីអស់រយៈពេលមួយទសវត្សរ៍ហើយនោះ។
អ្នករិះគន់មើលឃើញថា ចំណាត់ការនេះគឺជាការព្យាយាមរបស់លោក Sargsyan ក្នុងការក្តោបក្តាប់អំណាច។
លោក Pashinyan បាននិយាយថា លោកចង់ឲ្យការតវ៉ានេះក្លាយជាចំណុចចាប់ផ្តើមនៃបដិវត្តន៍ដោយសន្តិវិធីមួយ ដោយសំដៅទៅលើការតវ៉ាក្នុងឆ្នាំ១៩៨៩ ដែលបានបញ្ចប់ការកាន់អំណាចកុម្មុយនីស្តក្នុងប្រទេសឆេកូស្លូវ៉ាគី។
មនុស្សប្រហែល១ម៉ឺន៥ពាន់នាក់បានចាប់ផ្តើមការតវ៉ានេះកាលពីថ្ងៃពុធ នៅឯទីលានសាធារណរដ្ឋកណ្តាលទីក្រុង Yerevan ដោយអ្នកខ្លះមានលើកបដាថា «បោះមួយជំហានទៅមុខ ហើយបដិសេធលោក Serzh»។
ជំនួបកាលពីថ្ងៃអាទិត្យ រវាងលោកនាយករដ្ឋមន្ត្រី Sargsyan និងមេដឹកនាំបក្សប្រឆាំងលោក Pashinyan ត្រូវបានធ្វើឡើងដោយមានគោលបំណងបញ្ចប់ការតវ៉ាប្រឆាំងនឹងរដ្ឋាភិបាលដែលនៅតែបន្តធ្វើឡើង។ លោក Sargsyan បានដើរចេញពីជំនួបនោះ នៅពេលដែលលោក Pashinyan បាននិយាយប្រាប់លោកថា លោកមកនេះគឺដើម្បីពិភាក្សាទៅលើការលាលែងពីតំណែងរបស់លោកនាយករដ្ឋមន្ត្រី ហើយលោកនាយករដ្ឋមន្ត្រីបានឆ្លើយតបវិញថា «នេះគឺជាការគំរាមកំហែងយកប្រយោជន៍»។
កាលពីដើមឆ្នាំនេះ លោក Sargsyan ជិតបញ្ចប់តំណែងជាប្រធានាធិបតីក្នុងអាណត្តិទីពីររបស់លោក ដែលជាអាណត្តិបញ្ចប់ទៅហើយ ប៉ុន្តែប្រទេសនេះបានប្តូរប្រព័ន្ធនយោបាយពីការដឹកនាំដោយប្រធានាធិបតីមកជានាយករដ្ឋមន្ត្រីវិញ។ ការណ៍នេះបានផ្តល់អំណាចដល់តួនាទីជានាយករដ្ឋមន្ត្រីដែលអាចកាន់តំណែងបានដោយមិនមានកំណត់អាណត្តិនោះទេ ហើយកាលពីខែមេសា គណបក្សកាន់អំណាចរបស់ប្រទេសអាមេនីបានតែងតាំងលោក Sargsyan ជានាយករដ្ឋមន្ត្រី៕
