សាក្សីមួយរូបក្នុងចំណោមសាក្សីបីរូបរបស់អ្នកស្រី ទេព វន្នី បានលត់ជង្គង់នៅមុខក្រុមប្រឹក្សាអង្គជនុំជម្រះ នៅក្នុងសាលសវនាការសាលាឧទ្ធរណ៍នារសៀលថ្ងៃព្រហស្បតិ៍នេះ អង្វរសុំឲ្យតុលាការដោះលែងអ្នកស្រី ទេព វន្នី ឲ្យមានសេរីភាពពីបទចោទប្រកាន់ថា បានបង្កហិង្សាក្បែរផ្ទះលោកនាយករដ្ឋមន្ត្រី ហ៊ុន សែន។
អ្នកស្រី បូ ឆវី សកម្មជនដីធ្លីក្នុងតំបន់បឹងកក់ ត្រូវបានលោក ប៉ុល សំអឿន ប្រធានក្រុមប្រឹក្សាអង្គជំនុំជម្រះ សួរដេញដោលអំពីហេតុការណ៍ហិង្សាមួយដែលបានកើតឡើងនៅក្បែរផ្ទះលោក ហ៊ុន សែន ក្នុងសង្កាត់ទន្លេបាសាក់ ខណ្ឌដូនពេញ រាជធានីភ្នំពេញ កាលពីខែមីនា ឆ្នាំ២០១៣ ដែលកងសន្តិសុខពីររូបក្នុងខណ្ឌដូនពេញ អះអាងថា ពួកគេត្រូវស្ត្រីពីរនាក់ធ្វើឲ្យមានរបួសស្នាមនៅត្រង់ក្បាល និងផ្ទៃមុខ។ ក្នុងការសួរដេញដោលនោះ អ្នកស្រី បូ ឆវី បានប្រាប់ក្រុមប្រឹក្សាអង្គជំនុំជម្រះថា អ្នកស្រី ទេព វន្នី មិនបានធ្វើសកម្មភាពបង្កហិង្សានោះទេ ហើយក្រុមដែលបង្កហិង្សាគឺកងសន្តិសុខ។
ក្រោយការសួរដេញដោលបានបញ្ចប់ អ្នកស្រី បូ ឆវី បានលត់ជង្គង់ និងលើកដៃសំពះអង្គជំនុំជម្រះ ហើយបានស្បថថា ការផ្តល់ចម្លើយរបស់អ្នកស្រីដើម្បីការពារភាពស្អាតស្អំរបស់អ្នកស្រី ទេព វន្នី គឺជាការណ៍ពិត ហើយបើមិនពិតទេនោះ សុំឲ្យទេព្តាបរាមុខអ្នកស្រី។
អ្នកស្រី ទេព វន្នី វ័យ៣៧ឆ្នាំ ត្រូវបានសាលាដំបូងរាជធានីភ្នំពេញសម្រេចឃុំខ្លួនក្នុងពន្ធនាគារកាលពីខែសីហា ឆ្នាំ២០១៦ពាក់ព័ន្ធនឹងបទហិង្សាដោយចេតនាមានស្ថានទម្ងន់ទោស ឬត្រូវមានទោសកម្រិតធ្ងន់។ ក្រោយការឃុំខ្លួនបណ្តោះអាសន្ននោះ សាលាដំបូងរាជធានីភ្នំពេញ នៅថ្ងៃទី២៣ ខែកុម្ភៈ ឆ្នាំ២០១៧ ក៏បានសម្រេចកាត់ទោសអ្នកស្រី ទេព វន្នី ដែលជាជ័យលាភីរង្វាន់ស្ត្រីជាអ្នកដឹកនាំរបស់អង្គការ Vital Voices ឲ្យជាប់ក្នុងពន្ធនាគាររយៈពេល២ឆ្នាំនិង៦ខែ។
ពេលឈរនៅមុខក្រុមប្រឹក្សាអង្គជំនុំជម្រះ ក្នុងសាលសវនាការសាលាឧទ្ធរណ៍នៅថ្ងៃព្រហស្បតិ៍នេះ អ្នកស្រី ទេព វន្នី បានសំណូមពរឲ្យតុលាការផ្តល់យុត្តិធម៌ដល់អ្នកស្រី និងដោះលែងអ្នកស្រីឲ្យមានសេរីភាពវិញ ដើម្បីជួបជុំកូនៗ និងម្តាយចាស់ជរា ដែលកំពុងរស់នៅក្នុងសភាពខ្វះខាត។
នៅចុងបញ្ចប់សវនាការ លោក ប៉ុល សំអឿន ប្រធានក្រុមប្រឹក្សាអង្គជំនុំជម្រះ បានសម្រេចថា តុលាការនឹងប្រកាសសាលដីកាលើបណ្តឹងជំទាស់របស់អ្នកស្រី ទេព វន្នី នៅថ្ងៃទី៨ ខែសីហាខាងមុខ។
ជារឿយៗ គេសង្កេតឃើញថា អ្នកស្រី ទេព វន្នី តែងនិយាយបង្អាក់ការសួរដេញដោលរបស់អង្គជំនុំជម្រះទៅលើសាក្សីនីមួយៗរបស់អ្នកស្រី ក្នុងសវនាការនោះ។ ភាពតានតឹងខាងពាក្យសម្តីក៏បានកើតឡើង នៅពេលលោក ង៉ែត សារ៉ាត់ តំណាងអយ្យការសួរនាំអ្នកស្រី ទេព វន្នី អំពីរឿងហេតុដែលបានកើតឡើង កាលពីបួនឆ្នាំមុន។ អ្នកស្រី ទេព វន្នី បានចោទលោក ង៉ែត សារ៉ាត់ ថា ព្យាយាមសួររកតែកន្លែងអាចចាប់កំហុសមនុស្សស្លូតត្រង់។ តែលោក ង៉ែត សារ៉ាត់ មិនតបត ហើយបានស្នើឲ្យប្រធានក្រុមប្រឹក្សាអង្គជំនុំជម្រះតម្កល់សាលក្រមរបស់តុលាការរាជធានីភ្នំពេញប្រឆាំងនឹងអ្នកស្រី ទេព វន្នី ទុកជាបានការ។
រហូតមកទល់នឹងពេលនេះ អ្នកស្រី ទេព វន្នី បានជាប់ក្នុងពន្ធនាគាររយៈពេល៣៤៦ថ្ងៃ។ ក្រុមអ្នកឃ្លាំមើលសិទ្ធិមនុស្សដែលចូលរួមសវនាការនៅសាលាឧទ្ធរណ៍ មើលមិនឃើញពីភស្តុតាងដែលអាចគាំទ្រដល់ការកាត់ទោសអ្នកស្រី ទេព វន្នី នោះឡើយ។
លោក អំ សំអាត ប្រធានការិយាល័យបច្ចេកទេសស៊ើបអង្កេតនៃអង្គការពារសិទ្ធិមនុស្សលីកាដូ បានសម្តែងការសោកស្តាយ ដែលពុំមានវត្តមានដើមបណ្តឹង និងសាក្សីរបស់ដើមបណ្តឹង ដែលប្តឹងប្រឆាំងអ្នកស្រី ទេព វន្នី។ លោកបានប្រាប់ក្រុមអ្នកយកព័ត៌មាន នៅមុខសាលាឧទ្ធរណ៍ថា តាមការអង្កេតក្នុងសាលសវនាការ តុលាការមិនបានបង្ហាញភស្តុតាងជាក់លាក់គាំទ្រដល់ការកាត់ទោសរបស់តុលាការរាជធានីភ្នំពេញនោះឡើយ។
«ឆ្លងតាមការជជែកដេញដោលនេះ យើងខ្ញុំដែលចូលស្តាប់សវនាការ យើងហាក់បីដូចជាមិនរកឃើញភស្តុតាង ឬចំណុចណាមួយដែលថា អ្នកស្រី ទេព វន្នី បានប្រព្រឹត្តដូចការចោទប្រកាន់ហ្នឹងទេ។ អីចឹងយើងគ្រាន់តែមានការសង្ឃឹមថា សាលាឧទ្ធរណ៍លោកនឹងទម្លាក់ចោលនូវបទចោទប្រកាន់នេះ ហើយនឹងដោះលែងអ្នកស្រី ទេព វន្នី ឲ្យមានសេរីភាពវិញ»។
រីឯក្រុមមេធាវីការពារក្តីអ្នកស្រី ទេព វន្នី បានលើកឡើងនៅចំពោះមុខអង្គជំនុំជម្រះសាលាឧទ្ធរណ៍ថា មានចំណុចសង្ស័យជាច្រើនទាក់ទិននឹងនីតិវិធីសើរើរឿងក្តីដែលបានកើតឡើងតាំងពីឆ្នាំ២០១៣ និងចម្លើយរបស់សាក្សី ដែលគំាទ្រដើមបណ្តឹងពីររូបគឺមានឈ្មោះ អ៊ុក រតនា និង ហោ អឿន ដែលជាកងសន្តិសុខដឹកនាំដោយលោក គង់ វុត្ថាប្រធានកងសន្តិសុខខណ្ឌដូនពេញ។
អ្នកស្រី សាម សុគន្ធា មេធាវីការពារក្តីអ្នកស្រី ទេព វន្នី បានសុំឲ្យក្រុមប្រឹក្សាអង្គជំនុំជម្រះលើកលែងបទចោទប្រកាន់លើអ្នកស្រី ទេព វន្នី និងដោះលែងសកម្មជនដីធ្លីរូបនេះឲ្យមានសេរីភាពឡើងវិញ ដោយលោកស្រីអះអាងថា មានវិមតិសង្ស័យជាច្រើនក្នុងការកសាងសំណុំរឿងរបស់អាជ្ញាធរមានសមត្ថកិច្ចក្នុងខណ្ឌដូនពេញ ដោយសារហេតុការណ៍បានកើតឡើងតាំងពីឆ្នាំ២០១៣ តែបែរជាតុលាការលើកយកមកចោទប្រកាន់នៅខែសីហាឆ្នាំ២០១៦។ អ្នកស្រីពន្យល់តុលាការផងដែរ សាក្សីក៏បានផ្តល់ចម្លើយមិនច្បាស់លាស់អំពីអ្នកបង្កហិង្សា កាលពីថ្ងៃទី១៣ ខែមីនា ឆ្នាំ២០១៣នោះ។
ការឃុំខ្លួន និងការកាត់ទោសកាលពីពេលកន្លងមកនោះធ្វើឡើង ក្រោយពីសកម្មជនដីធ្លីរូបនេះដឹកនាំយុទ្ធនាការថ្ងៃចន្ទពណ៌ខ្មៅយ៉ាងសកម្មទាមទារឲ្យដោះលែងមន្ត្រីសិទ្ធិមនុស្សបួនរូបរបស់សមាគមការពារសិទ្ធិមនុស្សអាដហុក និងមន្ត្រីជាន់ខ្ពស់មួយរូបរបស់គណៈកម្មាធិការជាតិរៀបចំការបោះឆ្នោត (គ.ជ.ប.) និងទាមទារយុត្តិធម៌ជូនលោក កែម ឡី អ្នកវិភាគសង្គម និងនយោបាយដ៏ល្បីល្បាញមួយរូប ដែលត្រូវគេបាញ់សម្លាប់កាលពីខែកក្កដា ឆ្នាំ២០១៦ នៅកណ្ដាលទីក្រុងភ្នំពេញ។
កញ្ញា សុង ស្រីលាភ សកម្មជនដីធ្លីនៅតំបន់បឹងកក់ បានប្រាប់ VOA ក្រោយសវនានៅសាលាឧទ្ធរណ៍ថា យុត្តិធម៌នឹងមានសម្រាប់អ្នកស្រី ទេព វន្នី ប្រសិនបើតុលាការសម្រេចចិត្តដោយផ្អែកលើផ្លូវច្បាប់។
«បើតុលាការនោះ គាត់មិនកាន់គោលជំហរមួយ ដែលឯករាជ្យ ធ្វើការសម្រាប់ប្រជាពលរដ្ឋ ឬក៏ធ្វើការឲ្យយុត្តិធម៌ តាមនីតិវិធី ឬចំណេះវិជ្ជាគាត់ ដែលបានរៀនមកនោះ គឺយើងមិនងាយមើលឃើញ ពាក្យថា យុត្តិធម៌ជាមួយអ្នកស្រី ទេព វន្នី ក៏ដូចជាពួកយើងរងគ្រោះកន្លងមកទេ»។
គ្រាដែលឆ្មាំពន្ធនាគារនាំអ្នកស្រី ទេព វន្នី ទៅមន្ទីរឃុំឃាំងវិញនោះ កូនស្រីសកម្មជនដីធ្លីរូបនេះគឺកុមារី អ៊ូ គង់បញ្ញា វ័យ១៣ឆ្នាំ និយាយថា គ្មានម្តាយនៅក្បែរ ខ្លួនញាំបាយមិនសូវបាន ហើយការរៀនសូត្រក៏ជួបការលំបាកផងដែរ៕
