ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សាលា​ឧទ្ធរណ៍​បើក​សវនាការ​បណ្តឹង​ហ៊ុន សែន-សម រង្ស៊ី​ រឿង​ ‍Like‍ លើ Facebook


លោកនាយករដ្ឋ​មន្ត្រី ហ៊ុន សែន (ឆ្វេង) និង​លោក សម រង្ស៊ី (ស្តាំ) ប្រធាន​គណបក្ស​សង្គ្រោះជាតិ។ (Reuters/Leng Len/VOA Khmer)
លោកនាយករដ្ឋ​មន្ត្រី ហ៊ុន សែន (ឆ្វេង) និង​លោក សម រង្ស៊ី (ស្តាំ) ប្រធាន​គណបក្ស​សង្គ្រោះជាតិ។ (Reuters/Leng Len/VOA Khmer)

សាលា​ឧទ្ធរណ៍​នឹង​ប្រកាស​សាលដីកា​​លើ​សវនាការ​បណ្តឹង​របស់​លោក​សម រង្ស៊ី ​ប្រធាន​គណបក្ស​សង្គ្រោះ​ជាតិ​ នៅ​ថ្ងៃទី​៩ ​ខែ​កុម្ភៈ ​ឆ្នាំ​២០១៧។

សាលា​ឧទ្ធរណ៍​នា​រសៀល​ថ្ងៃ​អង្គារ​នេះ​បាន​បើក​សវនាការ​លើបណ្តឹង​មិន​សុខ​ចិត្ត​របស់​លោក​សម រង្ស៊ី ​ប្រធាន​គណបក្ស​ប្រឆាំង ប្តឹង​ជំទាស់​លើ​ការ​សម្រេច​របស់​សាលា​ដំបូង​រាជ​ធានី​ភ្នំពេញ​ ដែល​បាន​កាត់​ក្តី​ឲ្យ​លោក​ចាញ់​លោក​នាយក​រដ្ឋមន្រ្តី​ហ៊ុន សែន​ ពី​បទ​បរិហារកេរ្តិ៍ ​ពាក់​ព័ន្ធ​នឹង​ការ​ទិញ​ចំនួន​ Like​ លើ ​Facebook។ ​ក្រោយ​សវនាការ​ជាង​១​ម៉ោង ​ប្រធាន​ក្រុម​ប្រឹក្សា​ជំនុំ​ជម្រះ​សម្រេច​លើក​ពេល​ប្រកាស​សាល​ដីកា​ទៅ​ថ្ងៃទី​៩​ ខែ​កុម្ភៈ​ខាង​មុខ។​

សាលា​ឧទ្ធរណ៍​នឹង​ប្រកាស​សាលដីកាលើ​សវនាការ​បណ្តឹង​របស់​លោក​សម រង្ស៊ី ​ប្រធាន​គណបក្ស​សង្គ្រោះ​ជាតិ​ នៅ​ថ្ងៃទី​៩ ​ខែ​កុម្ភៈ ​ឆ្នាំ​២០១៧ ​បន្ទាប់​ពី​លោក​សម រង្ស៊ី ​បាន​ប្តឹង​មិន​សុខ​ចិត្ត​លើ​ការ​សម្រេច​របស់​សាលា​ដំបូង​រាជធានី​ភ្នំពេញ​កាត់ក្តី​ ឲ្យ​លោក​សម រង្ស៊ី​ ចាញ់​ក្តី​បទ​បរិហារ​កេរ្តិ៍​ក្នុង​សំណុំ​រឿង​ចោទ​ថា ​លោក​ហ៊ុន សែន​ ទិញ​ចំនួន​ ​Like​ លើ​ទំព័រ​ Facebook។​

កាលពីថ្ងៃ​ទី​៨​ ខែ​វិច្ឆិកា ​ឆ្នាំ​២០១៦ សាលា​ដំបូង​រាជធានី​ភ្នំពេញ​បាន​ប្រកាស​សាលក្រម​សម្រេច​ឲ្យ​លោក​សម រង្ស៊ី ​ប្រធាន​គណបក្ស​ប្រឆាំង ​ចាញ់​ក្តី​ក្នុង​សំណុំ​រឿង​បរិហារ​កេរ្តិ៍​លោក​នាយក​រដ្ឋមន្ត្រី​ហ៊ុន សែន ​ជា​សាធារណៈ​លើ​ទំព័រ Facebook ​និង​បង្គាប់​ឲ្យ​ប្រធាន​គណបក្ស​ប្រឆាំង​រូបនេះ​បង់​ពិន័យ​ចូល​រដ្ឋ​ចំនួន​១០​លាន​រៀល ​និង​បង់​សំណង​ជំងឺ​ចិត្ត​ទៅ​ឲ្យ​លោក​នាយក​រដ្ឋ​មន្រ្តី​ហ៊ុន សែន ​ចំនួន​១៥​លាន​រៀល។​

រូបឯកសារ៖ បើ​តាម​គេហទំព័រ socialbakers.com នៅ​ត្រឹម​ថ្ងៃ​ទី​៩ ខែ​មីនា ឆ្នាំ​២០១៦ ទំព័រ Facebook របស់​លោក​នាយករដ្ឋមន្ត្រី​ ហ៊ុន សែន ដែល​មាន​អ្នក Like ជាង​៣​លាន​នោះ មាន​អ្នក​ Like ពី​ប្រទេស​ឥណ្ឌា​ប្រមាណ​ជា​១១​ភាគ​រយ​ឬ​ស្មើ​ជាង​៣៣០.០០០គណនី។ (ថត​ពី​គេហទំព័រ SocialBakers)
រូបឯកសារ៖ បើ​តាម​គេហទំព័រ socialbakers.com នៅ​ត្រឹម​ថ្ងៃ​ទី​៩ ខែ​មីនា ឆ្នាំ​២០១៦ ទំព័រ Facebook របស់​លោក​នាយករដ្ឋមន្ត្រី​ ហ៊ុន សែន ដែល​មាន​អ្នក Like ជាង​៣​លាន​នោះ មាន​អ្នក​ Like ពី​ប្រទេស​ឥណ្ឌា​ប្រមាណ​ជា​១១​ភាគ​រយ​ឬ​ស្មើ​ជាង​៣៣០.០០០គណនី។ (ថត​ពី​គេហទំព័រ SocialBakers)

បណ្តឹង​ប្តឹង​លោក​សម រង្ស៊ី​ នេះ​ធ្វើ​ឡើង​ដោយ​លោក​សោម សឿន ​សមាជិក​គណៈកម្មាធិការ​កណ្ដាល​គណបក្ស​ប្រជាជន​កម្ពុជា ក្រោយ​ពី​លោក​សម រង្ស៊ី​ បាន​បង្ហោះ​នៅ​លើ​ទំព័រ​ Facebook​ របស់​លោក​ថា​ មន្ត្រី​គណបក្ស​កាន់​អំណាច​គឺ​គណបក្ស​ប្រជាជន​កម្ពុជា ​ជា​អ្នក​នៅ​ពី​ក្រោយ​ការ​ជំរុញ​ឲ្យ​មនុស្ស​ចូលរួម​ចុច​ Like ​លើ​ទំព័រ Facebook ​របស់​លោក​ហ៊ុន សែន។​

នា​រសៀល​ថ្ងៃ​អង្គារ​ ទី​១៧​ ខែ​មករា​នេះ​ សាលា​ឧទ្ធរណ៍​ដែល​មាន​លោក​សំរឹទ្ធិ សុផល​ ជា​ប្រធាន​ក្រុម​ប្រឹក្សា​ជំនុំ​ជម្រះ ​និង​លោក​ង៉ែត សារ៉ាត​ ជា​ព្រះ​រាជ​អាជ្ញា​ បាន​បើក​សវនាការ​ជំនុំ​ជម្រះ​បណ្តឹង​របស់​លោក​សម រង្ស៊ី​ ប្តឹង​មិន​សុខ​ចិត្ត​លើ​ការ​សម្រេច​របស់​សាលា​ដំបូង​រាជធានី​ភ្នំពេញ​ដែល​បាន​កាត់​សេចក្តី​ឲ្យ​លោក​ចាញ់​ក្នុង​សំណុំ​រឿង​ពាក់ព័ន្ធ​នឹង​ការ​ទិញ​ចំនួន​ចូលចិត្ត ​ឬ​ហៅថា​ Like​ លើ​ទំព័រ ​Facebook ​ដែល​ត្រូវ​បាន​ចោទ​ថា ​ជា​ការ​បរិហារ​កេរ្តិ៍។​

ក្នុង​សវនាការ ដែល​មិន​អនុញ្ញាត​ឲ្យ​អ្នក​សារ​ព័ត៌មាន​កត់ត្រា លោក​ង៉ែត សារ៉ាត​ ថ្លែង​ថា ​ការ​លើក​ឡើង​របស់​មេធាវី​ការពារ​ក្តី​ឲ្យ​លោក​សម រង្ស៊ី ​និង​ការ​លើក​ឡើង​របស់​លោក​សម រង្ស៊ី ​លើ​ទំព័រ​ Facebook ​ពាក់ព័ន្ធ​នឹង​ការ​ទិញ​ចំនួន​ Like ​និង​ការ​ជួល​អ្នក​ក្រីក្រ​ឲ្យ​បង្កើត​គណនេយ្យ​ Facebook ​ដើម្បី​ចុច​ Like ​ជា​ដើម​នោះ​ សុទ្ធ​តែជា​រឿង​ដែល​មិន​អាច​កើត​មាន។​

លោក សោម សឿន សមាជិក​គណៈកម្មាធិការ​កណ្ដាល​គណបក្ស​ប្រជាជន​កម្ពុជា ថ្លែង​ប្រាប់​អ្នកសារ​ព័ត៌មាន​ ក្រោយ​ចេញ​ពី​សវនាការ​សាលាឧទ្ធរណ៍ នៅ​ថ្ងៃទី​១៧ ខែ​មករា ឆ្នាំ​២០១៧។ (កាន់ ​វិច្ឆិកា/VOA)
លោក សោម សឿន សមាជិក​គណៈកម្មាធិការ​កណ្ដាល​គណបក្ស​ប្រជាជន​កម្ពុជា ថ្លែង​ប្រាប់​អ្នកសារ​ព័ត៌មាន​ ក្រោយ​ចេញ​ពី​សវនាការ​សាលាឧទ្ធរណ៍ នៅ​ថ្ងៃទី​១៧ ខែ​មករា ឆ្នាំ​២០១៧។ (កាន់ ​វិច្ឆិកា/VOA)

នៅ​ក្នុង​សវនាការ​នោះ​ តំណាង​មហា​អយ្យការ​ និង​ដើម​បណ្ដឹង​គឺ​លោក​សោម សឿន បាន​ស្នើ​ឲ្យ​សាលា​ឧទ្ធរណ៍​តម្កល់​សាលក្រម​សាលា​ដំបូង​រាជធានី​ភ្នំពេញ​ឲ្យ​នៅ​ដដែល ​ខណៈ​ដែល​លោក​សំ សុគង់ ​មេធាវី​របស់​លោក​សម រង្ស៊ី​ បាន​ស្នើ​សាលា​ឧទ្ធរណ៍​ឲ្យ​ទម្លាក់​ចោល​ការ​ចោទ​ប្រកាន់​នេះ។​

ក្រោយ​ការ​សន្និដ្ឋាន​របស់​មេធាវី​ដើ​ម​បណ្តឹង ​និង​មេធាវី​ចុង​ចោទ ​រួម​និង​ការ​សន្និដ្ឋាន​របស់​ព្រះ​រាជ​អាជ្ញា​ក្នុង​សវនាការ​រយៈពេល​ជាង​១​ម៉ោង ដោយ​គ្មាន​ការ​ចូល​រួម​ពី​អ្នក​ជំនាញ​ផ្នែក​ Facebook​ ​លោក​សំរឹទ្ធ សុផល ​សម្រេច​លើក​ពេល​ប្រកាស​សាល​ដីកា​ទៅ​ថ្ងៃទី​៩ ខែ​កុម្ភៈ ​វេលា​ម៉ោង​៨​ព្រឹក។

ក្នុង​សវនាការ​ដែល​គ្មាន​វត្ត​មាន​របស់​លោក​សម រង្ស៊ី​ នោះ​ ​លោក​សោម សឿន ​ដើម​បណ្តឹង​ដែល​តំណាង​ឲ្យ​លោក​ហ៊ុន សែន​ បាន​ថ្លែង​ចំពោះ​មុខ​សវនាការ​ថា ​លោក​សម រង្ស៊ី​ បាន​បង្ហោះ​អត្ថបទ​ដែល​មាន​ខ្លឹម​សារ​មួល​បង្កាច់​ខុស​ពី​ការណ៍​ពិត។ ​លោក​សោម សឿន​ បញ្ជាក់​ថា ​ការ​បង្ហោះ​របស់​លោក​សម រង្ស៊ី ​នេះ​បាន​ធ្វើ​ឲ្យ​ប៉ះពាល់​ដល់​កិត្តិយស​ថ្នាក់​ដឹក​នាំ​ជាតិ និង​ប៉ះពាល់​ដល់​រូប​លោក​ធ្ងន់ធ្ងរ។​

ក្រោយ​ពី​ចេញពី​សវនាការ​ លោក​សោម សឿន ថ្លែង​ប្រាប់​អ្នក​សារ​ព័ត៌មាន​ថា ​បើ​ទោះ​បី​ជា​លោក​យល់​ព្រម​ទទួល​យក​សាលក្រម​សាលា​ដំបូង​រាជធានី​ភ្នំពេញ​ដែល​សម្រេច​ឲ្យ​លោក​សម រង្ស៊ី​ បង់​សំណង​ជូន​លោក​នាយក​រដ្ឋមន្រ្តី​ចំនួន​១៥​លាន​រៀល​ក៏​ដោយ ប៉ុន្តែ​លោក​ថា ​ចំនួន​នេះ​មិន​ទាន់​សក្តិសម​នឹង​កិត្តិយស​របស់​លោក​ និង​កិត្តិយស​របស់​លោក​ហ៊ុន សែន ​ដែល​លោក​សម រង្ស៊ី ​ធ្វើ​ឲ្យ​ប៉ះពាល់​នៅ​ឡើយ។​

លោក​មាន​ប្រសាសន៍​ថា៖

«អំពី​ប្រាក់​សំណង​ជំងឺ​ចិត្ត​១៥​លាន​រៀល​ វា​មិន​សម​ល្មម​នឹង​កិត្តិយស ​ធនធាន ​ពេល​វេលា ​ដែល​ខ្ញុំ​ត្រូវ​ចំណាយ​អត់​ប្រយោជន៍​ ទៅ​លើ​រឿង​របស់​លោក​សម រង្ស៊ី ​ដែល​គាត់​ប្រឌិត​រឿង​ហេតុ​ ហើយ​ចោទ​ទម្លាក់​កំហុស​បំភ្លៃ​ការណ៍​ពិត​ ខុសពី​អ្វី​ដែល​ខ្ញុំ​បាន​ធ្វើ»។​

រូបថតគេហទំព័រ socialbakers.com នេះ​បង្ហាញ​ទំព័រ Facebook មាន​អ្នក Like ច្រើន​ជាង​គេ​នៅ​កម្ពុជា​និង​ទូទាំង​ពិភពលោក​ នៅ​ត្រឹម​ថ្ងៃ​ទី​៩ ខែ​មីនា ឆ្នាំ​២០១៦។
រូបថតគេហទំព័រ socialbakers.com នេះ​បង្ហាញ​ទំព័រ Facebook មាន​អ្នក Like ច្រើន​ជាង​គេ​នៅ​កម្ពុជា​និង​ទូទាំង​ពិភពលោក​ នៅ​ត្រឹម​ថ្ងៃ​ទី​៩ ខែ​មីនា ឆ្នាំ​២០១៦។

ក្នុង​សាល​សវនាការ​នោះ លោក​សំ សុគង់ ​មេធាវី​ការពារ​ក្តី​ឲ្យ​លោក​សម រង្ស៊ី​ បាន​សួរ​ដេញ​ដោល​លោក​សោម សឿន ​ពាក់ព័​ន្ធ​នឹង​ចំណុច​ចំនួន​៥ ដែល​លោក​សោម សឿន​ ណែនាំ​អ្នក​គាំទ្រ​គណបក្ស​កាន់​អំណាច​ឲ្យ​ចុច​ Like ​ទំព័រ​ Facebook ​លោក​ហ៊ុន សែន ហើយ​ចុច​មិន​ចូលចិត្ត​ ឬ​ Unlike​ លើ​ទំព័រ​ Facebook ​របស់​លោក​សម រង្ស៊ី។ ​

លោក​បន្ថែម​ថា ​ការ​ណែនាំ​របស់​លោក​សោម សឿន ​មាន​ចំនួន​៥​ចំណុច ​ជា​មូល​ហេតុ​ដែល​លោក​សម រង្ស៊ី យក​ទៅ​បង្ហោះលើ​ទំព័រ​ Facebook ​ហើយលោក​សំ សុគង់ ​អះអាង​ថា​ការ​បកស្រាយ​របស់​លោក​សម រង្ស៊ី ​នៅ​លើ​ Facebook ​នោះ​មិនមែន​ជា​ការ​ចោទ​ប្រកាន់​នោះ​ទេ។​

​ក្រោយ​ចេញ​ពី​សាល​សវនាការ លោក​សំ សុគង់ ​ថ្លែង​ប្រាប់​អ្នក​សារ​ព័ត៌មាន​ថា​ បណ្តឹង​របស់​លោក​សោម សឿន​ ដែល​ប្តឹង​ការ​បង្ហោះ​សារ​លើ​ទំព័រ​ Facebook ​លោក​សម រង្ស៊ី ​អាច​កើត​ឡើង​ដោយ​សារ​ការ​ភាន់​ច្រឡំ​ខ្លឹមសារ​នៃ​ការ​បកប្រែ​ពីភាសា​អង់គ្លេស។​

លោក សំ សុគង់ មេធាវី​ការពារ​ក្តី​ឲ្យ​លោក សម រង្ស៊ី ថ្លែង​ប្រាប់​អ្នក​សារព័ត៌មាន​ក្រោយ​ចេញពី​សាល​សវនាការ​សាលាឧទ្ធរណ៍ នៅ​ថ្ងៃទី​១៧ ខែ​មករា ឆ្នាំ​២០១៧។ (កាន់ ​វិច្ឆិកា/VOA)
លោក សំ សុគង់ មេធាវី​ការពារ​ក្តី​ឲ្យ​លោក សម រង្ស៊ី ថ្លែង​ប្រាប់​អ្នក​សារព័ត៌មាន​ក្រោយ​ចេញពី​សាល​សវនាការ​សាលាឧទ្ធរណ៍ នៅ​ថ្ងៃទី​១៧ ខែ​មករា ឆ្នាំ​២០១៧។ (កាន់ ​វិច្ឆិកា/VOA)

លោក​បញ្ជាក់​ថា៖​

«ឯក​ឧត្តមសម រង្ស៊ី​ គ្រាន់​តែ​បកស្រាយ​ទាក់ទង​នឹង​សេចក្តី​ណែនាំ​របស់​ឯកឧត្តម​ សោម សឿន​ ចំនួន​៥​ចំណុច​ហ្នឹង។ ​ខ្ញុំ​គិត​ថា​ ទាក់ទង​នឹង​ការ​ភាន់​ច្រឡំ​ហ្នឹង ​គឺ​ទាក់ទង​នឹង​ការ​បក​ប្រែ​ជា​ភាសា​អង់គ្លេស​ ដោយ​សារ​នៅ​ក្នុង​អត្ថន័យ​នៃ​ភាសា​អង់គ្លេស​ និង​អត្ថន័យ​នៃ​ភាសាខ្មែរ​មាន​លក្ខណៈ​ខុស​គ្នា»។​

កាល​ពី​ថ្ងៃ​ទី​៩ ​ខែ​មីនា ​ឆ្នាំ​២០១៦​ ​លោក​សម រង្ស៊ី​ បាន​សរសេរ​នៅ​លើ​ទំព័រ​ Facebook របស់​លោក​ថា ថ្ងៃ​នេះ​មាន​ធ្លាយ​ព័ត៌មាន​មួយ​តាម​រយៈ​កាសែត​ភ្នំពេញ​ប៉ុស្តិ៍ ​ពី​មតិ​ចូល​ចិត្ត ​ឬ ​Like ​ក្លែងក្លាយ​លើ​ទំព័រ ​Facebook ​របស់​លោក​ហ៊ុន សែន‍។ ​លោក​ថា ​ចំនួន Like ​មួយ​ចំនួន​ធំ​លើ​ទំព័រ ​Facebook ​លោក​ហ៊ុន សែន​ គឺ​បាន​មក​ពី​ការ​ទិញ ​ឬ​ជួល​មនុស្ស​ក្រីក្រ​ដែល​អត់​ការងារ​ធ្វើ ​ឲ្យ​បង្កើត​គណនេយ្យ​ក្លែង​ក្លាយ ដើម្បី​ចុច Like ឲ្យ​លោក​ហ៊ុន សែន។ ​លោក​សម រង្ស៊ី​ សរសេរ​បន្ត​ថា ​អ្នក​ដែល​គេ​ជួល​ឲ្យ​ធ្វើ​បែប​នេះ​ច្រើន​ជាង​គេ ​គឺ​នៅ​ប្រទេស​ឥណ្ឌា ​និង​ហ្វីលីពីន។​

ក្រៅពី​បទ​បរិហារ​កេរ្តិ៍​ពាក់ព័ន្ធ​នឹង​ការ​ទិញ​ចំនួន ​Like ​លើ ​Facebook ​នេះ ​លោក​សម រង្ស៊ី​ ដែល​កំពុង​និរទេស​ខ្លួន​ទៅ​ប្រទេស​បារាំង​ក៏​កំពុង​រង​នូវ​បទ​ចោទ​ប្រកាន់ ​និង​កាត់​ទោស​ចំនួន​៤​ករណីផ្សេង​ទៀត​ពាក់ព័ន្ធ​នឹង​ការ​បរិហារ​កេរ្តិ៍​ លោក​ហ៊ុន សែន ក្នុង​ករណី​ឃាតកម្ម​លើ​លោក​កែម ឡី ​ការ​បរិហារកេរ្តិ៍​លោក​ហេង សំរិន​ និង​លោក​ហោ ណាំហុង​ និង​បទ​សម​គំនិត​ពាក់ព័ន្ធ​នឹង​ការ​ក្លែង​ឯកសារ​សាធារណៈ​គឺ​ផែនទី​កម្ពុជា-វៀតណាម៕

XS
SM
MD
LG