ប្រាំថ្ងៃក្រោយការប្រកាសរបស់នាយករដ្ឋមន្រ្តីក្នុងការគាំទ្រកូនប្រុសច្បងរបស់លោកឲ្យធ្វើជានាយករដ្ឋមន្រ្តីក្នុងពេលអនាគត លោក ស ខេង រដ្ឋមន្រ្តីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជា ទើបតែចេញសារមួយកាលពីថ្ងៃអង្គារ ដែលអ្នកវិភាគចាត់ទុកសារនោះថា ជា«សារបែបកណ្តាល» ដែលមិនគាំទ្របុគ្គលនោះទេ។
កាលពីថ្ងៃអង្គារ នៅលើហ្វេសប៊ុកផ្ទាល់ខ្លួនរបស់លោក ស ខេង មានការបង្ហោះសារមួយ ដែលបង្ហាញការគាំទ្រសេចក្តីសម្រេចរបស់មហាសន្និបាត និងសន្និបាតរបស់គណបក្សប្រជាជនកម្ពុជាសម្រាប់បេក្ខភាពនាយករដ្ឋមន្រ្តីនៅក្នុងគណបក្សកាន់អំណាច។ លោកមិនបានសរសេរចំឈ្មោះលោក ហ៊ុន ម៉ាណែត ដូចសាររបស់មន្រ្តីជាន់ខ្ពស់ផ្សេងៗឡើយ។
លោក ស ខេង ដែលត្រូវបានមើលឃើញថា ជាបេក្ខភាពនាយករដ្ឋមន្រ្តីមួយរូបដែរនោះ បានសរសេរនៅក្នុងសារនោះថា លោកនឹងគោរពតាមការសម្រេចរបស់គណបក្សប្រជាជនកម្ពុជា ក្រោមការដឹកនាំរបស់លោក ហ៊ុន សែន ចំពោះការជ្រើសរើសបេក្ខភាពនាយករដ្ឋមន្ត្រីនាពេលអនាគត។
លោកបញ្ជាក់ក្នុងន័យដើមថា៖ «ទីមួយ ខ្ញុំតែងតែគោរពនិងគាំទ្រសេចក្តីសម្រេចរបស់មហាសន្និបាត និងសន្និបាតរបស់គណបក្សប្រជាជនកម្ពុជា ក្នុងការជ្រើសតាំងសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ជានាយករដ្ឋមន្រ្តីសម្រាប់អាណត្តិនេះ និងអាណត្តិបន្តបន្ទាប់ទៀត។ ទីពីរ ចំពោះការជ្រើសរើសបេក្ខភាពនាយករដ្ឋមន្រ្តី នាពេលអនាគត ខ្ញុំក៏នឹងគោរពតាមការសម្រេចរបស់គណបក្សប្រជាជនកម្ពុជា ដែលមានសម្តេចអគ្គមហាសេនាបតីតេជោហ៊ុន សែនជាប្រធាន»។
ក្រោយការថ្លែងរបស់នាយករដ្ឋមន្រ្តីគាំទ្រកូនប្រុសច្បងរបស់លោក គឺលោក ហ៊ុន ម៉ាណែតឲ្យឈរជាបេក្ខជននាយករដ្ឋមន្រ្តី គេឃើញមានស្ថាប័នជាតិ ក្រសួង ឧបនាយករដ្ឋមន្រ្តី មន្រ្តីជាន់ខ្ពស់ រដ្ឋមន្រ្តីជាដើមបានចេញញត្តិគាំទ្រជាបន្តបន្ទាប់ចំពោះបេក្ខភាពរបស់លោក ហ៊ុន ម៉ាណែត ជានាយករដ្ឋមន្រ្តី។ ញត្តិទាំងនោះ មានភ្ជាប់ឈ្មោះលោក ហ៊ុន ម៉ាណែត ដោយហៅថា ជា«ឯកឧត្តមបណ្ឌិត»។
អ្នកវិភាគសង្គម និងនយោបាយ លោក មាស នី ថ្លែងថា ការបង្ហាញសារគាំទ្ររបស់លោក ស ខេង នាពេលនេះ ជាសារដែលបង្ហាញពីភាពនៅកណ្តាលមួយ។
លោកប្រាប់វីអូអេនៅថ្ងៃពុធថា៖ «វាជាសារមួយដែលបង្ហាញពីភាពនៅកណ្តាលមួយនៅក្នុងចំណោមសមាសភាពនៃគណបក្សប្រជាជន ពិសេសមន្រ្តីជាន់ខ្ពស់របស់គណបក្សប្រជាជន។ ហើយប្រសិនបើសារហ្នឹង បានបង្ហាញឲ្យចំឈ្មោះ ឯកឧត្តម ហ៊ុន ម៉ាណែត តែម្តង បានន័យថា នៅក្នុងគណបក្សហ្នឹង គឺមិនមានប្រជាធិបតេយ្យទេ គឺមានតែគាំទ្រៗទៅទាំងអស់គ្នា»។
កាលពីថ្ងៃចន្ទ នៅក្នុងការបកស្រាយដើម្បីកុំឲ្យមានការលើកឡើងថា កូនប្រុសរបស់លោកនឹងប្រកួតប្រជែងជាមួយអ្នកដឹកនាំជើងចាស់របស់គណបក្សប្រជាជនកម្ពុជា លោកនាយករដ្ឋមន្រ្តី ហ៊ុន សែន អះអាងថា ការប្រកួតប្រជែងរបស់លោក ហ៊ុន ម៉ាណែត សម្រាប់បេក្ខភាពនាយករដ្ឋមន្ត្រី គឺធ្វើឡើងក្នុងចំណោមអ្នកដឹកនាំជំនាន់ក្រោយតែប៉ុណ្ណោះ។ ក្នុងន័យនេះ លោក ហ៊ុន សែន អះអាងថា លោកនឹងបន្តកាន់អំណាចយ៉ាងហោចណាស់ គឺ៨ ទៅ១០ឆ្នាំទៅមុខទៀត ហើយពេលនោះថ្នាក់ដឹកនាំរបស់គណបក្សចាស់ៗ ក៏នឹងលែងមានការប្រកួតប្រជែងគ្នាសម្រាប់បេក្ខភាពនាយករដ្ឋមន្ត្រី។
លោក ហ៊ុន សែន ថ្លែងដូច្នេះនៅពេលមានការអះអាងថា លោក ស ខេង ដែលជាឧបនាយករដ្ឋមន្ត្រី និងជារដ្ឋមន្រ្តីក្រសួងមហាផ្ទៃនិងជាអនុប្រធានគណបក្សប្រជាជនកម្ពុជា នឹងអាចធ្វើជានាយករដ្ឋមន្ត្រី បន្ទាប់ពីលោកនាយករដ្ឋមន្ត្រី ហើយវាអាស្រ័យលើពេលវេលាដែលលោក ហ៊ុន សែន ឈប់ធ្វើជានាយករដ្ឋមន្ត្រី។
លោក ឯម សុវណ្ណារ៉ា អ្នកវិភាគនយោបាយមួយរូប យល់ថា ការចេញសារគាំទ្ររបស់លោក ស ខេង ទោះបីជាមិនមានការបញ្ចេញឈ្មោះលោក ហ៊ុន ម៉ាណែត ចំៗលើលិខិតគាំទ្រក្តី ក៏មិនប្រាសចាកទៅនឹងការសម្រេចគាំទ្ររបស់ប្រធានគណបក្សកាន់អំណាចលោក ហ៊ុន សែន ឡើយ។ លោកបន្ថែមថា ការចេញសារបែបនេះ ជាការបើកចំហសម្រាប់បុគ្គលដែលមានសក្តានុពលក្នុងបក្ស ដែលមានបំណងប្រជែងយកតំណែងនាយករដ្ឋមន្រ្តីសម្រាប់បក្សកាន់អំណាច។
លោកប្រាប់វីអូអេនៅថ្ងៃពុធថា៖ «បើនិយាយទៅ គាត់ចង់ឲ្យតម្លៃស្មារតីរួមរបស់បក្សគាត់ ក្នុងការឯកភាពផ្ទៃក្នុងបក្ស ហ្នឹងទី១។ ទី២ គាត់ លោក ស ខេង គាត់បើកផ្លូវសម្រាប់អ្នកដែលមានសក្តានុពល មិនមែនសម្រាប់តែបុគ្គលណាម្នាក់ដែលជ្រើសតាំងដោយឥស្សរជននយោបាយ ឬដោយប្រធានបក្សទេ… បើកចំហសម្រាប់អ្នកផ្សេងទៀតទៅថ្ងៃក្រោយដែរ ហ្នឹងគឺជាសារនយោបាយមួយដែលគេហៅថា គាត់ [លោក ស ខេង] ចេញ គាត់អាចទទួលបានការគាំទ្រពីសមាជិកបក្សគាត់ផ្សេងដែរ»។
យ៉ាងណាមិញ លោកបញ្ជាក់ថា បើគិតតាមឋានានុក្រមនៃគណបក្សប្រជាជនកម្ពុជា លោក ស ខេង ដែលជាអនុប្រធានគណបក្ស និងជាអ្នកនយោបាយជើងចាស់មួយរូប ជាបុគ្គលដែលមានអាទិភាពជាងគេក្នុងចំណោមបេក្ខជនទាំងអស់សម្រាប់តំណែងនាយករដ្ឋមន្រ្តី។
លោកបន្ថែមថា៖ «ការអនុវត្តអំណាចនៅក្នុងឋានានុក្រមដឹកនាំបែបគណបក្សប្រជាជន ឬគេហៅថា គណបក្សបែបកម្មុយនិស្ត និយាយទៅគាត់មានឬសគល់ជាគណបក្សកម្មុយនិស្ត គណបក្សប្រជាជន។ អ៊ីចឹងឋានានុក្រមទៅតាមឋានានុក្រម ពីប្រធានមកអនុប្រធាន ពីនាយករដ្ឋមន្រ្តីមកឧបនាយករដ្ឋមន្រ្តី។ អ៊ីចឹងបើយើងគិត លោកឧបនាយករដ្ឋមន្រ្តី ស ខេង គាត់ មានអាទិភាពជាងគេ បន្ទាប់ពីបេក្ខជនឧបនាយករដ្ឋមន្រ្តីទាំងអស់ គាត់ [លោក ស ខេង] អាចឈរនៅលំដាប់ទី១ហើយ»។
ប៉ុន្តែកាលពីសប្តាហ៍មុន លោក ហ៊ុន សែន បានថ្លែងថា លោកស ខេង មិនអាចធ្វើជានាយករដ្ឋមន្រ្តីទេ ដោយសារនៅពេលលោក ហ៊ុន សែន ឈប់ធ្វើនាយករដ្ឋមន្រ្តីក្នុងរយៈពេលយ៉ាងតិច៨ ទៅ១០ឆ្នាំទៀត លោក ស ខេង មានវ័យចំណាស់រួចទៅហើយ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថា ការបង្ហោះសាររបស់លោក ស ខេង ជាតំណាងនៃការសម្រេចចិត្តរបស់សមាជិកគណៈកម្មការអចិន្រ្តៃយ៍របស់គណបក្សប្រជាជន។ លោកបន្ថែមថា សារនេះបញ្ជាក់ពីការគាំទ្រនៃការដឹកនាំតាមបែប«សមូហភាព»ក្នុងផ្ទៃក្នុងបក្ស និងដើម្បីបញ្ចៀសពី«ការនិយាយផ្តេសផ្តាស»ពីសំណាក់អ្នកវិភាគមួយចំនួន និងអ្នកផ្សេងទៀត ដែលលោកហៅថា «ជនឧទ្ទាមក្រៅច្បាប់» ក្នុងគោលបំណងបំបែកបំបាក់ផ្ទៃក្នុងរបស់គណបក្សកាន់អំណាច។
លោកប្រាប់វីអូអេថា៖ «សម្តេច ស ខេង លោកជាអនុប្រធានគណបក្ស ហើយក្នុងហ្នឹងលោកជាសមាជិកគណៈកម្មការអចិន្រ្តៃយ៍គណបក្ស អ៊ីចឹងគណៈកម្មការអចិន្រ្តៃយ៍គណបក្សបានចេញសេចក្តីថ្លែងការណ៍គាំទ្រប្រសាសន៍សម្តេចតេជោ ហ៊ុន សែនតាំងពីមួយអាទិត្យមុនហើយ។ ដូច្នេះ មានរឿងអីត្រូវស្រពេចស្រពិល?»
គួរបញ្ជាក់ថា លោក ហ៊ុន ម៉ាណែត អាយុ៤៤ឆ្នាំ ដែលបញ្ចប់ការសិក្សានៅបណ្ឌិត្យសភាយោធាអាមេរិក West Point ត្រូវបានដំឡើងឋានៈជាបន្តបន្ទាប់។ បច្ចុប្បន្ននេះ លោកជាអគ្គមេបញ្ជាការរងកងទ័ព និងជាមេបញ្ជាការកងទ័ពជើងគោក។ លោកត្រូវបានតែងតាំងជាប្រធានចលនាយុវជនថ្នាក់កណ្ដាលរបស់គណបក្សប្រជាជនកម្ពុជា កាលពីខែមិថុនា ឆ្នាំ២០២០៕
