លោកស្រី Amy Klobuchar បានក្លាយជាបេក្ខជនមកពីគណបក្សប្រជាធិបតេយ្យម្នាក់ទៀត ដែលបានសម្រេចចិត្តចូលរួមប្រកួតប្រជែងការបោះឆ្នោតប្រធានាធិបតីអាមេរិក។ លោកស្រីគឺជាសមាជិកព្រឹទ្ធសភាប្រចាំរដ្ឋ Minnesota ម្នាក់ ដែលបានជាប់ឆ្នោតជាលើកទី៣ដោយទទួលបានសំឡេងគាំទ្រភ្លកទឹកភ្លកដីនៅក្នុងការបោះឆ្នោតពាក់កណ្តាលអាណត្តិប្រធានាធិបតីអាមេរិក កាលពីខែវិច្ឆិកាឆ្នាំមុន។
លោកស្រី Klobuchar អាយុ៥៨ឆ្នាំ មានកេរ្តិ៍ឈ្មោះល្បីក្នុងការសម្រេចកិច្ចការអនុម័តសេចក្តីព្រាងច្បាប់ ដោយមិនប្រកាន់បក្ស។ កេរ្តិ៍ឈ្មោះនេះបានធ្វើឲ្យលោកស្រីមានអ្នកគាំទ្រយ៉ាងច្រើននៅរដ្ឋ Minnesota។ កាលពីខែវិច្ឆិកាឆ្នាំមុន លោកស្រីបានជាប់ឆ្នោតជាសមាជិកព្រឹទ្ធសភាម្តងទៀតដោយទទួលបានសំឡេងគាំទ្រ៦០ភាគរយ នៅរដ្ឋ Minnesota។ កាលពីឆ្នាំ២០១៦ លោកប្រធានាធិបតី ដូណាល់ ត្រាំ (Donald Trump) បានចាញ់ការបោះឆ្នោតនៅទីនោះ សម្រាប់ការឈរឈ្មោះជាបេក្ខជនប្រធានាធិបតីរបស់លោក។
ជាមួយគ្នានេះ លោកស្រី Klobuchar ក៏ត្រូវបានទទួលស្គាល់ថា ជាមនុស្សដែលមានអត្តចរិកបើកចំហរ មានហេតុផលត្រឹមត្រូវ និងមានឆន្ទៈក្នុងការផ្តោតការយកចិត្តទុកដាក់លើសេចក្តីព្រាងច្បាប់ដែលឈរនៅកណ្តាល។ អត្តចរិករបស់លោកស្រី មានលក្ខណៈខុសគ្នាពីសមាជិកផ្សេងៗទៀតនៃគណបក្សប្រជាធិបតេយ្យ ដែលចូលចិត្តតតាំង មានទំនោរខ្លាំងលើការកែទម្រង់ និងព្យាយាមប្រជែងដើម្បីគ្រប់គ្រងបក្ស។
នៅព្រឹទ្ធសភាអាមេរិក លោកស្រី Klobuchar បានដឹកនាំកិច្ចខំប្រឹងប្រែងក្នុងការកាត់បន្ថយថ្លៃថ្នាំពេទ្យ ពង្រីកសិទ្ធិបោះឆ្នោតរបស់ពលរដ្ឋ និងការពារឯកជនភាពតាមប្រព័ន្ធអ៊ីនធឺណិត។ លោកស្រីក៏បានជួយជំរុញឲ្យមានការអនុម័តសេចក្តីព្រាងច្បាប់មួយចំនួនដែលពាក់ព័ន្ធនឹងការការពារអ្នកប្រើប្រាស់ផងដែរ។
លោកស្រី Klobuchar បានទទួលការចាប់អារម្មណ៍ពីសាធារណជន ដោយសារតែវិធីសាស្ត្រសួរសំណួររបស់លោកស្រី នៅក្នុងសវនាការសួរដេញដោលលោក Brett Kavanaugh បេក្ខជនតែងតាំងជាចៅក្រមនៃតុលាការកំពូលអាមេរិក ដែលត្រូវបានចោទប្រកាន់ថាបានប្រព្រឹត្តការបំពានផ្លូវភេទ។ លោកស្រី Klobuchar បានសួរលោក Kavanaugh ថា លោកធ្លាប់មិនដឹងថាខ្លួនឯងធ្វើអ្វី នៅពេលស្រវឹងដែរឬទេ។ លោក Kavanaugh បានឆ្លើយទាំងកំហឹងថា «ចុះលោកស្រីវិញ ធ្លាប់ដែរទេ?» លោកស្រី Klobuchar ក៏ឆ្លើយវិញថា «ខ្ញុំមិនដែលមានបញ្ហាជាមួយគ្រឿងស្រវឹងទេ»។ ក្រោយមក លោក Kavanaugh ក៏បានសុំទោសលោកស្រី។
លោកស្រី Klobuchar មានជំនាញច្រើន ដោយសារបទពិសោធន៍ការងារជារដ្ឋអាជ្ញាជាច្រើនឆ្នាំរបស់លោកស្រីនៅរដ្ឋ Minnesota។ លោកស្រីបានធំដឹងក្តីនៅតំបន់ជាយក្រុង Minneapolis ហើយបានបន្តការសិក្សានៅសាកលវិទ្យាល័យ Yale University និងសាកលវិទ្យាល័យ University of Chicago ផ្នែកច្បាប់។ លោកស្រីបានធ្វើការជាមេធាវីឲ្យក្រុមហ៊ុនឯកជននៅទីក្រុង Minneapolis រហូតដល់ពេលដែលលោកស្រីត្រូវបានជាប់ឆ្នោតជាប្រធានរដ្ឋអាជ្ញាប្រចាំស្រុកដែលមានពលរដ្ឋរស់នៅច្រើនជាងគេបង្អស់នៅរដ្ឋ Minnesota។ ឪពុករបស់លោកស្រី គឺជាអ្នកសារព័ត៌មាន ហើយម្តាយរបស់លោកស្រីគឺជាគ្រូបង្រៀនសិស្សបឋមសិក្សា។
លោកស្រីបានជាប់ឆ្នោតជាសមាជិកព្រឹទ្ធសភាលើកដំបូងកាលពីឆ្នាំ២០០៦ ដោយបានក្លាយជាសមាជិកព្រឹទ្ធសភាជាស្ត្រីដំបូងគេបង្អស់ប្រចាំរដ្ឋ Minnesota។ លោកស្រីត្រូវបានជ្រើសតាំងឲ្យជាប់ជាសមាជិកព្រឹទ្ធសភាជាលើកទី២នៅឆ្នាំ២០១២ និងលើកទី៣នៅឆ្នាំ២០១៨កន្លងទៅនេះ។
លោកស្រី Klobuchar គឺជាសមាជិកព្រឹទ្ធសភាទី៥ ដែលបានសម្រេចចិត្តចូលប្រកួតឈរឈ្មោះជាបេក្ខជនប្រធានាធិបតីមកពីគណបក្សប្រជាធិបតេយ្យ។ បេក្ខជន៤នាក់ផ្សេងទៀតរួមមាន លោកស្រី Elizabeth Warren មកពីរដ្ឋ Massachusetts លោកស្រី Kirsten Gillibrand មកពីរដ្ឋ New York លោកស្រី Kamala Harris មកពីរដ្ឋ California និងលោក Cory Booker មកពីរដ្ឋ New Jersey។ លោកស្រី Klobuchar ក៏ជាស្ត្រីទី៥ ដែលចូលប្រកួតឈរឈ្មោះជាបេក្ខជនប្រធានាធិបតីផងដែរ បន្ទាប់ពីលោកស្រី Tulsi Gabbard មកពីរដ្ឋ Hawaii បានសម្រេចចិត្តឈរឈ្មោះកាលពីថ្ងៃសុក្រសប្តាហ៍មុន។
អ្នកជំនាញខាងនយោបាយអាមេរិក ឲ្យដឹងថា បេក្ខជនជិត២០នាក់នៃគណបក្សប្រជាធិបតេយ្យអាចនឹងឈរឈ្មោះជាបេក្ខជនប្រធានាធិបតី។
នៅក្នុងឱកាសប្រកាសបេក្ខជនភាពរបស់លោកស្រីដែលមានមនុស្សកកកុញ លោកស្រី Klobuchar សង្ឃឹមថា ទីកន្លែងកំណើតរបស់លោកស្រីនៅតំបន់ខាងកើតភាគកណ្តាលអាមេរិក ដែលហៅថា Midwest នឹងជួយឲ្យលោកស្រីលេចធ្លោ។ តំបន់ Midwest នេះ អាចដើរតួនាទីដ៏សំខាន់មួយ សម្រាប់ការបោះឆ្នោតប្រធានាធិបតីនៅឆ្នាំ២០២០ខាងមុខនេះ ដោយសារតែតំបន់នេះមានសារៈសំខាន់សម្រាប់ជ័យជម្នះរបស់លោក ត្រាំ មកពីគណបក្សសាធារណរដ្ឋកាលពីឆ្នាំ២០១៦។ ក្នុងរយៈពេលច្រើនទសវត្សមកហើយ ពលរដ្ឋនៅក្នុងតំបន់នេះបានគាំទ្រសមាជិកនៃគណបក្សប្រជាធិបតេយ្យក្នុងការបោះឆ្នោតប្រធានាធិបតី ប៉ុន្តែនៅឆ្នាំ២០១៦ ពលរដ្ឋនៅរដ្ឋ Michigan និងរដ្ឋ Wisconsin នៃតំបន់ Midwest នេះ បានប្តូរទៅបោះឆ្នោតឲ្យបេក្ខជនមកពីគណបក្សសាធារណរដ្ឋ។ ការណ៍នេះបានធ្វើឲ្យបេក្ខជនមកពីគណបក្សប្រជាធិបតេយ្យចាត់ទុករដ្ឋទាំងពីរនេះជាអាទិភាពក្នុងការប្រមូលផ្តុំសំឡេងឆ្នោតគាំទ្រឡើងវិញ៕
ប្រែសម្រួលដោយ ទែន សុខស្រីនិត
