កាលពីថ្ងៃពុធម្ស៉ិលមិញ ប្រជាពលរដ្ឋអាមេរិកាំងរំឭកខួបនៃការវាយប្រហារភេរវកម្មថ្ងៃទី១១ ខែកញ្ញា ឆ្នាំ២០០១ ដែលបានសម្លាប់មនុស្សជិត៣ពាន់នាក់នៅក្នុងទីក្រុងញូវយ៉ក រដ្ឋ Virginia និងរដ្ឋ Pennsylvania។
ប្រធានាធិបតីអាមេរិកលោកដូណាល់ ត្រាំ និងលោកជំទាវ Melania Trump បានដើរនៅខាងក្រៅសេតវិមាន ដើម្បីគោរពវិញ្ញាណខណ្ឌមួយសន្ទុះនៅម៉ោង៨:៤៦នាទីព្រឹក ជាម៉ោង នៅពេលដែលពួកចោរប្លន់យន្តហោះបានបើកយន្តហោះពាណិជ្ជកម្ម២ដំបូងបុកអាគារពាណិជ្ជកម្មពិភពលោកហៅថា World Trade Center នៅក្នុងទីក្រុងញូវយ៉ក។
ក្រោយមក លោកប្រធានាធិបតីត្រាំបានថ្លែងនៅឯពិធីនៅក្រសួងការពារប្រទេសអាមេរិកទៅកាន់សមាជិកក្រុមគ្រួសាររបស់មនុស្ស១៨៤នាក់ ដែលត្រូវបានសម្លាប់នៅពេលដែលពួកភេរវជនអាល់កៃដាបានបើកយន្តហោះដែលប្លន់បានបុកចូលអាគារដែលជាទីបញ្ជាការយោធារបស់សហរដ្ឋអាមេរិក។
លោកប្រធានាធិបតីត្រាំបានមានប្រសាសន៍នៅថ្ងៃនេះកាលពី១៨ឆ្នាំមុនថា «វាជាថ្ងៃដ៏រន្ធត់ តក់ស្លត់ ទុកព្រួយមួយ»។
ក៏ប៉ុន្តែលោកប្រធានាធិបតីត្រាំបានធ្វើការបញ្ជាក់ប្រាប់ក្រុមគ្រួសាររបស់ជនរងគ្រោះថា «យើងនៅទីនេះនៅថ្ងៃនេះដើម្បីបន្តការតាំងចិត្តរបស់យើងថា យើងមិនដែលបំភ្លេចថ្ងៃនេះទេ។ ការវាយប្រហារភេរវកម្មមានគោលបំណងប្រឆាំងរបៀបរស់នៅរបស់យើង ហើយពួកគេ បានស្វះស្វែងកំទិចស្មារតីរបស់យើង។ ក៏ប៉ុន្តែ គោលបំណងរបស់ពួកគេ នឹងមិនបានសម្រេចទេ។ ថ្ងៃនេះធ្វើឲ្យយើងរឹតតែខ្លាំងឡើង តាំងចិត្តកាន់តែខ្លាំងឡើង និងការពារប្រទេសយើងកាន់តែខ្លាំងឡើង»។
នៅទីក្រុងញូវយ៉ក ក្នុងពិធីប្រចាំឆ្នាំនៅឯ Ground Zero មនុស្សបានអានឈ្មោះជនរងគ្រោះទាំងអស់ ដែលត្រូវបានសម្លាប់នៅថ្ងៃដែលឥឡូវនេះត្រូវបានពលរដ្ឋអាមេរិកាំងចងចាំទូទាំងប្រទេស៕
