ក្រោយពីត្រូវបានដោះលែងពីប្រទេសអ៊ីរ៉ង់ ដែលជាផ្នែកមួយនៃការដោះដូរអ្នកទោសនោះ ពលរដ្ឋអាមេរិកាំងមួយក្រុមបានជួបជុំជាមួយក្រុមគ្រួសារនិងអ្នកគាំទ្ររបស់ពួកគេវិញកាលពីថ្ងៃចន្ទ ក្រោយពីសមាជិកគ្រួសារនិងអ្នកគាំទ្រទាំងនោះបានចំណាយពេលរាប់ខែនិងរាប់ឆ្នាំ ដើម្បីតាមដានករណីរបស់ពលរដ្ឋអាមេរិកាំងទាំងនោះ ពីចម្ងាយនិងធ្វើការតស៊ូមតិដើម្បីឲ្យដោះលែងពួកគេនោះ។
អ្នកយកព័ត៌មានឲ្យកាសែតWashington Post លោក Jason Rezaian បានជួបជាមួយនឹងនិពន្ធនាយកជាន់ខ្ពស់នៃកាសែតនោះ នៅឯមន្ទីរពេទ្យក្នុងប្រទេសអាល្លឺម៉ង់ ដែលនៅទីនោះ លោក Rezaian កំពុងសម្រាកព្យាបាលខ្លួន មុនពេលវិលត្រឡប់ចូលសហរដ្ឋអាមេរិកវិញ។
លោក Rezaian មានប្រសាសន៍ថា លោកមានទំនាក់ទំនងជាមួយមនុស្សម្នាតិចតួចណាស់ក្នុងអំឡុងពេលជាប់ពន្ធនាគារអស់រយៈពេល១៨ខែ ដោយរួមទាំងការបង្ខាំងឲ្យនៅក្នុងបន្ទប់តែម្នាក់ឯងរយៈពេល៤៩ថ្ងៃផងដែរ។
លោក Rezaian ត្រូវបានកាត់ទោសពីបទចារកម្ម ដែលទាំងកាសែត Washington Post ទាំងរដ្ឋាភិបាលអាមេរិក សុទ្ធតែចាត់ទុកថាជាការចោទប្រកាន់ដែលមិនសមហេតុផល៕
