រដ្ឋមន្ត្រីការពារជាតិសហរដ្ឋអាមេរិក លោក Lloyd Austin នឹងដឹកនាំកិច្ចប្រជុំជាមួយសមភាគីការពារជាតិរបស់លោកជាច្រើនប្រទេស មកពីរដ្ឋដែលជាសមាជិករបស់អង្គការអូតង់ និងប្រទេសផ្សេងៗទៀតនៅជុំវិញពិភពលោកនៅថ្ងៃពុធនេះ ដើម្បីពិភាក្សាគ្នាទៅលើកិច្ចប្រឹងប្រែងចុងក្រោយបង្អស់ក្នុងការបង្កើនជំនួយយោធាទៅឱ្យប្រទេសអ៊ុយក្រែន នៅចំពោះមុខនៃការឈ្លានពានរបស់រុស្ស៊ីលើអ៊ុយក្រែនដែលមានរយៈពេលជិត៤ខែមកហើយនេះ។
កិច្ចប្រជុំនេះនឹងត្រូវធ្វើឡើងនៅក្រៅជំនួបពិភាក្សាថ្នាក់រដ្ឋមន្ត្រីការពារជាតិរបស់អង្គការអូតង់ នៅទីស្នាក់ការធំរបស់ខ្លួន ក្នុងទីក្រុងព្រុចសែល ប្រទេសបែលហ្ស៊ិក។
កិច្ចប្រជុំតាមប្រព័ន្ធអនឡាញនៃក្រុមទំនាក់ទំនងការពារជាតិសម្រាប់ប្រទេសអ៊ុយក្រែនកាលពីខែមុន មានការចូលរួមពីតំណាងជិត៥០ប្រទេស និងបានសន្យាផ្តល់កញ្ចប់ជំនួយថ្មីមួយចំនួនដល់ប្រទេសអ៊ុយក្រែន។ មន្ត្រីអ៊ុយក្រែនបានបន្តជំរុញដល់ដៃគូអន្តរជាតិឱ្យបញ្ជូនអាវុធបន្ថែមទៀតមកឱ្យខ្លួន ជាពិសេសកាំភ្លើងធំ ដើម្បីជួយឱ្យកងកម្លាំងរបស់ខ្លួនអាចមានអាវុធប្រភេទនេះ ប្រហាក់ប្រហែលនឹងរុស្ស៊ីដែរ។
មន្ត្រីការពារជាតិអាមេរិកមួយរូបបាននិយាយនៅមុនកិច្ចប្រជុំថ្ងៃពុធនេះថា៖ «សំណួរគឺថា តើអ្វីដែលអ៊ុយក្រែនត្រូវការជាចាំបាច់ ដើម្បីបន្តនូវជោគជ័យរបស់ខ្លួន ដែលបានកើតមានក្នុងពេលកន្លងទៅ ក្នុងការពន្យារពេលការរុលទៅមុខនិងទប់ស្កាត់នូវគោលបំណងរបស់រុស្ស៊ី ដែលនេះជាការផ្តោតដ៏សំខាន់របស់ក្រុមរដ្ឋមន្ត្រីការពារជាតិនៃប្រទេសទាំងនោះ»។
អគ្គលេខាធិការអង្គការអូតង់ លោកJens Stoltenberg បានប្រាប់ក្រុមអ្នកសារព័ត៌មានថា ប្រទេសអ៊ុយក្រែន គួរមានអាវុធធន់ធ្ងន់បន្ថែមទៀត។ លោកបន្តទៀតថា កងកម្លាំងអ៊ុយក្រែនពឹងផ្អែកទាំងស្រុងទៅលើអាវុធទាំងនោះ ដើម្បីអាចមានលទ្ធភាពទប់ទល់ប្រឆាំងនឹងការឈ្លានពានដ៏សាហាវព្រៃផ្សៃរបស់រុស្ស៊ីបាន»។
កិច្ចប្រជុំនេះកើតមានឡើង ខណៈពេលដែលកងកម្លាំងរុស្ស៊ីកំពុងរុលទៅមុខ ដើម្បីដណ្តើមគ្រប់គ្រងទាំងស្រុងនូវទីក្រុងឧស្សាហកម្ម Sievierodonetsk ដែលស្ថិតនៅភាគខាងកើតអ៊ុយក្រែន ក្នុងតំបន់ Donbas ដែលរុស្ស៊ីធ្លាប់បានប្រកាសថា ជាកន្លែងដែលខ្លួនត្រូវផ្តោតជាសំខាន់នៅក្នុងប្រតិបត្តិការយោធា នៅក្នុងប្រទេសអ៊ុយក្រែន៕
ព័ត៌មានមួយចំនួននៅក្នុងសេចក្ដីរាយការណ៍នេះត្រូវបានដកស្រង់ពីទីភ្នាក់ងារព័ត៌មាន Reuters ទីភ្នាក់ងារព័ត៌មាន The Associated Press និងទីភ្នាក់ងារព័ត៌មាន Agence France-Presse។
