នាថ្ងៃពុធនេះ នាង ខុម ចាន់ដារាទី ឬ «ស្រីមុំ» ដែលគេចោទថាជាស្រីកំណាន់របស់លោក កឹម សុខាប្រធានស្តីទីនៃគណបក្សជំទាស់បានដាក់ពាក្យស្នើសុំពន្យារការចូលបំភ្លឺ នាតុលាការក្រុងភ្នំពេញ អំពីការ«ផ្តល់សក្ខីកម្មក្លែង និង មានអំពើពេស្យាចារ»។ នេះបើយោងតាមការឲ្យដឹងរបស់មន្ត្រីសិទ្ធិមនុស្ស។
លោក នី សុខា ប្រធានផ្នែកស៊ើបអង្កេតរបស់សមាគមសិទ្ធិមនុស្ស Adhoc ដែលផ្តល់មេធាវីការពារដល់នាងខុម ចាន់ដារាទីឬ ស្រីមុំបានប្រាប់ VOA នាថ្ងៃពុធនេះថា តំណាងរបស់នាង បានដាក់ពាក្យសុំពន្យារការចូលបំភ្លឺនាតុលាការក្រុងនាថ្ងៃសុក្រខាងមុខ ដោយសារតែនាងមិនទាន់ មានមេធាវី លើបញ្ហាដែលអង្គភាពប្រឆំាងភេវរកម្មចោទរូបនាងក្នុងរឿងផ្តល់សក្ខីកម្មក្លែងក្លាយ និងអាចមានអំពើពេស្យាចារ។
«នីតិវិធីសាម៉ីខ្លួនគាត់អាច មានសិទ្ធិក្នុងការដាក់ពាក្យសុំពន្យារ ទៅតុលាការក្នុងការចូលឆ្លើយ ដោយសារតែគាត់ គិតថាគាត់ត្រូវការមេធាវីនៅពេលដែលគាត់ត្រូវចូលឆ្លើយ ត្រូវមានមេធាវី ចូលទៅជាមួយ អីចឹងគាត់ប្រហែលមានការលំបាកក្នុងការចូលឆ្លើយដោយគ្មានមេធាវី អីចឹងគាត់ត្រូវរង់ចាំឲ្យមានមេធាវីសិន»។
កាលពីខែកន្លងទៅ ព្រះរាជអាជ្ញារងនៃសាលាដំបូងរាជធានីភ្នំពេញ គឺលោក សៀង សុខ បានចេញដីកា កោះអញ្ចើញនាងខុម ចាន់ដារាទី ឱ្យចូលបំភ្លឺ នាសាលាដំបូងរាជធានីភ្នំពេញនាថ្ងៃសុក្រខាងមុខ។ លោក សៀង សុខ ក៏បានសរសេរផងដែរថា ការចូលបំភ្លឺនេះគឺ «ដើម្បី សាកសួរពីដំណើររឿង របាយការណ៍របស់សមត្ថកិច្ចនៃនាយកដ្ឋានប្រឆំាងភេវរកម្មនិងឧក្រិដ្ឋកម្មឆ្លងដែន បង្ហាញថាមានករណីផ្តល់សក្ខីកម្មក្លែង និង មានអំពើពេស្យាចារ» នាថ្ងៃសុក្រខាងមុខ។
ការកោះហៅរបស់សាលាដំបូងរាជធានីភ្នំពេញគឺមិនបានប៉ុន្មានថ្ងៃ បន្ទាប់នាយកដ្ឋានប្រឆំាងភេរវកម្មរបស់ក្រសួងមហាផ្ទៃបញ្ចប់សំណុំបែបទរបស់ខ្លួន ទាក់ទិននឹងបណ្តឹងបរិហាកេរិ៍្តរបស់នាងធី សុវណ្ណថា លើខ្សែអាត់សំឡេងសារសងស្នេហា ដែលគេចោទថាជាសំឡេងរបស់ នាងខុម ចាន់ដារាទីនិងលោក កឹម សុខាប្រធានស្តីទីនៃគណបក្សជំទាស់។ យ៉ាងណាក៏ដោយ នាងខុម ចាន់ដារាទីបាន«បានបដិសេធ» ការចោទរបស់នាងធីសុវណ្ណថា រួមទាំងការចោទថាមានទំនាក់ទំនងរវាងនាងនិងលោក កឹម សុខា ពេលដែលនាងបានចូលបំភ្លឺនៅនាយកដ្ឋានប្រឆំាងភេរវកម្ម។
កាលពីថ្ងៃអង្គារកន្លងទៅលោកទួន សុជាតិម្ចាស់ហាងកាត់សក់ខ្មែរអង្គរ ក៏បានចូលបំភ្លឺរឿងករណីនាងខុម ចាន់ដារាទីផងដែរ។ VOAមិនអាចទំនាក់ទំនងមន្ត្រីតុលាការ រួមទាំង លោកព្រះរាជអាជ្ញារង សៀង សុខ ដែលបានចេញដីកាកោះ ដើម្បីសុំសេចក្តីបំភ្លឺលើករណីនេះបានទេ នាថ្ងៃពុធ។
ទាក់ទិននឹងដីកាកោះ របស់សាលាដំបូងរាជធានីភ្នំពេញ លោក នី សុខា ប្រធានផ្នែកស៊ើបអង្កេតរបស់សមាគមសិទ្ធិមនុស្ស Adhocថ្លែងថា៖ «បាទ! ខ្ញុំយល់ថាស្រីមុំគឺជាជនរងគ្រោះម្នាក់នៅក្នុងរឿងហ្នឹងបាទ! ពីព្រោះគោលដៅសំខាន់របស់ក្រុមមួយដែលគាត់កំពុងតែធ្វើហ្នឹងគឺមិនមែនវាយឆ្ពោះមករកស្រីមុំនោះទេ គឺសំដៅទៅរកលោកកឹម សុខាហ្នឹងហើយ។ ហើយអ្វីដែលគេកំពុងតែធ្វើសំដៅទៅរកលោកកឹម សុខាហ្នឹងគឺវាអត់មានអ្វីក្រៅពីធ្វើឲ្យប៉ះពាល់ដល់ប្រជាប្រិយភាពរបស់ លោក កឹម សុខា តែប៉ុណ្ណឹងទេ។ បាទនៅក្នុងសាច់រឿងនេះគឺធ្វើម៉េចឲ្យលោក កឹម សុខា ធា្លក់ប្រជាប្រិយភាព ទាក់ទិនទៅនឹងការរកប្រជាប្រិយ៍ភាពក្នុងពេលបោះឆ្នោតទេ»។
ក្រោយពេលដែលផ្ទុះរឿងខ្សែអាត់សំឡេងឆ្លើយឆ្លងស្នេហានិងប្រកាសបើកការស៊ើបអង្កេតជាបន្តបន្ទាប់នោះ លោកកឹម សុខាប្រធានស្តីទីនៃគណបក្សជំទាស់ឬ គណបក្សសង្គ្រោះជាតិ បានប្រកាសយកជំហរ «មិនឈ្លោះ មិនឆ្លើយ នឹងមិនឆ្លង»។
យ៉ាងណាក៏ដោយនៅក្នុងសារអេឡិកត្រូឡិកមួយដែល VOA បានទទួល លោកស្រី មូ សុខហួរតំណាងរាស្ត្រគណបក្សសង្គ្រោះ ដែលសកម្មក្នុងការការពារសិទ្ធិស្ត្រីខ្មែរ ឲ្យដឹងថាលោកស្រីមានក្តី«តក់ស្លុត» ទាក់ទិននឹង ដីកាកោះលើរូបនាង ខុម ចាន់ដារាទី ឬ ស្រីមុំ លើការរឿង «ផ្តល់សក្ខីកម្មក្លែងក្លាយ និង មានអំពើពេស្យាចារ»។ លោកស្រីក៏បានសរសេរផងដែរថានឹងព្យាយាមគៀងគររកជំនួយដល់នាង ខុម ចាន់ដារាទី រួមទាំងការផ្តល់កម្លាំងចិត្តផងដែរ។
ស្រដៀងគ្នានេះ កាលពីពាក់កណ្តាលឆ្នាំ២០១៣ មិនប៉ុន្មានខែមុនពេលបោះឆ្នោតក្នុងប្រទេសកម្ពុជា ស្ត្រីវ័យកណ្តាលម្នាក់បានចេញមុខអះអាង ថាខ្លួនជាស្រីកំណាន់របស់លោក កឹម សុខា។ ស្ត្រីរូបនោះនិងម្តាយបានចេញមុខធ្វើការ ការតវ៉ា នៅមុខទីស្នាក់ការគណបក្សសង្គ្រោះជាតិនិងដាក់ពាក្យបណ្តឹងដើម្បីឲ្យលោក កឹម សុខា ទទួលខុសត្រូវនិងជួយផ្គត់ផ្គង់ជីវភាពរស់នៅរបស់ពួកគាត់និងកូន។ យ៉ាងណាក៏ដោយការទាមទារ នេះបានស្ងប់ស្ងាត់ទៅវិញ ក្រោយការបោះឆ្នោតបានបញ្ចប់៕
