ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្មេង​ប្រុស​ទាំង​១២នាក់​និង​គ្រូ​បង្វឹក​ត្រូវ​បាន​ជួយ​សង្គ្រោះ​ចេញ​ពី​រូង​ភ្នំ​ដោយ​សុវត្ថិភាព


រូបឯកសារ៖ ក្មេង​ប្រុស​ៗនិងគ្រូបង្វឹក​ពេល​កំពុងជាប់​ក្នុង​រូងភ្នំ Tham Luang ប្រទេស​ថៃ កាលពីថ្ងៃទី៣ ខែកក្កដា ឆ្នាំ២០១៨។ (រូបថតពី​ទំព័រ Thai Navy Seal តាមរយៈ Reuters TV)
រូបឯកសារ៖ ក្មេង​ប្រុស​ៗនិងគ្រូបង្វឹក​ពេល​កំពុងជាប់​ក្នុង​រូងភ្នំ Tham Luang ប្រទេស​ថៃ កាលពីថ្ងៃទី៣ ខែកក្កដា ឆ្នាំ២០១៨។ (រូបថតពី​ទំព័រ Thai Navy Seal តាមរយៈ Reuters TV)

ក្មេង​ប្រុស​ទាំង​១២នាក់និង​គ្រូ​បង្វឹក​បាល់​ទាត់​របស់​ពួក​គេ​ត្រូវ​បាន​ជួយ​សង្គ្រោះ​ចេញ​ពី​រូង​ភ្នំ​ដែល​លិច​ទឹកនៅ​ថ្ងៃ​អង្គារ​នេះ​ បន្ទាប់​ពី​បាន​ជាប់​នៅ​ក្នុង​រូង​ភ្នំ​នោះ​ជាង​២សប្តាហ៍ នេះ​បើ​យោង​តាម​កង​ទ័ព​ជើង​ទឹក​ថៃ។

កង​ទ័ព​ជើង​ទឹក​ថៃ​បាន​បង្ហោះ​សារ​លើ​ទំព័រ​ហ្វេសប៊ុក​របស់​ពួកគេ​ថា៖«កីឡាករ​បាល់ទាត់ក្រុម​ ជ្រូក​ព្រៃ​ ទាំង១២នាក់​និង​គ្រូ​បង្វឹក​របស់​ពួកគេ​ត្រូវ​បាន​ជួយ​សង្គ្រោះ​ចេញ​ពី​រូង​ភ្នំហើយ។ ពួកគេ​ទាំង​អស់​គ្នា​មាន​សុវត្ថិភាព»។

ការ​ជួយ​សង្គ្រោះ​នៅ​ថ្ងៃ​អង្គារ​នេះ​គឺ​ជា​កិច្ច​ខិត​ខំ​ប្រឹងប្រែង​ជួយ​សង្គ្រោះ​ថ្ងៃ​ទី៣​ជាប់ៗគ្នា​ ដើម្បី​ជួយ​សង្គ្រោះ​ក្មេង​ប្រុសៗ​និង​គ្រូ​បង្វឹក​របស់​ពួកគេ ដែល​ជាប់​នៅ​ក្នុង​រូងភ្នំ​ Tham Luang តាំង​ពី​ចុង​ខែ​មិថុនា។ ក្មេង​ប្រុស​៤នាក់​ត្រូវ​បាន​សង្គ្រោះ​កាលពី​ថ្ងៃ​អាទិត្យ ៤នាក់​ត្រូវ​បាន​សង្គ្រោះ​កាលពី​ថ្ងៃ​ច័ន្ទ ហើយ​៤នាក់​ទៀត​និង​គ្រូ​បង្វឹក​របស់​ពួកគេ​ត្រូវ​បាន​ជួយ​សង្គ្រោះ​នៅ​ថ្ងៃ​អង្គារ​នេះ។

រដ្ឋ​មន្ត្រី​ក្រសួង​សុខាភិបាល​ថៃ​លោក Jedsada Chokdumrongsuk ​ប្រាប់​ក្រុម​អ្នក​សារព័ត៌មាន​នៅ​ព្រឹក​ថ្ងៃ​អង្គារ​ថា ក្មេង​ប្រុស​២នាក់​ក្នុង​ចំណោម​នោះ​ឆ្លង​មេរោគ​ចូល​សួត ប៉ុន្តែ​ពួកគេ​ទាំង​អស់​គ្នា​ជាទូទៅ​មាន​សុខភាព​ល្អ​និង​មាន​ស្មារតី​ល្អ អរគុណ​ដល់​ «ប្រព័ន្ធ​ការពារ​ភាពស៊ាំ​ដ៏​រឹង​មាំ» ​របស់​ពួកគេ​ដោយ​សារ​តែ​ការ​លេង​បាល់​ទាត់។

លោក Jesada ថ្លែង​ថា ក្មេង​ប្រុសៗ​ទាំងនោះ​ត្រូវ​ដាក់​ឲ្យ​នៅ​ឃា្លត​ពី​ក្រុម​គ្រួសារ​ ដើម្បី​ទប់​ស្កាត់​កុំ​ឲ្យ​ឆ្លង​មេរោគ​ផ្សេងៗ។ លោក​ថ្លែង​ថា ពួកគេ​ទំនងនឹង​ត្រូវ​ស្នាក់​នៅ​ក្នុង​មន្ទីពេទ្យ​យ៉ាង​ហោចណាស់​មួយ​សប្តាហ៍៕

XS
SM
MD
LG