លោក Peter Greste អ្នកសារព័ត៌មានជនជាតិអូស្រ្តាលីនៃបណ្តាញទូរទស្សន៍ Al Jazeera បាននិយាយនៅថ្ងៃអាទិត្យនេះថា ការសម្រេចដាក់ទោសលោក និងសហការីរបស់លោកកាលពីថ្ងៃសៅរ៍ដោយតុលាការអេហ្ស៊ីបនោះ គឺជាការសម្រេចបម្រើមូលហេតុនយោបាយ។
លោកបាននិយាយថា ឥឡូវនេះ លោក Abdel Fattah el-Sissi ប្រធានាធិបតីប្រទេសអេហ្ស៊ីបមានឱកាសកែប្រែការសម្រេចទោសអយុត្តិធម៌នេះ ហើយត្រូវលើកលែងទោសអ្នកសារព័ត៌មានទាំងបីនាក់នេះ។
តុលាការអេហ្ស៊ីបបានសម្រេចថា អ្នកសារព័ត៌មានទាំងបីនាក់នោះគឺមានលោក Greste និង លោក Mohamed Fahmy ជនជាតិកាណាដា និងលោក Baher Mohamed ជនជាតិអេហ្ស៊ីបមានទោសកំហុសពីបទគាំទ្រក្រុមកាន់សាសនាឥស្លាម គឺ Muslim Brotherhood ដែលជាក្រុមខុសច្បាប់ហើយបានកាត់ទោសអ្នកកាសែតទាំងបីឲ្យជាប់ពន្ធនាគារម្នាក់ៗ៣ឆ្នាំ។
លោក Greste បានវិលត្រឡប់មកប្រទេសអូស្ត្រាលីវិញនៅឆ្នាំនេះ តែសហការីរបស់លោកគឺលោក Mohamed និង Fahmy ត្រូវបានដោះលែងឲ្យនៅក្រៅឃុំនៅប្រទេសអេហ្ស៊ីបដោយមានការធានារហូតដល់ថ្ងៃសៅរ៍ ពេលដែលពួកគេត្រូវនាំខ្លួនទៅឃុំឃាំង៕
