កិច្ចប្រតិបត្តិការមនុស្សធម៌មួយដើម្បីផ្តល់ម្ហូបអាហារ ថ្នាំពេទ្យ និងភួយកំពុងមានធ្វើនៅក្នុងក្រុងបីនៃប្រទេសស៊ីរី ដែលការឡោមព័ទ្ធដោយកងកម្លាំងគាំទ្រខាងរដ្ឋាភិបាលនិងក្រុមយុទ្ធជនឧទ្ទាមបានធ្វើឱ្យប្រជារាស្ត្រស្លាប់ដោយសារទុរភិក្ស។
អ្នកនាំពាក្យម្នាក់នៃអង្គការកាកបាទក្រហមអន្តរជាតិបាននិយាយថា ក្បួនរថយន្តជំនួយសង្គ្រោះបានបើកចូលទៅក្នុងក្រុង Madaya នៅជិតព្រំដែននៃប្រទេសលីបង់ និងចូលទៅក្នុងក្រុង Fuaa និងក្រុង Kafraya ក្នុងខេត្ត Idlib នៅជិតព្រំដែននៃប្រទេសស៊ីរីជាមួយប្រទេសតួកគីកាលពីថ្ងៃច័ន្ទ។
ក្រុមឧទ្ទាមបានត្រួតត្រាក្រុង Madaya ហើយអស់រយៈពេលជាច្រើនខែកងកម្លាំងគាំទ្រខាងរដ្ឋាភិបាលបានរាំងខ្ទប់ក្រុងនេះដែលមានប្រជារាស្ត្រប្រមាណ៤២០០០ពាន់នាក់។ ក្រុង Madaya បានទទួលជំនួយម្ហូបអាហារចុងក្រោយបង្អស់កាលពីខែតុលា។
អ.ស.ប.និងអង្គការ Syrian Observatory for Human Rights បាននិយាយថាមានមនុស្សស្លាប់ដោយសារទុរភិក្ស។ ក្រុមផ្តល់ជំនួយឈ្មោះក្រុមវេជ្ជបណ្ឌិតគ្មានព្រំដែនបានបន្ថែមមនុស្ស៥នាក់ក្នុងបញ្ជីជនរងគ្រោះដែលមានច្រើនឡើងៗកាលពីថ្ងៃអាទិត្យ។
លោក Rami Abdel Rahman ប្រធាននៃអង្គការ Syrian Observatory for Human Rights ដែលមានមូលដ្ឋានក្នុងក្រុងឡុងដ៍ (London) បាននិយាយប្រាប់បណ្តាញផ្សព្វផ្សាយព័ត៌មានអារ៉ាប់ថាឡានដឹកជំនួយចំនួន៤៩គ្រឿងបានបើកទៅកាន់ក្រុង Madaya របស់ក្រុមប្រឆាំង ហើយ២១គ្រឿងទៀតបានបើកទៅកាន់ក្រុង Kafraya និងក្រុង Foua ដែលកាន់កាប់ដោយក្រុមទាហានរដ្ឋាភិបាល៕
