តំបន់ភ្នំនៅក្នុងប៉ែកឦសាននៃប្រទេសភូមាក្នុងតំបន់ត្រីកោណមាសមានព្រៃរបោះជាកន្លែងងាយស្រួលក្នុងការលាក់ម៉ាស៊ីនមួយចំនួនដែលមានរូបរាងដូចរូបយន្ត ក៏ប៉ុន្តែការពិត វាជាម៉ាស៊ីនសម្ពាធរ៉េអាក់ទ័រ ស្លគ្រៀងញៀនមានគ្រឿងអាភៀន។ អាជ្ញាធរឲ្យដឹងថា គ្រឿងញៀនមេតំហ្វេតាមីនចំនួន១៩៣លានគ្រាប់និងគ្រឿងញៀនឯទៀតៗបានត្រូវរឹបអូសនៅក្នុងអ្វីដែលអ.ស.ប.និយាយថាជា ការរឹបអូសគ្រឿងញៀនច្រើនបំផុតក្នុងប្រវត្តិសាស្ត្រនៃទ្វីបអាស៊ី។
គ្រឿងញៀនប្រភេទថ្មីមួយក្នុងតំបន់អាស៊ី
ជនជាតិភូមានិងពួកជនបរទេសឋិតនៅក្នុងចំណោមមនុស្ស៣៣នាក់បានត្រូវចាប់ខ្លួននៅក្នុងការឆ្មក់ឆែកឆេរដែលគេនិយាយថាជាការឆ្មក់ឆែកឆេរមិនធ្លាប់មានពីពេលមុនៗគឺ មិនមែនគ្រាន់បរិមាណគ្រឿងញៀនដែលបានត្រូវរឹបអូសច្រើនប៉ុណ្ណោះទេ ក៏ប៉ុន្តែក៏មានគ្រឿងញៀន Fentanyl ផងដែរ។ ការណ៍នេះហាក់ដូចជាលើកដំបូងហើយដែលពួកមន្ត្រីនៅក្នុងតំបន់នោះរឹបអូសយកបាន fentanyl និងគ្រឿងអាភៀនដែលជាគ្រឿងញៀនមានទាក់ទិននឹងការស្លាប់មនុស្សរាប់សែននាក់នៅក្នុងវិបត្តិគ្រឿងអាភៀនក្នុងផ្នែកខាងជើងនៃទ្វីបអាមេរិក។តំបន់ត្រីកោណមាសនៃប្រទេសភូមាថៃនិងប្រទេសឡាវបានត្រូវស្គាល់ជាប្រវត្តិសាស្ត្រថា ជាកន្លែងប្រជែងនឹងប្រទេសអាហ្វហ្កានីស្ថានសម្រាប់ពាណិជ្ជកម្ម គ្រឿងញៀនហេរ៉ូអ៊ីន ក៏ប៉ុន្តែការរឹបអូសយកបានគ្រឿងញៀនក្នុងខែនេះបង្ហាញថា កន្លែងនេះងាកទៅផលិតគ្រឿងញៀនអាភៀនសំយោគវិញ។
លោកវរសនីយ៍ឯក Zaw Lin ជាប្រធានខាងការពង្រឹងច្បាប់នៃគណៈកម្មាធិការកណ្តាលខាងការគ្រប់គ្រងគ្រឿងញៀននៃប្រទេសភូមា។ លោកបាននិយាយថា លោក«ពេញចិត្ត»នឹងជោគជ័យនៃកិច្ចប្រតិបត្តិការរួមគ្នាជាមួយការិយាល័យអ.ស.ប.ខាងគ្រឿងញៀននិងឧក្រិដ្ឋកម្ម។ ជោគជ័យនេះធ្វើឱ្យប្រទេសក្នុងអាស៊ីអាគ្នេយ៍នេះទទួលបានជ័យជម្នះខាងផ្លូវច្បាប់។ ផ្ទុយទៅវិញប្រសិនបើគ្មានជោគជ័យនេះទេអាចប្រទេសនេះត្រូវបន្ទាបដោយសារមានវិបត្តិច្រើន មានរួមបញ្ចូលបញ្ហាជំងឺកូវីដ១៩ បញ្ហាជនភៀសខ្លួន រ៉ូហ៊ីងយ៉ាកាន់សាសនាឥស្លាម និងការចាប់ពួកអ្នកកាសែតដាក់ពន្ធនាគារជាដើម។
លោកវរសនីយ៍ឯក Zaw Lin ឲ្យដឹងថា មានការងារច្រើនថែមទៀតត្រូវធ្វើ។
លោកបាននិយាយថា៖ «យើងដឹងច្បាស់លាស់អំពីឧបសគ្គដែលយើងប្រឈម។ ពួកឧក្រិដ្ឋជនពួកជួញដូរគ្រឿងញៀននិងពួកឃុបឃិតពុករលួយត្រូវតែនាំខ្លួនទៅឱ្យតុលាការកាត់ទោស។
គ្រឿងញៀនច្រើនប្រភេទ
ពួកយោធានិងពួកប៉ូលិសភូមាបានធ្វើការជាមួយការិយាល័យនេះរបស់អ.ស.ប.អំពីការស៊ើបអង្កេតនេះដែលពួកគេនិយាយថា មានការភ្ជាប់ការទាក់ទងជាមួយពួកឧក្រិដ្ឋជនមានអង្គការចាត់តាំងនិងពួកជីវពលផងដែរ។ នៅវាលស្មៅមួយក្នុងរដ្ឋ Shan ពួកអ្នកពង្រឹងច្បាប់បានដាក់តាំងវត្ថុដែលពួកគេរឹបអូសបាន។ វត្ថុទាំងនេះមាន គ្រីស្ទាល់មេតំហ្វេតាមីន ដាក់បន្លំនៅក្នុងកញ្ចប់តែបៃតង គ្រាប់គ្រឿងញៀនមេតំហ្វេតាមីនដាក់ក្នុងថង់ពណ៌លឿងនិងសារធាតុគីមីក្នុងធុងប្លាស្ទិកពណ៌ខៀវ។
ពួកមន្ត្រីបារម្ភថា ការរកឃើញទាំងនេះដែលរួមមានគ្រឿនញៀន methyl fentanyl ចំនួន៣ពាន់៧រយលីត្រនាំឱ្យគេយល់ថា ទ្វីបអាស៊ីអាចជាកន្លែងមានបញ្ហា គ្រឿងអាភៀនសំយោគរបស់ផងខ្លួនផ្ទាល់។
លោក Jeremy Douglas ជាអ្នកតំណាងសម្រាប់អាស៊ីអាគ្នេយ៍និងតំបន់មហាសមុទ្រប៉ាស៊ីហ្វិក នៅឯការិយាល័យ UNODC។ ថ្លែងអំពីទំហំគ្រឿងញៀនដែលរឹបអូសបាន លោកបាននិយាយថា៖« អ្វីដែលយើងបានរកឃើញតាមរយៈកិច្ចប្រតិបត្តិការនេះជាការពិតដូចដែលបានគិតទុកជាមុន»។
លោកបានថ្លែងថា៖ «យើងបានប្រមើរមើលដំណើររឿងនេះកាលពីពីរបីឆ្នាំមុននេះ ហើយនៅពេលនេះយើងអាចនិយាយបានថា ការណ៍នេះកើតមានមែន»។
អាជ្ញាធររឹបអូសយកបានកាំភ្លើង គ្រឿងឧបករណ៍មន្ទីរពិសោធន៍និងសារធាតុគីមីចំនួន៣៩មុខដែលពួកគេនិយាយថា បានត្រូវដឹកជញ្ជូនកាត់តាមប្រទេសចិន ឥណ្ឌា ថៃ វៀតណាមនិងប្រទេសឡាវ។
ពួកមន្ត្រីទាំងនេះបាននិយាយថា ពួកគេរឹបយកបាន ហេរ៉ូអ៊ីន អាភៀន និងម៉ហ្វីន ។ ពួកគេក៏បានថ្លែងដែរថា ការកោសយកជ័រពីផ្កាអាភៀនដើម្បីផលិតគ្រឿងញៀនទាំងនេះបានចុះថយច្រើនឆ្នាំមកហើយ ហើយការណ៍នេះបាននាំឱ្យគេយល់ថា មានការងាកទៅកាន់ការផលិតគ្រឿងញៀនសំយោគវិញ។
ការិយាល័យ UNODC បាននិយាយនៅក្នុងសេចក្តីប្រកាសព័ត៌មានមួយថាការរកឃើញគ្រាប់គ្រឿងញៀនមេតំហ្វេតាមីនបន្តិចបន្តួចពីដំបូងបាននាំឱ្យមានការចាប់បានគ្រឿងញៀនជាបន្តបន្ទាប់តាំងពីខែកុម្ភៈដល់ខែមេសាដោយរឹបអូសយកបានគ្រឿងញៀនជាច្រើនតោនហើយក៏មានការចាប់ខ្លួនមនុស្សពាក់ព័ន្ធរាប់សិបនាក់ផងដែរ។
លោកវរសេនីយ៍ឯក Zaw Lin បានមានប្រសាសន៍ថា លោកសង្ឃឹមថា ប្រទេសនៅជិតខាងប្រទេសភូមាក៏នឹងចាត់វិធានការមុះមុតដូចគ្នាដែរហើយថាសាររបស់លោកដល់ពួកអ្នកជួញដូរគ្រឿងញៀនគឺថា៖«ការជួញដូររបស់ពួកគេក្នុងប្រទេសភូមាជិតដល់ថ្ងៃបញ្ចប់ហើយ»៕
ប្រែសម្រួលដោយឈឹម សុមេធ
