ព្រះមហាក្សត្រព្រះបាទនរោត្តម សីហមុនី បានប្រោសព្រះរាជទានការលើកលែងទោសលោក អ៊ូ ច័ន្ទឫទ្ធិ តាមសំណើរបស់លោកនាយករដ្ឋមន្ត្រី ហ៊ុន សែន បន្ទាប់ពីលោកបានសសេរលិខិតមួយច្បាប់ ប្រកាសផ្ដាច់ខ្លួននិងស្នើឱ្យលោក ហ៊ុន សែន ធ្វើអន្ដរាគមន៍លើកលែងការចោទប្រកាន់ទាំងអស់នៅតុលាការ។
លោក អ៊ូ ច័ន្ទឫទ្ធិ អតីតតំណាងរាស្រ្ដមណ្ឌលខេត្តកណ្តាលនៃអតីតគណបក្សសង្គ្រោះជាតិ ស្ថិតក្នុងចំណោមថ្នាក់ដឹកនាំអតីតគណបក្សជំទាស់នេះចំនួន ៩រូប ដែលត្រូវបានតុលាការប្រទេសកម្ពុជាកាត់ទោសឱ្យជាប់ពន្ធនាគារម្នាក់ៗ ចាប់ពី ២០ដល់២២ឆ្នាំ កាលពីខែមីនា ឆ្នាំ ២០២១ ពីបទឧបឃាតប្រព្រឹត្តនៅប្រទេសកម្ពុជា កាលពីអំឡុងឆ្នាំ ២០១៩ នៅពេលលោក សម រង្ស៊ី ប្រកាសវិលត្រឡប់ចូលប្រទេសវិញ។
ការប្រោសព្រះរាជទានការលើកលែងទោសលោក អ៊ូ ច័ន្ទឫទ្ធិ ដែលជាអតីតសមាជិកគណៈកម្មាធិការអចិន្ត្រៃយ៍របស់អតីតគណបក្សជំទាស់ផងនោះ និងលោក ទុំ ប៊ុនថន អតីតសមាជិកក្រុមប្រឹក្សានៅរាជធានីភ្នំពេញ ធ្វើឡើងនៅក្នុងព្រះរាជក្រឹត្យដែលឡាយព្រះហស្តលេខាដោយព្រះមហាក្សត្រ ព្រះបាទសម្ដេចព្រះបរមនាថ នរោត្តម សីហមុនី នៅថ្ងៃទី ១ ខែមិថុនា ឆ្នាំ ២០២៣នេះ។
បើតាមលិខិតមួយធ្វើនៅសហរដ្ឋអាមេរិក និងចុះនៅថ្ងៃទី ៣១ ខែឧសភា ឆ្នាំ ២០២៣ លោក អ៊ូ ច័ន្ទឫទ្ធិ បានបញ្ជាក់លោកនាយកមន្ត្រី ហ៊ុន សែន ឱ្យដឹងថា ហេតុផលដែលលោកបានសម្រេចចិត្តផ្តាច់ខ្លួន និងឈប់ធ្វើសកម្មភាពនយោបាយនៅខាងក្រៅប្រទេសជាមួយលោក សម រង្ស៊ី ដោយសារលោកមើលឃើញថា ការផ្តេកផ្តួលទៅលើបរទេសមិនអាចនាំមកនូវការបង្រួបបង្រួមជាតិបាននោះឡើយ។
លោក អ៊ូ ច័ន្ទឫទ្ធិ បានសរសេរថា៖ «ខ្ញុំបាទបានសម្រេចចិត្តផ្តាច់ខ្លួន និងឈប់ធ្វើសកម្មភាពនយោបាយនៅខាងក្រៅប្រទេសជាមួយលោក សម រង្ស៊ី និងក្រុមអតីតគណបក្សសង្គ្រោះជាតិ ដោយសារអស់ជំនឿទៅលើគោលនយោបាយបរទេសនិយម ដែលមិនអាចឈានទៅរកការបង្រួបបង្រួម និងផ្សះផ្សាជាតិបាន»។
ជាមួយគ្នានោះ លោកក៏បានស្នើសុំឱ្យលោក ហ៊ុន សែន ផ្តល់កិច្ចអន្ដរាគមន៍ដើម្បីមានការលើកលែងទោសដើម្បីឱ្យលោកមានសេរីភាពក្នុងការវិលត្រឡប់ទៅប្រទេសកម្ពុជាវិញ។
បើតាមសាលក្រមព្រហ្មទណ្ឌស្ថាពរចុះថ្ងៃទី ១ ខែមីនា ឆ្នាំ២០២១ របស់សាលាដំបូងរាជធានីភ្នំពេញ លោក អ៊ូ ច័ន្ទឫទ្ធិ ត្រូវបានតុលាការសម្រេចផ្តន្ទាទោសដាក់ពន្ធនាគារកំណត់ ២០ឆ្នាំ។
វីអូអេមិនទាន់អាចទាក់ទងលោក អ៊ូ ច័ន្ទឫទ្ធិ ដើម្បីសុំការអត្ថាធិប្បាយបានទេ ទាំងតាមទូរសព្ទ និងប្រព័ន្ធទំនាក់ទំនងសង្គមតេឡេក្រាម គិតចាប់តាំងពីថ្ងៃព្រហស្បតិ៍ មកត្រឹមរសៀលថ្ងៃសុក្រនេះ។
ប្រធានគណបក្សកែទម្រង់កម្ពុជាលោក អ៊ូ ច័ន្ទរ័ត្ន យល់ថា ការប្រកាសរបស់លោក អ៊ូ ច័ន្ទឫទ្ធិ មិនមានបំណងចូលគណបក្សនយោបាយណាមួយឡើយ គ្រាន់តែចង់មានសិទ្ធិអាចចេញចូលប្រទេសកម្ពុជាបានប៉ុណ្ណោះ។ លោកបញ្ជាក់ថា លោកនិងប្អូនប្រុសមិនដែលប្រឆាំងស្លាប់រស់ជាមួយគណបក្ស បុគ្គល ឬក្រុមណាមួយឡើយ ហើយការស្នើសុំលើកលែងទោសជារឿងធម្មតាទៅហើយសម្រាប់អ្នកនយោបាយ។
លោកបន្ថែមថា៖ «កន្លងមកតាមរយៈសកម្មភាពក្តី ជាឆន្ទៈជាចេតនារបស់លោក អ៊ូ ច័ន្ទឫទ្ធិ ក្តី ខ្ញុំក្ដីមិនមែនជាអ្នកទៅប្រឆាំងអីស្លាប់រស់ មានគំនុំគំកួន មិនមានទេ គ្រាន់តែយើងធ្វើដើម្បីប្រយោជន៍ជាតិ»។
អ្នកនាំពាក្យគណបក្សប្រជាជនកម្ពុជាលោក សុខ ឥសាន ប្រាប់វីអូអេនៅថ្ងៃសុក្រនេះថា លោក អ៊ូ ច័ន្ទឫទ្ធិ បានស្នើសុំចូលរួមជីវភាពនយោបាយជាមួយគណបក្សគ្រប់គ្រងប្រទេស ទើបលោកបានទទួលកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន។
លោកបន្ថែមថា គណបក្សប្រឆាំងកំពុងរកកលនឹងដួលស្លាប់ ខណៈមនុស្សជំនិតមួយចំនួនរបស់លោក សម រង្ស៊ី បានប្រកាសផ្ដាច់ខ្លួន និងចុះចូលជាមួយគណបក្សប្រជាជនកម្ពុជា។
លោកថ្លែងថា៖ «ទេ ឥឡូវមិនបាច់និយាយអីទេ ការលើកលែងទោសដោយសារ អ៊ូ ច័ន្ទឫទ្ធិ មកសុំចូលជីវភាពនយោបាយជាមួយគណបក្សប្រជាជនកម្ពុជាហើយ»។
លោកបញ្ជាក់ទៀតថា៖ «ខ្ញុំចង់បញ្ជាក់ថា អ៊ូ ច័ន្ទឫទ្ធិ ជាអ្នកជិតស្និទ្ធបំផុត ហើយជាអ្នកស្មោះត្រង់បំផុតហើយជាមួយទណ្ឌិត សម រង្ស៊ី។ ឥឡូវយក អ៊ូ ច័ន្ទឫទ្ធិ មកទៀត សួរថា តើពួកប្រឆាំងមានអីនិយាយទៀត? អស់ពីខ្លួនហើយឥឡូវនេះ! នៅសល់តែ អេង ឆៃអ៊ាង ហើយនឹងយាយ ហួរ មួយទេ ហើយបើ អេង ឆៃអ៊ាង និងយាយ ហួរ មកទៀត អាហ្នឹងចប់បណ្ដោយ។ អាហ្នឹងងាប់ឈរ មិនមែនងាប់ដេកទេ»។
ការសម្រេចរបស់លោក អ៊ូ ច័ន្ទឫទ្ធិ ក្នុងការផ្ដាច់ខ្លួនពីលោក សម រង្ស៊ី ត្រូវបានគេមើលឃើញថាជាជោគជ័យមួយជំហានទៀតនៃយុទ្ធសាស្ត្រ IF របស់លោកនាយករដ្ឋមន្រ្ដី ហ៊ុន សែន។ យុទ្ធសាស្ត្រ IF ដែលមានន័យថា ការដាក់ឱ្យនៅដាច់ពីគេឯង និងដល់ទីបញ្ចប់នេះធ្លាប់ត្រូវលោកប្រើជាមួយគូប្រជែងនយោបាយផ្សេងទៀតកាលពីពេលកន្លងមក។
កាលពីថ្ងៃទី ២១ ខែតុលា ឆ្នាំ ២០២២ លោក ហ៊ុន សែន បានប្រកាសថា លោកនឹងស្នើសុំព្រះមហាក្សត្រលើកលែងទោសមនុស្សជំនិត និងអ្នកគាំទ្រលោក សម រង្ស៊ី ប្រសិនបើពួកគេសម្រេចចិត្តដើរចេញពីលោក សម រង្ស៊ី ដែលលោកចាត់ទុកថាជាជនក្បត់ជាតិបីជំនាន់នោះ៕
