អតីតរដ្ឋមន្ត្រីក្រសួងយុត្តិធម៌អាមេរិកនិងអ្នកជំនួយការនយោបាយសេតវិមានជាច្រើននាក់របស់អតីតប្រធានាធិបតីអាមេរិកលោក Donald Trump បាននិយាយថា ពួកគេបានប្រាប់លោក Trump ជាច្រើនលើកច្រើនសារថា ការចោទប្រកាន់របស់លោកជុំវិញការលួចបន្លំការបោះឆ្នោតឆ្នាំ២០២០ នោះមិនមានមូលដ្ឋានត្រឹមត្រូវឡើយ ហើយថា លោកបានចាញ់ការបោះឆ្នោតនោះហើយ បើទោះបីជាលោក Trump នៅតែពោលអះអាងថា លោកត្រូវបានគេបោកប្រាស់មិនឱ្យបន្តកាន់កាប់សេតវិមានក្នុងអាណត្តិទី២ទៀតក៏ដោយ។
នៅក្នុងសក្ខីកម្មដែលត្រូវបានផ្តល់តាមរយៈការថតវីដេអូទុកជាមុន ហើយដែលត្រូវបានបញ្ចាំងនៅថ្ងៃចន្ទម្សិលមិញ ដោយគណៈកម្មាធិការរដ្ឋសភាអាមេរិកដែលស៊ើបអង្កេតករណីកុបកម្មថ្ងៃ៦ មករា កាលពីឆ្នាំទៅនោះ លោក Barr បានប្រាប់ក្រុមសមាជិករដ្ឋសភាអាមេរិកថា ការអះអាងជាច្រើនរបស់លោក Trump លើភាពមិនប្រក្រតីនៃការបោះឆ្នោតនោះ «គឺជាការខុសនិងល្ងង់ខ្លៅបំផុត»។
លោក Barr បានរំឭកឡើងវិញនូវកិច្ចប្រជុំមួយក្នុងចំណោមកិច្ចប្រជុំជាច្រើនក្នុងសេតវិមានជាមួយលោក Trump មុនពេលលោកលាលែងចេញពីតំណែងជារដ្ឋមន្ត្រីក្រសួងយុត្តិធម៌អាមេរិកកាលពីចុងឆ្នាំ២០២០ថា៖ «ខ្ញុំបានប្រាប់លោកប្រធានាធិបតីថា ការអះអាងពីការលួចបន្លំការបោះឆ្នោតនោះ គឺជារឿងមិនសមហេតុផលនោះឡើយ»។
លោក Barr រំឭកឡើងវិញថា៖ «លោកប្រធានាធិបតីមានការខឹងសម្បាអំពីរឿងហ្នឹង»។
រហូតមកដល់ពេលនេះ លោក Trump នៅតែគិតថា លោកនៅតែជាអ្នកឈ្នះនៅក្នុងការបោះឆ្នោតប្រធានាធិបតីអាមេរិកកាលពី២ឆ្នាំមុននៅឡើយ ហើយថា គូប្រជែងដែលជាបេក្ខជននៃគណបក្សប្រជាធិបតេយ្យគឺលោក Joe Biden បានក្លាយជាប្រធានាធិបតីតាមរយៈការលួចបន្លំការរាប់សន្លឹកឆ្នោតនៅតាមរដ្ឋជាច្រើន។ បើទោះបីជាយ៉ាងនេះក៏ដោយ ក៏ការរាប់សន្លឹកឆ្នោតឡើងវិញនៅតាមបណ្តារដ្ឋទាំងនោះ បង្ហាញថា លោក Biden បានឈ្នះលោក Trump ដោយប្រកៀកប្រកិតគ្នាហើយភាពមិនប្រក្រតីមួយចំនួនតួចដែលគេបានរកឃើញនោះមិនគ្រប់គ្រាន់ដើម្បីអាចប្រែក្លាយលទ្ធផលបោះឆ្នោតនោះបានឡើយ។
ការស្ទង់មតិជាច្រើនបង្ហាញថា ពួកអ្នកគាំទ្ររបស់លោក Trump ជាច្រើននៅតែបន្តជឿលើការអះអាងខុសរបស់លោក Trump ដែលថា លោកជាអ្នកឈ្នះការបោះឆ្នោតនោះ។
អតីតរដ្ឋមន្ត្រីក្រសួងយុត្តិធម៌អាមេរិកលោក William Barr បាននិយាយថា៖ «ជាការពិត លោកTrumpពិតជាចាញ់ការបោះឆ្នោតនោះមែន។ ពុំមានភ័ស្តុតាងបញ្ជាក់គ្រប់គ្រាន់ណាមួយដែលនឹងអាចកែប្រែលទ្ធផលបោះឆ្នោតនោះបានទេ»។
នៅក្នុងឯកសារឆ្លើយតបទៅនឹងសវនាការរបស់រដ្ឋសភាដែលមានកម្រាស់១២ទំព័រដែលត្រូវបានផ្សព្វផ្សាយកាលពីថ្ងៃចន្ទម្សិលមិញ អតីតប្រធានាធិបតីអាមេរិកលោក Donald Trump នៅតែបន្តអះអាងមិនពិតអំពីការបន្លំការបោះឆ្នោតនោះហើយថា ក្រុមសមាជិកគណបក្សប្រជាធិបតេយ្យ កំពុងប្រើប្រាស់នូវសវនាការនោះដើម្បីបិទបាំងបញ្ហាសេដ្ឋកិច្ចមួយចំនួនដែលប្រទេសអាមេរិកកំពុងតែប្រឈមនៅពេលនេះ៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារព័ត៌មាន AP។
