ក្រុមសកម្មជននិយាយថា កងទ័ពរដ្ឋាភិបាលស៊ីរីបានធ្វើការវាយប្រហារតាមអាកាសយ៉ាងតិចណាស់ក៏១៥លើកដែរនៅថ្ងៃច័ន្ទនេះ ទៅលើក្រុមប្រយុទ្ធរដ្ឋអ៊ីស្លាមនៅក្នុងទីក្រុង Palmyra ។
អង្គការសិទ្ធិមនុស្សSyrian Observatory មានទីតាំងក្នុងប្រទេសអង់គ្លេស ដែលបានឃ្លាំមើលអំពើហិង្សាក្នុងប្រទេសស៊ីរីតាមរយៈបណ្តាញមនុស្សនៅខាងក្នុងប្រទេសបាននិយាយថា ការវាយប្រហារទាំងនេះរួមមានអាគារស៊ើបការណ៍សម្ងាត់យោធា ហើយនិងមន្ទីរពេទ្យផងដែរ។
ក្រុមរដ្ឋអ៊ីស្លាមបានកាន់កាប់ទីក្រុងប្រវត្តិសាស្រ្តនោះកាលពីសប្តាហ៍មុន។
អង្គការសិទ្ធិមនុស្ស Observatory បាននិយាយថា ក្រុមជនសកម្មប្រយុទ្ធបានប្រហារជីវិតមនុស្ស២១៧នាក់ រួមមានកូនក្មេង គិលានុបដ្ឋាយិកា និងកងទ័ពស៊ីរីហើយមនុស្សជាង៦០០នាក់ទៀត ត្រូវបានក្រុមនោះចាប់ធ្វើជាអ្នកទោស។
លោក Rami Abdel Rahman នាយកអង្គការសិទ្ធិមនុស្សObservatory បានប្រាប់ទីភ្នាក់ងារសារព័ត៌មានបារាំង (AFP) ថា មនុស្សខ្លះដែលពួកគេបានប្រហារជីវិត ត្រូវបានកាត់ក្បាល ហើយមនុស្សខ្លះទៀត ត្រូវបានបាញ់ ឬចាក់សម្លាប់។
អង្គការសិទ្ធិមនុស្ស Observatory ប្រាប់ឲ្យដឹងទៀតថា ក្រុមរដ្ឋអ៊ីស្លាមបានចោទប្រកាន់មនុស្សដែលត្រូវបានសម្លាប់ឬចាប់ខ្លួនទាំងនោះថា ជាភ្នាក់ងាររបស់របបស៊ីរី។
បណ្តាញផ្សាយព័ត៌មានរដ្ឋស៊ីរីបាននិយាយថា មនុស្សជាង៤០០នាក់ត្រូវបានសម្លាប់។
បន្ថែមពីមនុស្សដែលស្លាប់ទាំងនោះ វត្តមានរបស់ក្រុមអ្នកប្រយុទ្ធរដ្ឋអ៊ីស្លាមក្នុងទីក្រុង Palmyra បានបង្កើនការភ័យខ្លាចពីជោគវាសនារបស់ទីក្រុងបុរាណអ៊ីស្លាមមានចំណាស់២០០០ឆ្នាំ ដែលមានឈ្មោះជាទីកន្លែងបេតិកភណ្ឌពិភពលោករបស់អង្គការ UNESCO៕
