ការឈ្លោះប្រកែកគ្នាយ៉ាងខ្លាំងនៅសភាសហរដ្ឋអាមេរិកអំពីបញ្ហាថវិកាសហព័ន្ធនៅសប្តាហ៍នេះបានធ្វើឲ្យយុវជនក្មេងៗដែលគ្មានក្រដាសស្នាមត្រឹមត្រូវស្ថិតក្នុងភាពមិនច្បាស់លាស់តាមផ្លូវច្បាប់បន្ទាប់ពីរដ្ឋបាលរបស់ប្រធានាធិបតីដូណាល់ ត្រាំបានបញ្ចប់គោលនយោបាយដែលការពារពួកគេខ្លះកុំឲ្យបញ្ជូនទៅកាន់ប្រទេសខ្លួនវិញ។
នៅពេលដែលពេលកំណត់ចុងក្រោយបង្អស់សម្រាប់ការបិទទ្វារដ្ឋាភិបាលបានខិតចូលកាន់តែជិត ពួកសកម្មជន ភាគច្រើនដែលគ្មានក្រដាសស្នាមរស់នៅស្របច្បាប់ក្នុងសហរដ្ឋអាមេរិកនៅខិតខំជំរុញច្បាប់ដែលនឹងជំនួសជនអន្តោប្រវេសន៍ខុសច្បាប់ដែលចូលក្នុងសហរដ្ឋអាមេរិកនៅជាកូនក្មេងឬ DACA ដែលចាប់តាំងពីឆ្នាំ២០១២មក បានអនុញ្ញាតឲ្យក្មេងជំទង់ៗដែលគ្មានក្រដាសស្នាមជិត៨សែននាក់រស់នៅនិងសិក្សារៀនសូត្រឬធ្វើការងារស្របច្បាប់នៅក្នុងសហរដ្ឋអាមេរិក ទោះជាយ៉ាងនោះក៏ដោយពួកគេមិនអាចចូលសញ្ជាតិបានទេ។ដោយមិនមានការកែប្រែច្បាប់នោះ ពួកគេនឹងស្ថិតនៅដោយគ្មានការពារខាងផ្លូវច្បាប់ ពួកគេជាង១រយនាក់នឹងត្រឡប់ទៅកាន់ឋានៈភាពគ្មានក្រដាសស្នាមជារៀងរាល់ថ្ងៃនៅពេលដែលឯកសារធ្វើការងាររបស់ពួកគេផុតកំណត់។
ជារៀងរាល់សប្តាហ៍ ពួកសកម្មជនចំនួន១៥០នាក់បានគោះទ្វារបស់សមាជិកសភាតំណាងរាស្រ្តនិងសមាជិកព្រឹទ្ធសភាអាមេរិកដោយសង្ឃឹមថានឹងបញ្ចុះបញ្ចូលសមាជិកសភាឲ្យដាក់បញ្ចូលការការពារសម្រាប់យុវជនក្មេងៗដែលគ្មានក្រដាសស្នាមឬដែលហៅជាភាសាអង់គ្លេសថា Dreamers ទៅក្នុងសេចក្តីព្រាងច្បាប់ចំណាយថវិកាដែលត្រូវបានបោះឆ្នោតកាលពីថ្ងៃសុក្រ។
លោក Abigail Zapote ជាអ្នករៀបចំបាតុកម្មនិងជាអនុប្រធានរបស់យុវជនក្មេងៗនៅសម្ព័ន្ធភាពរបស់ពលរដ្ឋ United Latin American Citizens បាននិយាយថា «យើងមិនអាចរង់ចាំតទៅទៀតទេ។ក្រុមគ្រួសាររាប់លាននៅទូទាំងប្រទេសកំពុងបន្តរស់នៅក្នុងការភ័យខ្លាច»៕
