រដ្ឋមន្រ្តីក្រសួងការពារប្រទេសអាមេរិកស្តីទីលោក Pat Shanahan បាននិយាយថា ចិននៅតែជាអាទិភាពកំពូលខាងវិស័យការពារប្រទេសរបស់លោក ក៏ប៉ុន្តែសារនេះអាចគ្មានន័យក្នុងអំឡុងនៃដំណើរបំពេញទស្សនកិច្ចកាលពីពេលថ្មីៗនេះរបស់លោកទៅកាន់តំបន់អាស៊ីនៅពេលដែលការគំរាមកំហែងរបស់អ៊ីរ៉ង់បានលុបលើផែនការរបស់អាមេរិកដើម្បីផ្តោតលើមហាអំណាចផ្សេងៗទៀត។
ថ្លែងទៅកាន់ពួកអ្នកយកព័ត៌មាននៅពេលធ្វើដំណើរទៅកាន់រដ្ឋធានីហ្សាការតានៃប្រទេសឥណ្ឌូនេស៊ីកាលពីថ្ងៃពុធ រដ្ឋមន្រ្តីការពារជាតិសហរដ្ឋអាមេរិកស្តីទីលោក Shanahan បាននិយាយថា ការគំរាមកំហែងក្នុងតំបន់មជ្ឈឹមបូព៌ា និងកូរ៉េខាងជើងនឹងប្រើពេលវេលា ក៏ប៉ុន្តែសហរដ្ឋអាមេរិកលែងមើលឃើញការកើនឡើងនូវអំណាចខាងយោធារបស់ចិនទៀតហើយ។
លោកបាននិយាយនៅក្នុងការឆ្លើយតបទៅនឹងសំណួរពី VOA។ លោកបាននិយាយសំដៅដល់ការផ្លាស់ប្តូររបស់រដ្ឋបាលប្រធានាធិបតីត្រាំពីការប្រឆាំងភេរវកម្មទៅកាន់គោលនយោបាយមួយដែលផ្តោតលើការប្រកួតប្រជែងជាមួយរុស្ស៊ីនិងចិនកាន់តែខ្លាំងឡើងថា «ការអនុវត្តយុទ្ធសាស្រ្តជាតិខាងការពារប្រទេសជាអាទិភាពកំពូលរបស់ខ្ញុំ ហើយចិនជាអាទិភាពនៅក្នុងយុទ្ធសាស្រ្តការពារជាតិ»។
លោករដ្ឋមន្រ្តីការពារប្រទេសអាមេរិកស្តីទីបានចាប់ផ្តើមអ្វីដែលក្រុមមន្រ្តីហៅថា «ដំណើរទស្សនកិច្ចដើម្បីស្តាប់» តំបន់អាស៊ីអាគ្នេយ៍ដែលមានគោលបំណងបញ្ជាក់ឡើងវិញប្រាប់សម្ព័ន្ធមិត្តពីការតាំងចិត្តរបស់សហរដ្ឋអាមេរិកដល់ពួកគេ។ លោករដ្ឋមន្រ្តីការពារប្រទេសអាមេរិកស្តីទីមានគម្រោងធ្វើសុន្ទរកថាដ៏សំខាន់មួយស្តីពីជំហរយោធាសហរដ្ឋអាមេរិកក្នុងតំបន់អាស៊ី ដោយមានការផ្តោតការយកចិត្តទុកដាក់លើប្រទេសចិនក្នុងអំឡុងនៃវេទិកាប្រចាំឆ្នាំខាងវិស័យការពារជាតិ Shangri La នៅក្នុងប្រទេសសិង្ហបូរីនៅចុងសប្តាហ៍នេះ៕
