នៅថ្ងៃដំបូងនៃការចូលកាន់តំណែងជារដ្ឋមន្រ្តីស្តីទីនៃក្រសួងការពារប្រទេសអាមេរិកកាលពីថ្ងៃពុធ លោក Pat Shanahan បានថ្លែងថាប្រទេសចិននឹងក្លាយជាបញ្ហាអាទិភាពកំពូល។
លោកShanahan បានប្រាប់បុគ្គលិកនៅក្នុងកិច្ចប្រជុំនៅឯក្រសួងការពារប្រទេសកាលពីថ្ងៃពុធឲ្យចងចាំពាក្យថា «ចិន ចិន ចិន»។ នេះបើយោងតាមពួកមន្រ្តីដែលសុំមិនបញ្ចេញឈ្មោះ ដោយសារតែពួកគេមិនត្រូវបានអនុញ្ញាតឲ្យពិភាក្សាជាសាធារណៈអំពីកិច្ចការផ្ទៃក្នុង។
មន្រ្តីក្រសួងការពារប្រទេសម្នាក់បាននិយាយថា លោក Shanahanបានបញ្ជាក់ថា លោកនឹងអនុវត្តតាមយុទ្ធសាស្រ្តយោធា ដែលបង្កើតឡើងដោយលោក James Mattis អតីតរដ្ឋមន្រ្តីក្រសួងការពារប្រទេស ជាអ្នកដែលបានគិតថា ប្រទេសចិននិងរុស្ស៊ីគឺជា គូប្រជែងខាងអំណាចយោធាជាមួយនឹងសហរដ្ឋអាមេរិក។
លោក Shanahan បានកាន់តំណែងជំនួសលោក Mattis កាលពីថ្ងៃទី១ខែមករា បន្ទាប់ពីលោក Mattisលាលែងចេញពីតំណែងកាលពីខែមុន ខណៈមិនព្រមព្រៀងជាមួយនឹងលោកប្រធានាធិបតី Donald Trump។
សហរដ្ឋអាមេរិកបានចោទប្រកាន់ប្រទេសចិនពីបទធ្វើចារកម្មយោធានិងសេដ្ឋកិច្ច និងបានរិះគន់គម្រោងហេដ្ឋារចនាសម្ព័ន្ធ និងពាណិជ្ជកម្មរបស់រដ្ឋាភិបាលក្រុងប៉េកាំង ថាជា ទម្រង់នៃការបំភិតបំភ័យផ្នែកសេដ្ឋកិច្ច។
លោក Shanahan មិនដែលមប្រើការងារនៅក្នុងជួរកងកម្លាំងប្រដាប់អាវុធទេ ប៉ុន្តែលោកបានកាន់តំណែងជាអនុរដ្ឋមន្រ្តីការពារប្រទេសចាប់តាំងពីខែកក្កដាឆ្នាំ២០១៧មក។ លោកធ្លាប់ធ្វើការឲ្យក្រុមហ៊ុនផលិតយន្តហោះ Boeingអស់រយៈពេលជាង៣០ឆ្នាំ៕
