ក្រោយមានភាពចម្រូងចម្រាសពាក់ព័ន្ធនឹងការបង្ហោះសាររបស់ក្មេងស្រីម្នាក់ នៅខេត្តត្បូងឃ្មុំ ដែលរិះគន់ថា មានជនជាតិវៀតណាមច្រើនរស់នៅលើទឹកដីកម្ពុជា ក្មេងស្រីម្នាក់នោះត្រូវបានសម្ភាសក្នុងវីដេអូមួយដែលបង្ហោះនៅលើហ្វេសប៊ុករបស់លោក ហ៊ុន សែន អតីតនាយករដ្ឋមន្រ្តី ដោយបានសារភាពទទួលកំហុស។
ក្មេងស្រីម្នាក់នោះក៏បានសុំទោសថ្នាក់ដឹកនាំ និងអាជ្ញាធរថា រាល់ខ្លឹមសារដែលខ្លួនបានបង្ហោះនោះ មិនមែនជាការណ៍ពិត ព្រមទាំងគ្មានប្រភពច្បាស់លាស់។
បើតាមវីដេអូនៃបទសម្ភាសន៍ ក្មេងស្រីដែលប្រើប្រាស់គណនីហ្វេសប៊ុកដាក់ឈ្មោះថា សិរី វឌ្ឍនៈ(Serey Vattanak) នោះ ប៉ុន្តែឈ្មោះពិតគឺ វ៉ែន ស៊ាងឡៃ អាយុ១៧ឆ្នាំ រស់នៅភូមិជីពាំង ឃុំក្រែក ស្រុកពញាក្រែក ខេត្តត្បូងឃ្មុំ។ កញ្ញាបានសារភាពទទួលកំហុសនិងសុំទោសថ្នាក់ដឹកនាំថា៖
«ខ្ញុំឃើញគេបង្ហោះអ៊ីចឹង ខ្ញុំចង់បង្ហោះដែរ ហើយខ្ញុំមានអារម្មណ៍ថា សោកស្តាយដែរ[ព្រោះ] ខ្ញុំគិតថា ជាការណ៍ពិតទាំងដែលខ្ញុំមិនបានឃើញអីផ្ទាល់។ ...ខ្ញុំសុំទោសដល់ថ្នាក់ដឹកនាំ និងអាជ្ញាធរទាំងអស់។ និយាយទៅ ខ្ញុំក៏មានអារម្មណ៍ថាខ្ញុំខុសដែរ បានជាខ្ញុំបានលុបសារសំណេរដែលខ្ញុំសរសេរទាំងអស់ហ្នឹង»។
យុវតីរូបនេះបន្តទៀតថា ការណ៍ដែលកញ្ញាបង្ហោះថាមានគេគំរាមឱ្យលុបសារនោះចេញ និងថាមានគេមកតាមសួរខ្លួនជាច្រើនដងនោះ គឺដោយសារតែកញ្ញាឮអ្នកភូមិគេនិយាយតៗគ្នា បូករួមទាំងការភ័យខ្លាចរបស់ខ្លួនឯងផ្ទាល់តែប៉ុណ្ណោះ។ កញ្ញាបន្ថែមថា មិនមានអ្នកណាមកចាប់ឬក៏គំរាមកំហែងខ្លួនឡើយ។
វីអូអេមិនទាន់អាចសុំការបញ្ជាក់បន្ថែមពីកញ្ញា វ៉ែន ស៊ាងឡៃ បាននៅឡើយទេ។
កាលពីថ្ងៃសៅរ៍ អតីតលោកនាយករដ្ឋមន្រ្តី ហ៊ុន សែន ក៏បានបង្ហោះសារអមដោយវីដេអូនៃបទសម្ភាសន៍រវាងអ្នកសារព័ត៌មានជាមួយក្មេងស្រី និងក្រុមគ្រួសារថា ក្មេងស្រីនោះប្រព្រឹត្តកំហុសដោយអចេតនាអំពីការបង្ហោះខ្លឹមសារនិងរូបភាពគ្មានមូលដ្ឋាន។ លោក ហ៊ុន សែន បន្តថា លោកនិងភរិយារបស់លោកនឹងជួយក្មេងស្រីនោះឱ្យបន្តការរៀនសូត្ររហូតសម្រេចនូវបំណងរបស់នាង។
ជុំវិញករណីរឿងនេះដែរ ស្នងការដ្ឋាននគរបាលខេត្តត្បូងឃ្មុំ កាលពីថ្ងៃសៅរ៍ បានចេញសេចក្តីបំភ្លឺព័ត៌មានដល់សាធារណជនថា ពុំមានការឃាត់ខ្លួនយុវតីឈ្មោះ វ៉ែន ស៊ាងឡៃ នោះទេ។ នគរបាលបញ្ជាក់ទៀតថា ក្មេងស្រីម្នាក់នោះបានបង្ហោះសារដែលមានលក្ខណៈញុះញង់ឱ្យមានការរើសអើងជាតិសាសន៍និង «បំភ្លៃនិយាយអំពីរឿងជនជាតិយួន»។
គួរបញ្ជាក់ថា កាលពីសប្តាហ៍មុន ក្មេងស្រីនោះបានបង្ហោះសារនៅលើហ្វេសប៊ុករបស់កញ្ញាថា៖ «ហេតុអ្វីបានជាជនជាតិវៀតណាមមករស់នៅលើដីខ្មែរច្រើនកុះករ។ គេចូលស្រុកយើងតាមអំពើចិត្ត តែប្រសិនបើខ្មែរយើងចូលស្រុកគេវិញតឹងរឹងខ្លាំងណាស់។ ហេតុអ្វីក៏វៀតណាមសំណាងម៉្លេះ...»។
កញ្ញាសរសេរទៀតថា៖ «សម្លាប់វីរបុរសរបស់ខ្មែរបានយ៉ាងជោគជ័យ ទឹកដីខ្មែរក៏លួចបានសម្រេច មកដល់សម័យឥឡូវនេះ យួនចូលសេរីពេញស្រុកខ្មែរទៀត»។
លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ ប្រាប់វីអូអេថា ប្រសិនបើមានការបំភិតបំភ័យឱ្យមានការភ័យខ្លាចទៅលើការបញ្ចេញមតិរបស់បុគ្គលណាម្នាក់ នោះវាគឺជាការរឹតត្បិតនិងការរំលោភសិទ្ធិសេរីភាពរបស់បុគ្គលនោះ ហើយវាក៏ជាគំរូមិនល្អដែរ។
លោកថ្លែងថា៖ «បើសិនជាករណីក្នុងការបញ្ចេញមតិណាមួយហើយត្រូវទទួលបានការភិតភ័យនិងទទួលបានការគំរាមកំហែងពីបុគ្គលណាមួង អាហ្នឹងវាធ្វើឱ្យប៉ះពាល់ទៅដល់សិទ្ធិរបស់គាត់ ហើយក៏ជះឥទ្ធិពលសម្រាប់អ្នកផ្សេងទៀតដែល ចង់សម្តែងមតិចង់បញ្ចេញមតិចូលរួមក្នុងការកែលម្អសង្គម នាំឱ្យមានការភ័យខ្លាច។ គាត់លែងហ៊ានក្នុងការបញ្ចេញមតិបាទ»។
លោកបន្ថែមទៀតរដ្ឋនិងអាជ្ញាធរត្រូវធានាឱ្យបាននូវសិទ្ធិសេរីភាពនៃការបញ្ចេញមតិរបស់ប្រជាពលរដ្ឋ ស្របតាមរដ្ឋធម្មនុញ្ញ ហើយអ្នកបញ្ចេញមតិទាំងឡាយក៏ត្រូវគោរពនូវក្រមសីលធម៌វិជ្ជាជីវៈផងដែរ៕
