កាសែត New York Times បានរាយការណ៍ក្នុងថ្ងៃសុក្រនេះថា មជ្ឈមណ្ឌលប្រឆាំងជំងឺឆ្លង CDC របស់សហរដ្ឋអាមេរិក បានចេញសេចក្តីអំពាវនាវយ៉ាងទូលំទូលាយឲ្យមានការបើកសាលារៀនឡើងវិញ ដោយស្ថាប័នសុខាភិបាលសាធារណៈកំពូលរបស់អាមេរិកនេះថែមបានផ្សាយឯកសារជំនួយលើគេហទំព័ររបស់ខ្លួនភ្ជាប់នឹងការណែនាំថ្មីកាលពីយប់ថ្ងៃព្រហស្បតិ៍។
ការប្រកាសសេចក្តីណែនាំថ្មីនេះ កើតមានឡើងពីរសប្តាហ៍ក្រោយពីលោកប្រធានាធីបតី ដូណាល់ ត្រាំ បានរិះគន់ការណែនាំមុនរបស់ស្ថាប័ន CDC ដែលថា ការបើកសាលារៀនឡើងវិញ «មានការលំបាកខ្លាំងនិងអស់សោហ៊ុយច្រើន» ហើយដែលបាននាំឲ្យមានការជជែកខ្វែងគំនិតគ្នាច្រើននៅទូទាំងសហរដ្ឋអាមេរិក។
ការណែនាំថ្មីនេះ បានកត់សម្គាល់ពីផលប្រយោជន៍ជាច្រើនដែលមានសម្រាប់ការបញ្ជូនកូនទៅសាលា និងបន្ថូរបន្ថយគ្រោះថ្នាក់ខាងសុខភាពដែលអាចកើតមាននៅពេលបើកសាលារៀនឡើងវិញ៕
