ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

អង្គការ​រៃ​អង្គាស​ប្រាក់​ឲ្យ​កម្ពុជា​ពាក់​ព័ន្ធ​នឹង​រឿង​អាស្រូវ​សូក​ប៉ាន់​ដ៏​ធំ​មួយ​នៅ​អាមេរិក​ដោយ​មិន​ដឹង​ខ្លួន


រូបឯកសារ៖ លោក William "Rick" Singer (មុខគេ) នាយកប្រតិបត្តិនៃមូលនិធិ The Key Worldwide Foundation និងជា​ស្ថាបនិកនៃបណ្តាញឈ្មោះ Edge College & Career Network ដើរចេញពីតុលាការសហព័ន្ធ នៅទីក្រុង Boston កាលពីថ្ងៃទី១២ ខែមីនា ឆ្នាំ២០១៩។

បើ​យោង​តាម​ការ​ស៊ើប​អង្កេត​របស់​រដ្ឋាភិបាល​សហព័ន្ធ​ អង្គការ​រៃអង្គាស​ប្រាក់​ Friends of Cambodia មិនត្រូវបាន​ចោទ​ពីបទព្រហ្មទណ្ឌ​ដែលពាក់ព័ន្ធ​នឹង​រឿង​អាស្រូវ​សូកប៉ាន់​នេះ​ទេ។ ​អង្គការ Friends of Cambodia ក៏​បាន​បញ្ជាក់​ប្រាប់​សារព័ត៌មាន NBC ថា មិនដែលស្គាល់លោក Rick Singer និងមូលនិធិ KWF ទេ។

កាលពី​ដើម​ខែ​មីនា​កន្លង​ទៅ ​នៅ​សហរដ្ឋ​អាមេរិក​មាន​ការ​ភ្ញាក់​ផ្អើល​ដ៏​ធំ​មួយ ដោយសារ​រឿង​អាស្រូវ​ក្លែង​បន្លំ និង​សូក​ប៉ាន់របស់​ក្រុម​គ្រួសារ​ដែល​មាន​ទ្រព្យធន​មួយ​ចំនួន ដើម្បី​ឲ្យ​កូនៗ​របស់​ពួក​គេបានចូលរៀន​ក្នុង​សាកលវិទ្យាល័យ​ល្បី​ឈ្មោះ​នៅ​សហរដ្ឋ​អាមេរិក។

រឿង​អាស្រូវ​ដ៏​ស្មុគស្មាញ​មួយ​នេះ ក៏​មាន​ជាប់ពាក់ព័ន្ធ​នឹង​អង្គការ​រៃ​អង្គាស​ប្រាក់​មួយ ដែល​ជួយ​ប្រាក់​ឧបត្ថម្ភ​ដល់​អង្គការ​នានា​នៅ​កម្ពុជា​ដោយ​មិន​ដឹង​ខ្លួន។ ហើយ​ការណ៍​នេះ​ជំរុញ​ឲ្យ​មាន​ការ​យក​ចិត្ត​ទុក​ដាក់​ឲ្យ​បាន​ម៉ត់ចត់ ​លើ​ប្រាក់​ឧបត្ថម្ភ​បរទេស​ដល់​អង្គការ​ក្រៅ​រដ្ឋាភិបាល​នៅតាមបណ្តាប្រទេសកំពុងអភិវឌ្ឍ ដូចជា​កម្ពុជា។

រឿង​អាស្រូវ​សូក​ប៉ាន់​ដ៏​ធំ​ក្នុង​ប្រវត្តិសាស្ត្រ​អាមេរិក​មួយ​នេះ ត្រូវបាន​ទម្លាយ​ដោយ​មាន​ភស្តុតាង​គ្រប់គ្រាន់​តាមរយៈ​ការ​ស៊ើប​អង្កេត​របស់​ទីភ្នាក់ងារ​ស៊ើបអង្កេត​សហព័ន្ធអាមេរិក ឬ​ហៅថា FBI កាល​ពី​ដើម​ខែ​មីនា​កន្លង​ទៅ ដែល​បាន​ចោទប្រកាន់​បទ​ព្រហ្មទណ្ឌ​លើ​លោក William "Rick" Singer នាយក​ប្រតិបត្តិ​នៃ​មូលនិធិ The Key Worldwide Foundation (KWF)។

រដ្ឋ​អាជ្ញា​ទទួល​បន្ទុក​រឿង​ក្តី​នេះ ​បាន​ចោទ​ប្រកាន់​លោក Rick Singer ថា​បាន​ប្រព្រឹត្ត​អំពើ​ក្លែង​បន្លំ និង​សូក​ប៉ាន់ ជំនួស​ក្រុម​គ្រួសារ​ដែល​មាន​ទ្រព្យធន​ ដើម្បី​ជួយ​កូនៗ​របស់​ក្រុម​គ្រួសារ​ទាំង​នេះ ទទួល​បាន​លក្ខណៈ​សម្បត្តិ​គ្រប់គ្រាន់​ស្រប​តាម​លក្ខខណ្ឌ​របស់​សាកល​វិទ្យាល័យ​ល្បីៗ​ ដែល​អាច​ឲ្យ​ពួកគេ​ចូលរៀន​នៅ​តាម​សាកល​វិទ្យាល័យ​ទាំង​នោះ។

ការ​បក​ស្រាយ​របស់រដ្ឋអាជ្ញា​ បាន​ឲ្យ​ដឹង​ថា ក្រុម​គ្រួសារ​ដែល​មាន​ទ្រព្យធន​បាន​ផ្តល់​ថវិកា​ដល់​មូលនិធិ The Key Worldwide Foundation ដែល​គ្រប់គ្រង​ដោយ​លោក Rick Singer។ លោក Rick Singer បាន​ប្រើប្រាស់​ថវិកា​ទាំង​នេះ​ដើម្បី​សូក​ប៉ាន់​គ្រូ​បង្វឹក​ខាង​កីឡា និង​មន្ត្រី​នៃ​គណៈកម្មាការ​កីឡា​របស់សាកល​វិទ្យាល័យ​ល្បីៗ ដើម្បី​ក្លែង​បន្លំ​ពិន្ទុ​ប្រឡង​ចូល​រៀន​របស់​សិស្ស​ដែល​ជា​កូន​របស់​អ្នក​មាន​ទ្រព្យធន។

លោក Rick Singer ដែល​ជា​ជន​សង្ស័យ​ចម្បង​នៅ​ក្នុង​រឿង​ក្តី​នេះ​ បាន​សម្រេច​យល់​ព្រម​ទទួល​ទោស ហើយ​រឿង​ក្តី​ដ៏​អាស្រូវ​និង​ដែល​មានលក្ខណៈ​ទ្រង់ទ្រាយ​ធំ​មួយ​នេះ កំពុង​តែ​បន្ត​ដំណើរការ​នៅ​តុលាការ​រដ្ឋាភិបាល​សហព័ន្ធ។ ក្រៅ​ពី​លោក Rick Singer បុគ្គល​ចំនួន​ ៥០ នាក់​ផ្សេង​ទៀត កំពុង​ប្រឈម​នឹង​ការ​ចោទ​ប្រកាន់​ពី​បទ​ព្រហ្មទណ្ឌ ដែល​ក្នុង​នោះ​រួម​មាន​តារាហូលីវូដ ក្រុម​គ្រួសារ​ដែល​មាន​ទ្រព្យ​ធន មន្ត្រី​និង​បុគ្គល​មួយ​ចំនួន​ផ្សេង​ទៀត​ ដែល​មក​ពី​ស្ថាប័ន​អប់រំ និង​អង្គការ​ដែល​ត្រូវបាន​ចោទ​ប្រកាន់​ថា​បាន​ទទួល​យក​លុយ​សំណូក​ពី​មូលនិធិ KWF របស់​លោក Rick Singer។

ឯកសារ​ពន្ធដារ​លេខ ៩៩០ របស់​មូលនិធិ KWF សម្រាប់​កាតព្វកិច្ច​បង់​ពន្ធ​ជូន​រដ្ឋ​ក្នុង​ចន្លោះ​ឆ្នាំ ២០១៣ ដល់​ឆ្នាំ ២០១៦ អះអាង​ថា មូលនិធិ​មួយ​នេះ​បាន​ទទួល​ប្រាក់​ឧបត្ថម្ភ​ពី​ក្រុមគ្រួសារ​ដែល​មាន​ទ្រព្យ​ធន ចំនួនជាង ៧លាន​ដុល្លារ ហើយ​ថា មូលនិធិ​របស់​ខ្លួន​បាន​ផ្តល់​ការ​ឧបត្ថម្ភ​ដល់​ស្ថាប័ន​អប់​រំ អង្គការ​ក្រៅ​រដ្ឋាភិបាល និង​អង្គការ​រៃអង្គាស​ប្រាក់​ជា​ច្រើន ក្នុង​ទឹក​ប្រាក់​ចំនួន​ជិត ៥លាន​ដុល្លារ។

ក៏​ប៉ុន្តែ​មក​ទល់​ពេល​នេះ អង្គការ​មិន​យក​ប្រាក់​កម្រៃ​ និង​អង្គការ​រៃ​អង្គាស​ប្រាក់​ជា​ច្រើន បាន​បដិសេធ​ថា​ មិនធ្លាប់បានទទួលប្រាក់ឧបត្ថម្ភ ហើយមិន​មាន​ជាប់​ពាក់ព័ន្ធ​នឹងមូលនិធិ KWF និង​លោក Rick Singer ដូច​ដែលឯកសារ​ពន្ធដារ​របស់​មូលនិធិ​អះអាង​នោះ​ទេ។

នៅ​ក្នុង​ចំណោម​ស្ថាប័ន​អប់រំ និង​អង្គការ​ ដែល​មូលនិធិ KWF បាន​អះអាង​ថា​បាន​ផ្តល់​ប្រាក់​ឧបត្ថម្ភ​ឲ្យ រួមមាន​អង្គការ​រៃ​អង្គាស​ប្រាក់​តូចមួយ​ ដែលផ្តល់ការឧបត្ថម្ភ​ផ្នែក​សិក្សា​អប់រំ​ដល់​កុមារ​នៅ​កម្ពុជា ដែល​មាន​ឈ្មោះ​ថា Friends of Cambodia

អង្គការ​រៃអង្គាស​ប្រាក់​មួយ​នេះ ត្រូវបាន​ផ្តួចផ្តើម​បង្កើត​ឡើង​ដោយ​ប្តី​ប្រពន្ធ​ជនជាតិ​អាមេរិក​ពីរ​រូប គឺ​លោក​ Elia Van Tuyl និង​លោកស្រី Halimah Van Tuyl បន្ទាប់​ពី​លោក Elia បាន​ធ្វើ​ដំណើរ​ទស្សនកិច្ច​មួយ​នៅ​ប្រទេស​កម្ពុជា​ កាលពី​ឆ្នាំ ២០០៥។ អ្នក​ទាំង​ពីរ​បាន​ចូលនិវត្តន៍​ពី​ការងារ​ជា​គ្រូ​បង្រៀន​ និង​អ្នក​វាយតម្លៃ​ទីផ្សារ​អចលទ្រព្យ​ ហើយ​កំពុង​រស់នៅ​ទីក្រុង Palo Alto រដ្ឋ​កាលីហ្វ័រញ៉ា សហរដ្ឋ​អាមេរិក។

ទស្សនាវីដេអូដែលលោក Elia បាន​ផលិត​ បន្ទាប់ពីលោកបានធ្វើដំណើរទស្សនកិច្ចនៅកម្ពុជា អំពីកុមាររើសសំរាមនៅស្ទឹងមានជ័យ និងកិច្ចការរបស់មណ្ឌលកុមារ​ដើម្បី​សុភមង្គល ដែលអង្គការរៃអង្គាសប្រាក់ Friends of Cambodia បានផ្តល់ការឧបត្ថម្ភនាពេលកន្លងមក

ឯកសារ​បង់​ពន្ធដារ​របស់​មូលនិធិ KWF នេះ បាន​អះអាង​ថា អង្គការ​រៃ​អង្គាស​ប្រាក់ Friends of Cambodia បាន​ទទួល​ថវិកា​ឧបត្ថម្ភ​ចំនួន​ពីរ​លើក​ពី​មូលនិធិ KWF ដែល​លើក​ទី១ គឺ​នៅ​ឆ្នាំ​២០១៥ ជាមួយ​នឹង​ទឹកប្រាក់​ចំនួន ១៩,២០០ ដុល្លារ​អាមេរិក និង​លើក​ទី២ នៅ​ឆ្នាំ​២០១៦ ជាមួយ​នឹង​ទឹក​ប្រាក់​ចំនួន ១៨,៥៥០ ដុល្លារ​អាមេរិក។

លោក​ស្រី និង​លោក Van Tuyl បាន​បដិសេធ​ថា មិន​បាន​ទទួល​ប្រាក់​បរិច្ចាគ​ទាំង​នោះ ដូច​ដែល​បាន​ចុះ​នៅ​ក្នុង​ឯកសារ​ពន្ធដារ​លេខ ៩៩០ នោះ​ទេ ហើយ​ថា អ្នក​ទាំង​ពីរ​មិន​ធ្លាប់​ស្គាល់​លោក Rick Singer និង​មូលនិធិ KWF នេះ​ទេ។

លោក Elia Van Tuyl បាន​ថ្លែង​ប្រាប់​អ្នក​សារព័ត៌មាន NBC កាលពី​ពាក់​កណ្តាល​ខែ​មីនា​ នៅ​គេហដ្ឋាន​របស់​លោក ក្នុង​ទីក្រុង Palo Alto ថា៖ «‍យើង​មិន​ធ្លាប់​ទទួល​បាន​ការ​បរិច្ចាគ​ប្រាក់​ទាំង​នេះ​ទេ។ យើង​ច្បាស់​ជា​ដឹង បើ​សិន​ជា​ការ​បរិច្ចាគក្នុង​ទឹកប្រាក់ច្រើនបែប​នេះ​កើត​មាន​មែន ណាមួយ​អង្គការ​យើង​មិន​ធំ​ទេ»។

បើ​យោង​តាម​ការ​ស៊ើប​អង្កេត​របស់​រដ្ឋាភិបាល​សហព័ន្ធ​ អង្គការ​រៃអង្គាស​ប្រាក់​ Friends of Cambodia មិនត្រូវបាន​ចោទ​ពីបទព្រហ្មទណ្ឌ​ដែលពាក់ព័ន្ធ​នឹង​រឿង​អាស្រូវ​សូកប៉ាន់​នេះ​ទេ។

លោក Elia ស្ថាបនិក​នៃ​អង្គការ Friends of Cambodia ក៏​បាន​បញ្ជាក់​ប្រាប់​សារព័ត៌មាន NBC ថា អង្គការ​រៃអង្គាស​ប្រាក់​របស់​លោក ដំណើរការ​ដោយ​ស្រប​ច្បាប់​និង​ត្រឹមត្រូវ។ ជា​ទូទៅ​ អង្គការ​នេះ​ទទួល​ប្រាក់​បរិច្ចាគ​ក្នុង​ចន្លោះ ២៥០ដុល្លារ ទៅ ៥០០ដុល្លារ​ប៉ុណ្ណោះ នេះ​បើ​តាម​ការ​បញ្ជាក់​របស់​លោក Elia ទៅ​កាន់​សារព័ត៌មាន NBC។ ហើយ​ការ​បរិច្ចាគ​ថវិកា​នានា​មក​កាន់​អង្គការ Friends of Cambodia គឺ​ធ្វើ​ឡើង​តាម​រយៈ Give to Asia ដែល​ជា​បណ្តាញ​រៃ​អង្គាស​ប្រាក់​ដ៏​ធំ​បំផុត​ទៅកាន់​តំបន់​អាស៊ី។

ចាប់តាំង​ពី​ឆ្នាំ​២០០៧​មក អង្គការ​រៃ​អង្គាស​ប្រាក់​របស់​លោក Elia និង​លោកស្រី Halimah Van Tuyl បាន​ផ្តល់​ប្រាក់​ឧបត្ថម្ភ និង​សម្ភារៈ​សិក្សា​ដល់​មណ្ឌល​កុមារដើម្បី​សុភមង្គល ឬ​ជា​ភាសា​អង់គ្លេស​ថា Centre for Children's Happiness ដែល​មាន​លោក ម៉ិច សុខា ជា​ស្ថាបនិក​និង​ប្រធាន។ លោក ម៉ិច សុខា បាន​បញ្ជាក់​ប្រាប់​ VOA ថា តាមរយៈ​លោកស្រី​និង​លោក Van Tuyl អង្គការ Friends of Cambodia ពិត​ជា​បាន​ផ្តល់​ការ​ឧបត្ថម្ភ​មក​ដល់​អង្គការ​របស់​លោក​កាលពី​ពេល​កន្លង​ទៅ។

ការ​ក្លែង​បន្លំ​របស់​មូលនិធិ KWF នៅ​ក្នុង​ឯកសារ​ពន្ធដារ ៩៩០ ដោយ​អះអាង​ថា អង្គការ​រៃ​អង្គាស​ប្រាក់ Friends of Cambodia ​ទទួល​បាន​ថវិកា​ឧបត្ថម្ភ​ពី​ខ្លួន​នេះ ក៏​ជំរុញ​ឲ្យ​មាន​ការយក​ចិត្ត​ទុក​ដាក់​បន្ថែម​ទៀត​ពី​អង្គការ​មិន​រក​ប្រាក់​កម្រៃ​នៅ​ក្នុង​ប្រទេស​កំពុង​អភិវឌ្ឍ​ ដូចជា​កម្ពុជា ក្នុង​ការ​ពិនិត្យភាព​ត្រឹមត្រូវ​និង​ស្អាតស្អំ​នៃ​ប្រាក់​ឧបត្ថម្ភ​ពី​បរទេស៕

XS
SM
MD
LG