សេវាគ្រាមានអាសន្នក្នុងក្រុងធំបំផុតនៃប្រទេសអាហ្វ្រិកខាងត្បូងបាននិយាយថា អគ្គិភ័យមួយនៅពេលយប់បានឆេះក្នុងអគារមួយមានប្រាំជាន់ក្នុងក្រុង Johannesburg ដែលកាន់កាប់ដោយក្រុមជនគ្មានលំនៅឋាននិងពួកមនុស្សទៅរស់នៅទីនោះដោយខុសច្បាប់ បណ្តាលឱ្យមនុស្សយ៉ាងតិច៧៣នាក់ស្លាប់ ត្រឹមព្រឹកថ្ងៃព្រហស្បតិ៍នេះ។
មន្ត្រីអាជ្ញាធរមូលដ្ឋានមួយរូបបាននិយាយថា មនុស្សខ្លះរស់នៅក្នុងអគារនោះបានលោតតាមបង្អួចដើម្បីគេចចេញពីអគ្គិភ័យនោះ ហើយប្រហែលបានស្លាប់នៅពេលនោះ។ ជន៧នាក់ក្នុងបណ្តាក្រុមជនរងគ្រោះជាកុមារ ដោយកុមារក្មេងជាងគេមានអាយុតែ១ឆ្នាំ នេះបើតាមអ្នកនាំពាក្យសេវាគ្រាមានអាសន្ន។
ពួកអ្នកឃើញហេតុការណ៍ដោយផ្ទាល់បានថ្លែងថា អាចមានមនុស្សរហូតដល់២០០នាក់រស់នៅក្នុងអគារនោះ។
គេរំពឹងថា ក្រុមអ្នកអ្នកជួយសង្គ្រោះនឹងរកឃើញជនរងគ្រោះថែមទៀតនៅពេលពួកគេរុករកក្នុងអគារនោះ ដែលមានដំណើរការយឺតដោយសារស្ថានភាពនៅក្នុងទីនោះ។ សាកសពមនុស្សរាប់សិបនាក់ត្រូវបានគេតម្រៀបតាមចិញ្ចើមថ្នល់នៅជិតទីនោះ ដោយសាកសពខ្លះបានត្រូវដាក់ក្នុងស្បោងសព ហើយខ្លះទៀតមានគ្របដោយផ្ទាំងក្រណាត់ពណ៌ទឹកប្រាក់និងមានគ្របភួយ។
លោក Robert Mulaudzi អ្នកនាំពាក្យសេវាគ្រាអាសន្ននៃក្រុង Johannesburg បាននិយាយថាមានមនុស្ស៥២នាក់ទៀតបានត្រូវរបួសក្នុងអគ្គិភ័យនោះ ដែលបានកើតមានឡើងនៅម៉ោង១ព្រឹកនៅសង្កាត់ពាណិជ្ជកម្មកណ្តាលក្រុង Johannesburg។
តំបន់នោះសម្បូរអគារដែលត្រូវបោះបង់និងមានការខូចខាត ហើយត្រូវបានចូលកាន់កាប់ដោយមនុស្សដែលស្វះស្វែងរកកន្លែងរស់នៅ។ អាជ្ញាធរក្រុងហៅអគារទាំងនោះថាជា«អគារត្រូវគេប្លន់យក»។
លោក Mulaudzi ថ្លែងថា ចំនួនមនុស្សស្លាប់ទំនងជានឹងកើនច្រើនថែមទៀតហើយសាកសពច្រើនទៀតទំនងជាជាប់គាំងក្នុងអគារនោះ។ លោកបាននិយាយថា អគ្គិភ័យនេះត្រូវបានពន្លត់ក្នុងពេលបីម៉ោង ហើយក្រុមអ្នកពន្លត់អគ្គិភ័យបានទៅដល់តែជាន់បីក្នុងចំណោមជាន់ទាំងប្រាំរបស់អគារនោះនៅត្រឹមពាក់កណ្តាលព្រឹកថ្ងៃព្រហស្បតិ៍នេះ៕
