បទបញ្ញត្តិមួយចំនួនដែលប្រទេសចិនបានស្នើឡើងកាលពីពេលថ្មីៗនេះ ដែលតម្រូវឲ្យបណ្តាក្រុមហ៊ុននានាចុះឈ្មោះអាស័យដ្ឋានអ៊ីនធឺណិត (Internet Domain)របស់ខ្លួនក្នុងស្រុក កំពុងតែក្លាយជាក្តីបារម្ភអំពីការរឹតបន្តឹងការប្រើប្រាស់ប្រព័ន្ធអ៊ីនធឺណិតបន្ថែមទៀតនៅក្នុងប្រទេស។ ចិនគឺជាប្រទេសមួយដែលមានការរឹតត្បិតការប្រើប្រាស់ប្រព័ន្ធអ៊ីនធឺណិតដ៏តឹងរ៉ឹងបំផុតមួយរបស់ពិភពលោករួចទៅហើយ។
ក្រុមអ្នកវិភាគនិយាយថា បទបញ្ញត្តិនេះក៏ធ្វើឲ្យមានការព្រួយបារម្ភអំពីផលប៉ះពាលលើវិស័យជំនួញនិង ការប្រកួតប្រជែងនៅក្នុងទីផ្សារផងដែរ។
ឈ្មោះអាស័យដ្ឋានអ៊ីនធឺណិតផ្តល់ឲ្យអ្នកប្រើប្រាស់អ៊ីនធឺណិតទាំងអស់នូវវិធីសាមញ្ញមួយក្នុងការភ្ជាប់ទៅនឹងគេហទំព័រ។
សម្រាប់គោលបំណងសន្តិសុខនិងសេវាកម្មនានា ឈ្មោះអាស័យដ្ឋានអ៊ីនធឺណិតសម្រាប់គេហទំព័រនៅក្នុងប្រទេសចិនត្រូវបានចុះឈ្មោះនៅបរទេស។ ប៉ុន្តែនេះគឺជាអ្វីដែលអាជ្ញាធរកំពុងតែចង់កែប្រែ។
ក្រសួងឧស្សាហកម្មនិងព័ត៌មានវិទ្យា (MIIT) របស់ចិនបានចេញផ្សាយសេចក្តីព្រាងបទបញ្ញត្តិមួយចំនួនកាលពីខែមីនា ដើម្បីឲ្យសាធារណជនបញ្ចេញមតិ ហើយភ្លាមៗនោះមានប្រតិកម្មប្រឆាំងយ៉ាងរហ័ស ដោយអ្នកខ្លះឆ្ងល់ថា តើបទបញ្ញត្តិទាំងនេះអាចនាំឲ្យឈានទៅដល់ការបង្ខាំងគេហទំព័រដែលមានឈ្មោះអាស័យដ្ឋាននៅបរទេសទាំងស្រុងឬយ៉ាងណា។
កាលបរិច្ឆេទចុងក្រោយបង្អស់សម្រាប់ឲ្យសាធារណជនបញ្ចេញមតិគឺថ្ងៃទី២៥ ខែមេសា ហើយវានៅមិនទាន់ច្បាស់នៅឡើយទេ ថាតើបទបញ្ញត្តិទាំងនេះអាចនឹងត្រូវបានគេអនុម័តឆាប់បំផុតនៅពេលណានៅឡើយទេ៕