ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កម្ពុជា​អាច​បាត់​បង់​ប្រាក់​ប្រមាណ​៦០០លានដុល្លារ​ បើ​​បាត់បង់​ EBA


រូបឯកសារ៖ លោកនាយករដ្ឋមន្ត្រី ហ៊ុន សែន សំណេះសំណាលជាមួយកម្មកររោងចក្រកាត់ដេរ នៅ​រោងចក្រមួយកន្លែង ស្ថិតនៅជាយក្រុងភ្នំពេញ កាលពីថ្ងៃទី៣០ ខែសីហា ឆ្នាំ២០១៧។

ធនាគារ​ពិភពលោក​​បាន​ព្រមាន​ពី​ការ​បាត់​បង់​ប្រាក់​រាប់​រយ​លាន​ដុល្លារ​អាមេរិក​ពី​ការ​កាត់​ផ្តាច់​ការ​អនុគ្រោះពន្ធ​ពី​សហភាព​អឺរ៉ុប EBA។ មន្រ្តី​ផ្លូវការ​របស់​កម្ពុជា​បាន​សម្តែង​ការ​ព្រួយបារម្ភ​ពី​ការ​បាត់​បង់​នេះ ប៉ុន្តែ​បាន​អះអាង​ថា​​ ប្រទេស​ចិន​អាច​នឹង​ជួយ​កម្ពុជា​បាន។

កម្ពុជា​អាច​នឹង​ខាតបង់​ទឹកប្រាក់​យ៉ាង​ហោច​ណាស់​ចន្លោះ​ពី​ ៥០០ លាន​ដុល្លារ​អាមេរិក​ទៅ​ជាង​ ៦០០ លាន​ដុល្លារ​អាមេរិក​ក្នុង​មួយ​ឆ្នាំ ​ប្រសិន​បើ​សហភាព​អឺរ៉ុប​សម្រេច​ព្យួរ​ការ​អនុគ្រោះ​ពន្ធ​ (EBA) ​ដល់កម្ពុជា។ នេះគឺជា​ការ​វាយ​តម្លៃ​របស់​ធនាគារ​ពិភព​លោក​នៅ​ក្នុងពិធី​បង្ហាញ​របាយ​ការណ៍​ជា​ផ្លូវ​ការ​នៅ​ថ្ងៃ​ចន្ទ​នេះ នៅ​រាជធានី​ភ្នំពេញ។

ការ​វាយតម្លៃរបស់​ធានាគារ​ពិភព​លោក ស្រប​ពេល​ដែល​សហភាព​អឺរ៉ុប​កំពុង​ដំណើរ​ការ​ពិនិត្យ​មើល​លទ្ធភាព​ដកហូត​ពន្ធ​អនុគ្រោះ​អ្វីៗ​ទាំងអស់​លើកលែង​តែ​អាវុធ​ដែល​ហៅ​កាត់​ថា EBA ពី​ប្រទេស​កម្ពុជា។

នៅ​ក្នុង​របាយការណ៍​ដែល​មាន​ចំណង​ជើង​ថា​ បច្ចុប្បន្នភាព​សេដ្ឋកិច្ច​កម្ពុជា ចេញ​ផ្សាយ​ថ្ងៃទី៦ ខែឧសភា ឆ្នា ២០១៩នេះ ធនាគារ​ពិភព​លោក​បាន​ឲ្យ​ដឹង​ថា បើសិន​ជា​ប្រព័ន្ធ​នេះ​ត្រូវ​បាន​ដក ការ​នាំចេញ​របស់​កម្ពុជា​ទៅ​កាន់​ទីផ្សារ​អឺរ៉ុប​អាច​នឹង​ធ្លាក់​ចុះ​យ៉ាងតិច​បំផុត​ ៥១៣ លាន​ដុល្លារ​អាមេរិក ហើយ​ខ្ពស់​បំផុត​ត្រឹម ៦៥៤​ លាន​ដុល្លារ​អាមេរិក ក្នុង​នោះ​ការ​នាំ​ចេញ​សម្លៀក​បំពាក់​នឹង​ត្រូវ​ខាតបង់​ប្រមាណ​ ៣២០ លាន​ដុល្លារ​អាមេរិក។

ក្រោយ​ពី​ការ​ព្យួរ EBA នេះ សហភាព​អឺរ៉ុប​ក៏​គ្រោងនឹង​យកពន្ធ​លើ​ទំនិញវាយនភណ្ឌ័​ពី​កម្ពុជា​ រួមមាន​សម្លៀក​បំពាក់​និង​ស្បែកជើង​ជា​ដើម ​ក្នុងអត្រា​ពី ​៦,៥ ​ភាគយ​ ទៅ​ដល់​ ១២ ​ភាគរយ​ ទៅ​តាម​ប្រភេទ​ផលិតផល​កាត់​ដេរ។

លោកស្រី​ នាវ​ ច័ន្ទ​ថា​ណា​ ទេសាភិបាល​រង​ ធនាគារជាតិ​នៃ​កម្ពុជា​ ថ្លែងទៅកាន់​អ្នក​កាសែត​នៅរាជធានី​ភ្នំពេញ​ កាលពីថ្ងៃ​ទី​៦ ខែឧសភា​ ឆ្នាំ​២០១៩។ (ហ៊ុល​ រស្មី​/VOA)
លោកស្រី​ នាវ​ ច័ន្ទ​ថា​ណា​ ទេសាភិបាល​រង​ ធនាគារជាតិ​នៃ​កម្ពុជា​ ថ្លែងទៅកាន់​អ្នក​កាសែត​នៅរាជធានី​ភ្នំពេញ​ កាលពីថ្ងៃ​ទី​៦ ខែឧសភា​ ឆ្នាំ​២០១៩។ (ហ៊ុល​ រស្មី​/VOA)

លោកស្រី នាវ ចន័្ទថាណា​ ទេសាភិបាល​រង​ធនាគារជាតិ​នៃ​កម្ពុជា បាន​ប្រាប់​ក្រុម​អ្នក​កាសែត​ ក្រោយ​ការ​បង្ហាញ​របាយការណ៍​ស្តីពី​បច្ចុប្បន្នភាព​សេដ្ឋកិច្ច​កម្ពុជាថា លោកស្រី​មាន​ក្តី​បារម្ភ​ចំពោះ​ការ​បាត់​បង់​ប្រព័ន្ធ​ឋានៈ​អនុគ្រោះ​ EBA នេះ​ តែ​ថា​ រដ្ឋាភិបាល​បាន​ត្រៀម​រួចរាល់​ក្នុង​ការ​ឆ្លើយតប​ចំពោះ​ផលវិបាក​រួច​រាល់​ហើយ។

«ច៎ា​ គ្រាន់តែ​ជា​ការ​បារម្ភ​ទេ​ ប៉ុន្តែ​រាជរដ្ឋាភិបាល​លោក​បាន​រៀប​ចំ​គម្រោង​ដើម្បី​ទប់​ទល់​នឹង​ បើសិន​ជា​គេមាន​ដក​មែន​ ប៉ុន្តែ​យើង​សង្ឃឹម​ថា​ ប្រហែល​ជា​គេ​ត្រូវការ​ ១៨ ខែ​ ដើម្បី​នឹង​ស្រាវ​ជ្រាវ​ ដើម្បី​នឹង​ធ្វើការ​ចរចា​ ហើយ ​study [សិក្សា] យ៉ាងម៉េច។ យើង​ក៏​ត្រៀម​លក្ខណៈ​ដែរ​ ហើយ​សង្ឃឹមថា​ គេ​ប្រហែលជា​មិន​ដក​ទេ»។

កាលពី​ឆ្នាំ​ ២០១៨​ កម្ពុជា​បាន​នាំចេញ​ផលិតផល​សម្លៀក​បំពាក់ និង​ស្បែកជើង​មានតម្លៃ​ ៩៥០០ លាន​ដុល្លារ​សហរដ្ឋ​អាមេរិក​ទៅ​កាន់​ទៅ​ផ្សារ​ពិភព​លោក​ ក្នុង​នោះ​ មាន​សហរដ្ឋ​អាមេរិក​និង​សហភាព​អឺរ៉ុប។ ដោយឡែក​ទីផ្សារ​អឺរ៉ុប​ បាន​ស្រូប​យក ៣៣​ ភាគរយនៃ​ផលិត​ផល​ទាំង​នោះ។

កាល​ពី​ខែ​កុម្ភៈ​ ​ឆ្នាំ​ ២០១៩ ​កន្លង​ទៅ​នេះ​ គណៈកម្មការ​សហភាព​អឺរ៉ុប​ ប្រកាស​ចាប់​ផ្តើម​ដំណើរការ​ជា​ផ្លូវការ​ ដែល​អាច​នឹង​ឈាន​ទៅ​ដល់​ការ​ព្យួរ​បណ្តោះ​អាសន្ន​នូវ​ឋានៈ​អនុគ្រោះ​ពន្ធ​ពាណិជ្ជកម្ម EBA ​ពី​ប្រទេស​កម្ពុជា​ ​ដោយសារ​តែ​ការ​ធ្លាក់​ចុះ​នៃ​ការ​គោរព​សិទ្ធិ​មនុស្ស​និង​ការ​អនុវត្ត​លទ្ធិ​ប្រជាធិបតេយ្យ​ ជា​ពិសេស​បញ្ហា​ចម្បងៗដែល​ទាក់​ទង​នឹងសិទ្ធិ​ធ្វើ​នយោបាយ​ ​សកម្មភាព​ សង្គម​ស៊ីវិល​ សិទ្ធិ​សហជីព និង​សេរីភាព​សារព័ត៌មាន​ជា​ដើម។

ធនាគារ​ពិភពលោកនេះ​ក៏​បាន​ព្រមាន «ការ​ពឹងផ្អែក​ខ្លាំងក្លា​របស់​កម្ពុជា​ទៅ​លើ​លំហូរ​ទុន​ និង​អ្នក​ទេសចរ​ពី​ប្រទេស​ចិន​ កំណើន​អាច​ថមថយ​ ប្រសិនបើ​មាន​ការ​ថយ​ចុះ​ខ្លាំង​នៃ​សេដ្ឋកិច្ច​របស់​ប្រទេស​ចិន»។

​ទោះជា​យ៉ាង​នេះ​ក្តី ​ធនាគារ​ពិភព​លោក​បាន​បង្ហាញ​ក្នុង​របាយការណ៍​របស់​ខ្លួន​ថា កំណើន​សេដ្ឋកិច្ច​របស់​កម្ពុជា​បាន​ឡើង​ដល់​អត្រា​ ៧,៥ ភាគរយ​ក្នុង​ឆ្នាំ​ ២០១៨​ ដែល​ជា​កំណើន​ខ្ពស់​បួនឆ្នាំ​ជាប់​គ្នា​ បើ​ប្រៀបធៀប​ទៅនឹង​ ៧ ភាគរយ​ ក្នុង​ឆ្នាំ​ ២០១៧៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG