រដ្ឋមន្ត្រីក្រសួងការបរទេសខ្មែរគឺលោក ប្រាក់ សុខុន បានយកវេទិកាពិភពលោកមួយ គឺមហាសន្និបាតអ.ស.ប លើកទី៧២ ដើម្បីវាយបកទៅលើប្រទេសមហាអំណាចមួយចំនួន ដែលបានរិះគន់កម្ពុជាពីបញ្ហាសិទ្ធិមនុស្ស និងប្រជាធិបតេយ្យចុងក្រោយនេះ។
នៅឯកិច្ចប្រជុំមហាសន្និបាតប្រចាំឆ្នាំ ក្នុងបុរីញូវយ៉ក លោក ប្រាក់ សុខុន បានថ្លែងថា ការរិះគន់ពីបញ្ហាសិទ្ធិមនុស្ស និងលទ្ធិប្រជាធិបតេយ្យដែលតម្រង់គោលដៅលើកម្ពុជានេះ គឺឈរលើផលប្រយោជន៍របស់មហាអំណាច ភ្នាក់ងារអ.ស.ប ក៏ដូចជាអង្គការមួយចំនួនតែប៉ុណ្ណោះ។
លោក ប្រាក់ សុខុន បានអះអាងថា ការវាយតម្លៃអំពីស្ថានការណ៍សិទ្ធិមនុស្ស និងប្រជាធិបតេយ្យ គឺប្រែប្រួលទៅតាមការញុះញុងរបស់មហាអំណាចខ្លះ ក៏ដូចជាអង្គការអន្តរជាតិធំៗ ដែលកម្មវិធីរបស់ខ្លួនមិនមានអព្យាក្រឹត្យភាពនយោបាយ។ លោកបានបញ្ជាក់តាមខ្លឹមសារដើមថា៖
«បញ្ហាសិទ្ធិមនុស្ស និងប្រជាធិបតេយ្យត្រូវបានគេលើកឡើង នៅពេលដែលហុចផលប្រយោជន៍ជាក់លាក់ទៅដល់មហាអំណាច និងធ្វើឲ្យមានចលនាប្រែប្រួលតែប៉ុណ្ណោះ»។
រដ្ឋាភិបាលកម្ពុជាបានទទួលរងនូវការរិះគន់ជាអន្តរជាតិយ៉ាងធ្ងន់ធ្ងរ ជាពិសេសសហរដ្ឋអាមេរិក ក្រោយពេលដែលមានការធ្វើទុក្ខបុកម្នេញផ្នែកនយោបាយ បិទសារព័ត៌មាន និងអង្គការសង្គមស៊ីវិលឯករាជ្យ មុនការបោះឆ្នោតជាតិឆ្នាំ២០១៨ខាងមុខ ជាពិសេសការចាប់ខ្លួនលោក កឹម សុខា មេដឹកនាំក្រុមជំទាស់ពី«បទក្បត់ជាតិ» ហើយចោទប្រកាន់ស.រ.អា ថានៅពីក្រោយមេដឹកនាំក្រុមប្រឆាំង ដើម្បីផ្តួលរំលំរដ្ឋាភិបាលកម្ពុជារបស់លោកនាយករដ្ឋមន្ត្រី ហ៊ុន សែន ដែលកាន់អំណាចជាង៣០ឆ្នាំនោះ។
តែនៅឯមហាសន្និបាតអ.ស.ប ក្រោមប្រធានបទ«ផ្តោតលើការយកចិត្តទុកដាក់លើប្រជាពលរដ្ឋ គឺការព្យាយាមធ្វើឲ្យមានសន្តិភាព និងជីវភាពគ្រប់គ្រាន់សម្រាប់មនុស្សគ្រប់រូបនៅលើផែនដីប្រកបដោយនិរន្តរភាព»នោះ លោករដ្ឋមន្ត្រីការបរទេស ប្រាក់ សុខុន បានការពាររដ្ឋាភិបាលរបស់លោក និងស្វះស្វែងរកការជឿជាក់ពីអ.ស.ប និងមហាសន្និបាតអ.ស.ប ចំពោះស្ថានការណ៍នយោបាយ សិទ្ធិមនុស្ស និងប្រជាធិបតេយ្យកម្ពុជា។
លោកបានធ្វើការរិះគន់ក្រុមប្រឆាំងថា បានធ្វើការអុចអាលពលរដ្ឋឲ្យដកបង្គោលព្រំដែនជាមួយប្រទេសជិតខាង បញ្ឆេះកំហឹងពលរដ្ឋឲ្យមានការរើសអើងជាតិសាសន៍ ការប្រើផ្សព្វផ្សាយសន្ធិសញ្ញានិងផែនទីក្លែងក្លាយ។
អ្នកតំណាងកម្ពុជា ដែលរិះគន់អ្នករាយការណ៍ពិសេសអ.ស.ប ផ្នែកសិទ្ធិមនុស្សផងនោះ បានដាក់សំណួរថា តើប្រទេសណាគាំទ្រទង្វើដូច្នេះ នៅជិតចុងបញ្ចប់នៃសន្ទរកថារបស់លោក ក្នុងនាមជាអ្នកតំណាងកម្ពុជា នៅក្នុងកិច្ចប្រជុំមហាសន្និបាតអ.ស.ប ដែលមានប្រទេសយ៉ាងតិច១៩៣ ចូលរួមនេះ។
រដ្ឋមន្រ្តីការបរទេសកម្ពុជាក៏បានជួបប្រជុំ ហើយគ្រោងនឹងជួបជាមួយដៃគូសំខាន់ជាច្រើន រាប់ទាំងតំណាងប្រទេសនានា និងអ.ស.ប ផងដែរ ចាប់ពីថ្ងៃទី១៩ ខែកញ្ញា ដល់ថ្ងៃទី២៥ ខែកញ្ញនោះ៕
