ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មេ​ដឹកនាំ​ខ្មែរ​និង​លាវ​ព្រមព្រៀង​ធ្វើ​ឯកសារ​ស្នើ​ឱ្យ​បារំាង​ជួយ​ដោះ​ស្រាយ​បញ្ហា​ព្រំដែន


រូបឯកសារ៖ លោក​នាយក​រដ្ឋមន្រ្តី ហ៊ុន សែន (ឆ្វេង) និយាយ​អំពី​ទស្សនៈ​វិស័យ​របស់​លោក​នៅក្នុង​វេទិកា​ពិភពលោក​ស្តីពី​អាស៊ាន លោក​នាយក​រដ្ឋមន្រ្តី​ឡាវThongloun Sisoulith (កណ្តាល) និង​លោកស្រី Aung San Suu Kyi (ស្តាំ) នៅ​ឯ​ វេទិកា​សេដ្ឋកិច្ច​ពិភពលោក​ស្តីពី​អាស៊ាន។

លោក​ហ៊ុន សែន​ និង​ក្រុម​មេ​ដឹកនាំ​ប្រទេស​លាវ​បាន​ព្រមព្រៀង​គ្នា​បន្ត​ស្វែង​រក​ដំណោះ​ស្រាយ​បញ្ចប់​បញ្ហា​ព្រំដែន​ដែល​នៅ​សេសសល់ដោយ​ស្នើ​ឲ្យ​បារំាង​ផ្ញើ​ឯកសារ​ព្រំដែន​និង​ផែន​ទី​​រវាង​ប្រទេស​ទាំង​ពីរ​​ដើម្បី​សម្រួល​ដល់​ការ​ដោះ​ស្រាយ​បញ្ចប់​ការ​ខ្វែងគំនិត​គ្នា​​លើការ​កំណត់​ខណ្ឌសីមា​ប្រទេស​​ទាំង​ពីរ​នេះ។

មេដឹកនាំ​ខ្មែរ​លាវបាន​ឯកភាព​គ្នា​ក្នុង​ការ​រៀបចំ​ឯកសារ​ពាក់​ព័ន្ធ​នឹង​បញ្ហា​ព្រំដែន​និង​ត្រៀម​ស្នើ​ឲ្យ​ប្រទេស​បារាំង​ដែល​ធ្លាប់​ដាក់​អាណានិគម​ក្នុង​តំបន់​ឥណ្ឌូ​ចិន​ប្រគល់​ផែន​ទី​ពាក់​ព័ន្ធ​នឹង​ព្រំដែន​ខ្មែរ​លាវ​មកវិញ ដើម្បីបើក​ផ្លូវ​ឲ្យ​ប្រទេសទាំង​ពីរ​អាច​បញ្ចប់​ការ​ដោះ​ស្រាយ​បញ្ហា​ព្រំដែន​ដែល​មិនទាន់ត្រូវ​បាន​ដោះ​ស្រាយ​រួច​រាល់។​ ​នេះបើ​យោង​តាម​ព័ត៌មាន​សង្ខេប​ដែល​បាន​បង្ហោះ​លើ​ទំព័រ​ហ្វេសប៊ុក​របស់​លោក​នាយក​រដ្ឋ​មន្ត្រី​ហ៊ុន សែន។​

លោក​ហ៊ុន សែន​ និង​ក្រុម​មន្ត្រី​សំខាន់ៗ​របស់​លោក​បាន​ទៅ​បំពេញ​ទស្សន​កិច្ច​នៅ​ប្រទេស​លាវថ្ងៃ​ទី​៥​និង​ទី៦​ខែ​ធ្នូ​ មុន​នឹង​បន្ត​ដំណើរ​ទៅ​បំពេញ​ទស្សន​កិច្ច​នៅ​ប្រទេស​វៀតណាម​ ជាទី​ដែល​លោក​ហ៊ុន សែន គ្រោង​ជួប​ក្រុម​មេ​ដឹកនាំ​ប្រទេស​វៀតណាម​ និង​ដាក់​កម្រង​ផ្កា​នៅ​ទី​តម្កល់​សព​របស់​អតីត​មេ​ដឹកនាំ​ប្រទេស​វៀតណាម​ លោក​ហូ ជីមីញ។​

ក្នុង​ទស្សន​កិច្ច​នៅ​ប្រទេស​លាវ​ ​លោក​នាយក​រដ្ឋ​មន្ត្រី​ហ៊ុន សែន​ ដែល​ត្រូវ​បាន​លើក​បន្តុប​ឲ្យ​ឡើង​កាន់​អំណាច​ដោយ​វៀត​ណាម​ បាន​ចូល​ជួប​ពិភាក្សា​ជាមួយ​ក្រុម​មេ​ដឹក​នាំ​ប្រទេស​លាវ​ ក្នុង​នោះ​មាន​ប្រធានាធិបតី ​និង​នាយក​រដ្ឋមន្ត្រី​របស់​លាវ។ ​ក្នុង​ជំនួប​ជាមួយ​ប្រធានាធិបតី​លាវ​លោក​ ប៊ុនញ៉ាំង​ វរជីត​ (Bounnhang Vorachith) ​លោក​ហ៊ុន សែន បាន​ឯកភាព​គ្នា​ជាមួយ​លោក​ប៊ុញ៉ាំង​ វរជីត ជាច្រើន​លើ​បញ្ហា​ព្រំដែន​ ដែល​រួមមាន​ការ​ស្នើសុំ​ឯកសារ​ព្រំដែន​ និង​ផែនទី​ពី​ប្រទេស​បារាំងដើម្បីដោះ​ស្រាយ​បញ្ហា​ព្រំដែន​ដែល​នៅ​សេស​សល់។​

ទំព័រ​ហ្វេសប៊ុក​របស់​លោក​ហ៊ុន សែន ​បាន​បញ្ជាក់​ឲ្យ​ដឹង​ក្នុង​ន័យ​ដើម​ថា៖​

«យើង​បាន​ឯកភាព​រួមគ្នា​នឹង​ដោះ​ស្រាយ​បញ្ហា​ព្រំដែន​ក្នុង​កម្រិតបច្ចេកទេស​ដើម្បី​រៀប​ចំ​ឯកសារ​ផ្ញើ​ទៅ​ប្រទេស​បារាំង​ក្នុង​ពេល​វេលា​ដ៏ឆាប់ៗ។ ​ជា​មួយគ្នា​នេះ​ផង​ដែរ​ ​រដ្ឋ​មន្ត្រី​ការ​បរទេស​នៃ​ប្រទេស​ទាំងពីរ​នឹង​ធ្វើការ​ជាមួយ​គ្នា​ទៅ​លើ​ការ​រៀបចំ​ឯកសារ​ ផែនទី​ដែលមាន​មាត្រ​ដ្ឋាន​កម្រិត១/១០០​ពាន់​មក​ជាមាត្រ​ដ្ឋាន​ UTM​១/៥០​ពាន់​វិញ។ ​យើង​នឹង​ស្នើ​ឲ្យ​បារាំង​ផ្តល់​ឯកសារ​និង​ផែនទី​ពាក់ព័ន្ធរវាង​ព្រំដែន​កម្ពុជា​និង​ឡាវ​មក​ឲ្យ​យើង​វិញ»។​

លោក​ហ៊ុន សែន បាន​លើក​ឡើង​ថា ​នៅ​មាន​សេសសល់​ប្រមាណ​១៤%​ ​ទៀត​នៃ​បញ្ហាព្រំដែន​ ដែល​ត្រូវ​ដោះស្រាយ​បញ្ចប់​ ជាពិសេស​នៅ​ក្នុង​តំបន់​អូតាង៉ាវ​ដែល​ ប្រទេស​ទាំងពីរ​នៅ​មិន​ទាន់​ដោះ​ស្រាយ​នៅ​ឡើយ។ ​លោក​ហ៊ុន សែន ក៏​បាន​ឲ្យ​ដឹង​ពី​បំណង​របស់​លោក​ក្នុង​ការ​ចង់​ប្រែ​ក្លាយ​តំបន់​ព្រំដែន​ទាំង​អស់​នៅ​ជាប់​ប្រទេសកម្ពុជា​ក្លាយ​ទៅ​ជាព្រំ​ដែន​សន្តិភាព​ មិត្តភាព​ និង​សហ​ប្រតិបត្តិ​ការ​ សម្រាប់​មនុស្ស​ជំនាន់​ក្រោយៗ។​

លោក​ហ៊ុន សែន ក៏​បាន​ធ្វើ​សន្និសីទ​ព័ត៌មាន​រួម​គ្នា​ជាមួយ​នាយក​រដ្ឋមន្ត្រី​លាវលោក​ថងលូន​ ស៊ីសូលីត​ ដោយ​បាន​ថ្លែង​ពី​បញ្ហា​ជាច្រើន​ដែល​ប្រទេស​ទាំង​ពីរ​ត្រូវ​បន្ត​ដោះស្រាយ។​ បញ្ហា​ព្រំដែន​ក៏​ត្រូវ​បាន​លើក​ឡើង​ដោយ​ភាគី​ទាំង​ពីរក្នុង​ពេល​ធ្វើ​សន្និសីទ​ព័ត៌មាន​នោះដែរ។​

ទំព័រហ្វេសប៊ុក​របស់​លោក​ហ៊ុន សែន​ បាន​បញ្ជាក់​ឲ្យ​ដឹង​ថា​ ប្រទេស​ទាំង​ពីរ​បាន​ចាត់​ទុក​តំបន់​អូរតាង៉ាវជា​តំបន់​ដែល​មិន​ទាន់​បាន​ដោះស្រាយ ​ដោយ​ផ្តោត​ទៅ​លើ​លក្ខខណ្ឌចំនួន​បី «ទី១​គឺគ្មាន​វត្តមាន​កងទ័ព​នៃ​ប្រទេស​នៅ​តំបន់​នោះ។ ទី២​ គឺ​គ្មាន​ប្រជាជន​ធ្វើ​អាជីវ​កម្ម​នៅ​ទី​នោះ​ និង​ទី​៣ ​នៅ​ពេល​ចុះ​ត្រួត​ពិនិត្យ​ គឺ​ភាគី​ទាំង​ពីរ​ត្រូវ​តែ​ធ្វើរួម​គ្នា​ រួម​ទាំង​លើ​គោក ​ផ្លូវ​ទឹក ​និង​ផ្លូវ​អាកាស»។

មេដឹ​កនាំប្រទេស​ជិត​ខាង​ទាំង​ពីរក៏​បាន​អំពាវនាវ​ និង​ស្នើ​សុំឲ្យ​ប្រធានាធិបតី​បារាំង​ក៏ដូច​ជា​រដ្ឋាភិបាល​បារាំង ​ជួយ​បញ្ចូន​ឯកសារ​ពាក់​ព័ន្ធ​ទាំងអស់ ​ដែល​ផ្ដល់​នូវ​ផល​ប្រយោជន៍​ក្នុង​ការ​ដោះ​ស្រាយ​បញ្ហា​ព្រំដែន​នេះ។ ​ក្រៅ​ពី​បញ្ហា​ព្រំដែន​នេះ​ ​ នាយក​រដ្ឋមន្ត្រី​ប្រទេស​ទាំង​ពីរ​បាន​ចុះ​ហត្ថ​លេខា​ស្ដី​អំពី​ការ​ផ្គត់ផ្គង់​អគ្គិសនី​ពីឡាវ​មក​ផ្គត់ផ្គង់​នៅ​កម្ពុជា​ ដែល​ជាផ្នែក​មួយ​សំខាន់​នៃ​កិច្ច​សហ​ប្រតិ​បត្តិការ​នៅ​ក្នុង​វិស័យ​ពាណិជ្ជ​កម្ម​នៃ​ប្រទេស​ទាំង​ពីរ​ផង​ដែរ។ ​

ភាគី​ទាំង​ពីរ​ក៏បាន​ឯកភាព​គ្នា​ពី​ការ​តភ្ជាប់​ស្ពាន​ តភ្ជាប់​ពី​ភាគ​ខាងជើង​នៃ​ខេត្ត​ស្ទឹងត្រែង​ ខេត្ត​ព្រះ​វិហារ ​រហូត​ដល់​ខេត្ត​ចំប៉ាសាក់ ​ដែល​ផ្ដល់​ឱកាស​ឲ្យ​ប្រជាជន​ប្រទេស​ទាំង​សងខាង​ងាយស្រួល​ក្នុង​ការ​ធ្វើ​ដំណើរ ​ហើយ​ទំនាក់​ទំនង​ក្នុង​វិស័យ​អប់រំ​ ទេសចរណ៍​ វប្បធម៌​ និង​វិស័យ​ផ្សេងៗ​ទៀត។​

ក្នុង​បញ្ហា​ព្រំដែន​រវាង​លាវ​និង​ខ្មែរ​នេះ​ ​ ​លោក​ ​ហ៊ុន សែន​ ធ្លាប់​បាន​គំរាម​ប្រើ​កម្លាំង​ទ័ព​ប្រឆាំង​នឹង​ប្រទេស​លាវ​ ​កាលពី​ឆ្នាំ​២០១៧​ ​ក្នុង​ពេល​ដែលទាហាន​លាវ​បាន​ចូល​ទៅ​បោះ​ទីតាំង​នៅក្នុង​តំបន់អូរតាង៉ាវ​ ​ស្រុក​សៀង​ប៉ាង​ ខេត្ត​ស្ទឹងត្រែង ​ប្រទេស​កម្ពុជា​ ដែល​មាន​ព្រំប្រទល់​ជាប់ខេត្ត​អាតាពើ​ប្រទេស​លាវ។ ​ក៏ប៉ុន្តែ​ ​ក្រោយ​ការ​ចរចារវាង​មេ​ដឹកនាំ​ប្រទេស​ទាំង​ពីរ​ ​ជម្លោះ​នៅ​តំបន់​នោះបាន​វិល​មក​រក​ភាព​ស្ងប់​ស្ងាត់​ ​និង​មិន​កើត​មាន​ការ​ប្រឈម​មុខ​ខាង​យោធា​ណា​មួយឡើង។​

បន្ទាប់​ពី​ទស្សនកិច្ច​នៅ​ប្រទេស​លាវ​ ​លោក​ហ៊ុន សែន​ ​និង​ក្រុម​មន្ត្រី​សំខាន់ៗ​របស់​លោកនឹង​ធ្វើ​ដំណើរ​ទៅ​បំពេញ​ទស្សន​កិច្ច​ជា​ផ្លូវ​ការនៅ​ប្រទេស​កុម្មុយនីស្ត​វៀតណាម​នៅ​ថ្ងៃ​ព្រហស្បតិ៍​នេះ ដើម្បី​ពង្រឹង​ទំនាក់​ទំនង​រវាង​ប្រទេស​កម្ពុជា​និង​វៀតណាម​បន្ថែម​ទៀត៕

XS
SM
MD
LG