រដ្ឋាភិបាលខ្មែរ-ឡាវ នៅថ្ងៃអង្គារនេះ បានបង្ហាញការចង់បានរួមគ្នាដើម្បីបង្កើតច្រកព្រំដែនអន្តរជាតិថ្មីបន្ថែមទៀតសម្រាប់ចេញចូលប្រទេសទាំងពីរ និងដើម្បីជំរុញទំនាក់ទំនងរវាងប្រជាជនប្រទេសទាំងពីរ ទាំងក្នុងការធ្វើដំណើរ និងការធ្វើពាណិជ្ជកម្ម។ នេះបើយោងតាមសេចក្តីរាយការណ៍សង្ខេបមួយរបស់អគ្គស្នងការដ្ឋាននគរបាលជាតិ។
សព្វថ្ងៃនេះ ប្រទេសកម្ពុជា និងឡាវ មានច្រកអន្ដរជាតិរួមគ្នាតែ១ប៉ុណ្ណោះ គឺច្រកត្រពាំងគ្រៀល-ណងណុងឃៀន ដែលស្ថិតនៅក្នុងខេត្តស្ទឹងត្រែង ដែលមានព្រំប្រទល់ជាប់ទឹកដីខេត្តអាត់តាពើ របស់ប្រទេសឡាវ។
សេចក្តីរាយការណ៍របស់អគ្គស្នងការដ្ឋាននគរបាលជាតិចេញផ្សាយនៅថ្ងៃអង្គារនេះ បានបញ្ជាក់ឲ្យដឹងថា លោកស ខេង រដ្ឋមន្ត្រីក្រសួងមហាផ្ទៃ បានជួបពិភាក្សាជាមួយ ឧត្តមសេនីយ៍ឯក Vilay Lakhamephong រដ្ឋមន្រ្តីក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ ក្នុងពិធីចុះហត្ថលេខាលើកំណត់ហេតុ ស្ដីពីកិច្ចសហប្រតិបត្តិការ ឆ្នាំ២០១៩របស់ប្រទេសទាំងពីរនៅទីស្តីការក្រសួងមហាផ្ទៃក្នុងរាជធានីភ្នំពេញ។
នៅក្រោយការចុះហត្ថលេខាលើកំណត់ហេតុសហប្រតិបតិ្តការនោះ លោកផាតសុផានិត ប្រធាននាយកដ្ឋានទំនាក់ទំនងអន្ដរជាតិនៃក្រសួងមហាផ្ទៃ បានបញ្ជាក់ឲ្យដឹងថា ភាគីប្រទេសទាំងពីរកំពុងសិក្សារួមគ្នាដើម្បីបើកច្រកព្រំដែនថ្មី ដែលអាចនឹងធ្វើឡើងនៅខេត្តរតនគិរី ឬស្ទឹងត្រែង។
លោកផាត សុផានិត បានបញ្ជាក់ថា៖
«ភាគីទាំងពីរបានឯកភាពដើម្បីធ្វើយ៉ាងណាពិនិត្យលទ្ធភាព ដើម្បីពង្រីកការបើកច្រកទ្វារព្រំដែនបន្ថែមទៀត ដើម្បីលើកកម្ពស់ការផ្លាស់ប្ដូររវាងប្រជាជន និងប្រជាជន សម្រួលដល់ការធ្វើដំណើរ ការផ្លាស់ប្ដូរពាណិជ្ជកម្ម ដែលនេះជាទិសដៅសំខាន់លើកិច្ចសហប្រតិបត្តិការដែលបានព្រមព្រៀងគ្នា»។
ឧត្តមសេនីយ៍ឯកផាត សុផានិត ដែលជាអ្នកនាំពាក្យរងក្រសួងមហាផ្ទៃផងនោះ មានប្រសាសន៍ប្រាប់ VOA បន្ថែមនៅរសៀលថ្ងៃអង្គារនេះថា កំណើនទេសចរ និងការកើនឡើងនៃការផ្លាស់ប្តូរពាណិជ្ជកម្មរវាងប្រទេសកម្ពុជា-ឡាវ បានញ៉ាំងឲ្យរដ្ឋាភិបាលប្រទេសទាំងពីរសម្រេចសិក្សាបើកច្រកព្រំដែនបន្ថែមលើច្រកដែលមាននាពេលបច្ចុប្បន្ននេះ។
«ចេតនាក្នុងការបង្កើតឲ្យមាន ច្រកទ្វារព្រំដែនអន្តរជាតិបន្ថែមទៀតនេះ ដោយសារយើងមានខេត្តជាប់ព្រំដែននៃប្រទេសទាំងពីរជាប់គ្នា ដោយខេត្តនៅខាងកម្ពុជាយើងបីខេត្ត ហើយខេត្តឡាវ ពីរខេត្ត»។
លោកបានបន្ថែមថា៖
«អ៊ីចឹង ដោយមើលឃើញនៃកំណើនពាណិជ្ជកម្ម កំណើនទេសចរ កំណើនអ៊ីចឹង ហើយអ៊ីចឹងក៏ជាផលប្រយោជន៍ ទៅវិញទៅមកផង ក៏ភាគីទាំងពីរ គឺថាគាត់ឯកភាពជា ជាស្មារតីគឺថា មានបំណងឲ្យមាន ច្រកបន្ថែមទៀត ប៉ុន្តែគ្រាន់ថា រយៈពេល ឬក៏ទីតាំងណាមួយជាក់លាក់ហ្នឹង គឺយើងនឹងត្រូវការពេលវេលា ដើម្បីសិក្សា និងឯកភាពគ្នាទៀត»។
យោងតាមសេចក្តីរាយការណ៍ដដែលរបស់អគ្គស្នងការដ្ឋាននគរបាលជាតិ បានដកស្រង់ប្រសាសន៍បន្ថែមរបស់លោក ផាត សុផានិត ដែលបានថ្លែងឲ្យដឹងទៀតថា ភាគីកម្ពុជា-ឡាវ បានធ្វើការប្តេជ្ញាចិត្តរួមគ្នា លើការបង្ការ បង្ក្រាប និងទប់ស្កាត់បញ្ហាគ្រឿងញៀន។ លោកថា ភាគីទាំងពីរនឹងខិតខំប្រឹងប្រែងធ្វើយ៉ាងណា មិនឲ្យបញ្ហាគ្រឿងញៀនមកគ្របដណ្តប់លើប្រជាជននោះឡើយ។
សេចក្តីរាយការណ៍ ក៏បានបញ្ជាក់ទៀតថា កម្ពុជា-ឡាវ នៅតែបន្ដសន្យាជាមួយគ្នា ខិតខំបង្ក្រាប និងទប់ស្កាត់រាល់បទល្មើសផ្សេងៗ ដែលកើតឡើងនៅតាមខណ្ឌសីមារបស់ប្រទេសទាំងពីរ ដើម្បីរក្សាសន្ដិសុខ សណ្ដាប់ធ្នាប់ របៀបរៀបរយ ក្នុងន័យរក្សាសុវត្ថិភាពជូនជាតិ និងប្រជាជនផងដែរ។
ប្រទេសកម្ពុជា និងឡាវ ធ្លាប់បានប្រឈមភាពរកាំរកូស រឿងព្រំដែននៅត្រង់ម្តុំអូតាង៉ាវ ក្នុងស្រុកសៀងប៉ាង ខេត្តស្ទឹងត្រែង ដែលមានព្រំប្រទល់ជាប់ខេត្ត Attapeu របស់ឡាវ។
តំបន់ខាងលើនេះ ធ្លាប់មានការប្រទាញប្រទង់ផ្នែកយោធារវាងកម្ពុជា និងឡាវកាលពីឆ្នាំ២០១៧ ដោយនាយឧត្តមសេនីយ៍ផុតលេខផ្កាយមាស៥របស់កម្ពុជា គឺលោកនាយករដ្ឋមន្ត្រី ហ៊ុន សែន បានព្រមានរដ្ឋាភិបាលទីក្រុងវៀងច័ន្ទន៍ ជាមួយការប្រើកម្លាំងយោធា ប្រសិនបើភាគីឡាវនៅតែគឃ្លើន មិនព្រមដកកងទ័ពខ្លួនចេញពីទឹកដីប្រទេសកម្ពុជា ត្រង់តំបន់អូរតាង៉ាវដែលជាទីតាំងទំនាស់នោះ។
ប៉ុន្តែក្រោយការចរចារវាងភាគីទាំងពីរនៅប្រទេសឡាវ កងទ័ពនៃប្រទេសទាំងពីរក៏បានដកចេញពីទីតាំងជម្លោះ ហើយបានឯកភាពគ្នា ស្នើឱ្យប្រទេសបារាំងបញ្ជូនផែនទីបន្ទាត់ព្រំដែននៃប្រទេសទាំងពីរ បញ្ជូនអ្នកបច្ចេកទេស និងបញ្ជូនឯកសារពាក់ព័ន្ធនានា ដើម្បីដោះស្រាយបញ្ចប់បញ្ហាព្រំដែន និងពន្លឿនការបោះបង្គោលព្រំដែននៃប្រទេសកម្ពុជា-ឡាវ។
នៅចុងឆ្នាំ២០១៧ រដ្ឋាភិបាលកម្ពុជា ក៏បានប្រកាសបង្កើតកងអន្តរាគមន៍មួយប្រចាំនៅខេត្តស្ទឹងត្រែងជាប់នឹងព្រំដែនឡាវ ដែលមានទាហានដល់ទៅជាង៣ពាន់នាក់។
លោក ផាត សុផានិត បញ្ជាក់បន្ថែមថា ដំណើរការសិក្សាបង្កើតច្រកព្រំដែនថ្មីរវាងប្រទេសទាំងពីរនេះ គឺជាកិច្ចការដាច់ដោយឡែកពីបញ្ហាព្រំដែននៅត្រង់តំបន់អូតាង៉ាវនេះ៕
