លោក យី សីហា៖ ការប្តេជ្ញាចិត្តធ្វើជាពលរដ្ឋសកម្ម ទោះចាញ់ការបោះឆ្នោតធ្វើជាមេឃុំ
ការប្រកួតប្រជែងដណ្តើមយកតំណែងមេឃុំឬចៅសង្កាត់ នៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី ៥ នេះ គណបក្សកម្ពុជានិយម មានបេក្ខជនឈរឈ្មោះ ៣០៦ អាសនៈក្នុងចំណោមអាសនៈសរុប ១១៦២២។ ជាលទ្ធផល គណបក្សនេះទទួលបាន ១ អាសនៈ។ សម្រាប់ឃុំសូភាស ស្រុកស្ទឹងត្រង់ ខេត្តកំពង់ចាម ក្រុមប្រឹក្សាឃុំសង្កាត់មានអាសនៈចំនួន ៩។ គណបក្សចំនួន ៤ បានចូលរួមការប្រកួតប្រជែងការបោះឆ្នោតឃុំសង្កាត់អាណត្តិទី ៥ ដើម្បីគ្រប់គ្រងអាសនៈទាំងនេះ។ ជាលទ្ធផល គណបក្សប្រជាជនកម្ពុជាទទួលបាន ៧ អាសនៈ គណបក្សភ្លើងទៀនទទួលបាន ២ អាសនៈ។ អ្នកស្រី ធីតា វីន បានសម្ភាសន៍លោក យី សីហា អាយុ ៣៦ ឆ្នាំ បេក្ខជនមេឃុំ សូភាស ស្រុកស្ទឹងត្រង់ ខេត្តកំពង់ចាម នៃគណបក្សកម្ពុជានិយម ស្តីអំពីជុំវិញដំណើរការបោះឆ្នោតជ្រើសរើសក្រុមបឹ្រក្សាឃុំសង្កាត់អាណត្តិទី ៥។ លោក យី សីហា ដែលមិនបានជាប់ឆ្នោតជាមេឃុំ បានឱ្យដឹងថា មិនមានបរិយាកាសល្អសម្រាប់គណបក្សនយោបាយក្រៅរដ្ឋាភិបាលនោះទេ ក្នុងការចូលរួមប្រកួតប្រជែងបោះឆ្នោតជ្រើសរើសក្រុមបឹ្រក្សាឃុំសង្កាត់អាណត្តិទី ៥ នេះ។ លោក យី សីហា បានសង្កត់ធ្ងន់ថា លោកនឹងបន្តបំពេញតួនាទីជាពលរដ្ឋសកម្មមួយរូបក្នុងឃុំរបស់លោក បើទោះបីជាលោកមិនបានជាប់ឆ្នោតជាមេឃុំក៏ដោយ៕
