កម្មវិធីវិទ្យុ
ព័ត៌មានពេលព្រឹក៖ ៩ មីនា ២០២១
ព័ត៌មានអំពីកម្ពុជាមានដូចជា កម្ពុជាផ្អាកការងាររដ្ឋាភិបាលមួយផ្នែកធំនិងដាក់កំហិតការធ្វើដំណើរ ខណៈការឆ្លងកូវីដ១៩ ក្នុងសហគមន៍កើនឡើង។ «បន្ទាន់និងប្រយ័ត្នខ្ពស់» ជាគោលការណ៍របស់ក្រុមគ្រូពេទ្យជួរមុខប្រយុទ្ធនឹងជំងឺកូវីដ១៩។ រីឯព័ត៌មានអន្តរជាតិវិញមានដូចជា បេសកជនអង្គការសហប្រជាជាតិស្នើឲ្យមានសកម្មភាពរួមគ្នាដើម្បីបញ្ឈប់ការគាបសង្កត់នៅមីយ៉ាន់ម៉ា។ អ្នកម្នាង Meghan ចោទប្រកាន់រាជវង្សអង់គ្លេសពីការរើសអើងពូជសាសន៍ និងថា «ធ្លាប់មិនចង់រស់នោះទេ»។ អង់គ្លេសចាប់ផ្តើមបើកសាលារៀនឡើងវិញ ខណៈវៀតណាមចាប់ផ្តើមយុទ្ធនាការចាក់វ៉ាក់សាំងកូវីដ១៩។ តុលាការព្រហ្មទណ្ឌអន្តរជាតិចេញសាលក្រមឲ្យសងជំងឺចិត្ត ៣០ លានដុល្លារដល់ជនរងគ្រោះនៅកុងហ្គោ។ សហរដ្ឋអាមេរិកថា កូរ៉េខាងត្បូងបង្កើនថវិកាសម្រាប់កងទ័ពអាមេរិក ក្រោមកិច្ចព្រមព្រៀងថ្មី។ មេដឹកនាំក្រុងហុងកុងថា ការបោះឆ្នោតសភាក្រុងហុងកុង អាចត្រូវបានពន្យារពេលបន្ថែមទៀត ដោយសារកំណែទម្រង់ការបោះឆ្នោត៕
ព័ត៌មានពេលរាត្រី៖ ៩ មីនា ២០២១
ព័ត៌មានអំពីកម្ពុជាមានដូចជា កម្ពុជារកឃើញការឆ្លងជំងឺកូវីដចំនួន ៤៩ ករណីបន្ថែមទៀត នាំឲ្យព្រួយបារម្ភផលប៉ះពាល់សេដ្ឋកិច្ច។ រដ្ឋាភិបាលអំពាវនាវឲ្យផ្អាកសកម្មភាពសាធារណៈ ខណៈការឆ្លងជំងឺកូវីដ១៩ មិនធូរស្រាល។ បណ្ដាឯកអគ្គរដ្ឋទូតថា ការពង្រឹងអភិបាលកិច្ចទន្លេមេគង្គជារឿងចាំបាច់។ កម្ពុជាមានអ្នកជាប់ឃុំច្រើនជាងទណ្ឌិតនិងខ្ពស់ជាងប្រទេសជិតខាង បើទោះជាពន្ធនាគារខ្វះខាតធនធាន។ រីឯព័ត៌មានអន្តរជាតិវិញមានដូចជា បាតុករមីយ៉ាន់ម៉ាអាចចាកចេញពីសង្កាត់មួយនៃក្រុងរ៉ង់ហ្គូនបន្ទាប់ពីត្រូវបានឡោមព័ទ្ធនៅទីនោះ។ CDC អាមេរិកបន្ធូរបន្ថយការរឹតត្បិតចំពោះពលរដ្ឋដែលចាក់វ៉ាក់សាំងកូវីដ១៩រួចហើយ។ ចិនចាប់ផ្តើមចេញលិខិតបញ្ជាក់ការចាក់វ៉ាក់សាំងកូវីដ៩ សម្រាប់ការធ្វើដំណើរឆ្លងដែន។ សហរដ្ឋអាមេរិកថា ខ្លួនរក្សាជម្រើសទាំងអស់ដើម្បីពិភាក្សាអំពីបេសកកម្មយោធានៅអាហ្វហ្គានីស្ថាន។ របាយការណ៍ថា អ្នកកាសែតស្រ្តីរងការគំរាមកំហែងពីការរើសអើងផ្លូវភេទនៅទូទាំងពិភពលោក និងព័ត៌មានអន្តរជាតិមួយចំនួនទៀត៕
