កម្មវិធីវិទ្យុ
ព័ត៌មានពេលព្រឹក៖ ៤ ឧសភា ២០២១
ព័ត៌មានអំពីកម្ពុជាមានដូចជា លោក ហ៊ុន សែន ថា ការបិទខ្ទប់ទីក្រុងត្រូវបញ្ចប់ចាប់ពីថ្ងៃទី ៦ ខែឧសភា តែតំបន់មានហានិភ័យត្រូវរាំងខ្ទប់ដដែល។ កម្ពុជាប្រារព្ធទិវាសារព័ត៌មាន ខណៈសង្គមស៊ីវិលជំរុញឲ្យរដ្ឋាភិបាលធានាសេរីភាពសារព័ត៌មាន។ រីឯព័ត៌មានអន្តរជាតិវិញមានដូចជា ប្រទេសថៃមានអ្នកស្លាប់ថ្មីប្រចាំថ្ងៃដោយសារជំងឺកូវីដ១៩ កើនដល់ ៣១ នាក់ដែលមិនធ្លាប់មាន។ សហរដ្ឋអាមេរិករឹតបន្តឹងការធ្វើដំណើរទៅនិងមកពីប្រទេសឥណ្ឌាចាប់ពីថ្ងៃអង្គារនេះតទៅ និងបានបញ្ជូនជំនួយសម្រាប់ទប់ទល់ជំងឺកូវីដទៅកាន់ប្រទេសនេះ។ កោះតៃវ៉ាន់ដាក់បម្រាមការធ្វើដំណើរមកពីប្រទេសឥណ្ឌា ខណៈឥណ្ឌូណេស៊ីរកឃើញករណីដំបូងនៃវីរុសបម្លែងថ្មីមានប្រភពពីឥណ្ឌា។ ក្រុមឧទ្ទាមមីយ៉ាន់ម៉ាថា ខ្លួនបានបាញ់ទម្លាក់ឧទ្ធម្ភាគចក្ររបស់យោធាមួយគ្រឿង គឺមួយថ្ងៃក្រោយបាតុករប្រឆាំងតវ៉ា៨នាក់ ត្រូវបានអាជ្ញាធរបាញ់សម្លាប់។ នាយករដ្ឋមន្ត្រីនូវែលសេឡង់លើកឡើងថា ការខ្វែងគំនិតគ្នាជាមួយចិនអំពីបញ្ហារំលោភសិទ្ធិមនុស្សជា «ការពិបាកក្នុងការសម្របសម្រួល»។ វិបត្តិនៅលីបង់បង្កើតឱ្យមានគំនិតច្នៃប្រតិដ្ឋផ្គត់ផ្គង់ខ្លួនឯង។ ប្រទេសស៊ីមបាវ៉េរំពឹងលើថ្នាំជក់នៅពេលអនាគត ទោះបីជាមានយុទ្ធនាការប្រឆាំងការជក់បារីក្តី៕
ព័ត៌មានពេលរាត្រី៖ ៤ ឧសភា ២០២១
ព័ត៌មានសំខាន់ៗអំពីកម្ពុជាមានដូចជា កម្ពុជារាយការណ៍ករណីឆ្លងថ្មីចំនួន ៩៣៨នាក់ ជាកំណត់ត្រាខ្ពស់បំផុតចាប់តាំងពីការផ្ទុះឆ្លងជំងឺកូវីដ១៩។ ក្រុមសង្គមស៊ីវិលជំរុញឲ្យបញ្ចប់និទណ្ឌភាពចំពោះអំពើហិង្សាប្រឆាំងអ្នកសារព័ត៌មាន។ ករណីឆ្លងជំងឺកូវីដ១៩ បន្តកើនឡើង ខណៈរដ្ឋាភិបាលត្រៀមបញ្ចប់ការបិទខ្ទប់ទីក្រុងភ្នំពេញនិងក្រុងតាខ្មៅ។ ពលរដ្ឋ«តំបន់ក្រហម»ប្រឈមទាំងកង្វះស្បៀងនិងបញ្ហាផ្លូវចិត្ត ក្រោមវិធានការបិទខ្ទប់សកម្មភាពសេដ្ឋកិច្ចនិងសង្គមទាំងស្រុង។ រីឯព័ត៌មានអន្តរជាតិវិញមានដូចជា រដ្ឋមន្ត្រីការបរទេសនៃក្រុមប្រទេស G-7 នឹងពិភាក្សាគ្នាអំពីបញ្ហាចិន រុស្ស៊ី មីយ៉ាន់ម៉ា និងស៊ីរី។។ លោក Biden បង្កើនចំនួនជនភៀសខ្លួនដែលអនុញ្ញាតឲ្យចូលក្នុងសហរដ្ឋអាមេរិករហូតដល់ទៅ ៤ ដង។ សហភាពអឺរ៉ុបស្នើប្រទេសជាសមាជិកឲ្យផ្ដល់ការអនុញ្ញាតធ្វើដំណើរដល់ទេសចរដែលចាក់វ៉ាក់សាំងកូវីដ១៩ បានពេញលេញ។ សហរដ្ឋអាមេរិកគ្រោងពិនិត្យអនុញ្ញាតឲ្យប្រើវ៉ាក់សាំងកូវីដ១៩ Pfizer សម្រាប់មនុស្សអាយុ ១២ ឆ្នាំឡើង។ រឿងរ៉ាវជនចំណាកស្រុកមកពីផ្នែកទាំងសងខាងនៃព្រំដែនសហរដ្ឋអាមេរិក។ ប្រទេសដែលមានសេដ្ឋកិច្ចតូចជាង កំពុងសម្លឹងមើលឱកាសចូលរួមកិច្ចព្រមព្រៀងពាណិជ្ជកម្មឌីជីថល។ អង្គការមនុស្សធម៌ធ្វើអន្តរាគមន៍ ខណៈអំពើហិង្សាបន្តកើតឡើងនៅមីយ៉ាន់ម៉ា និងព័ត៌មានផ្សេងទៀត៕