ប្រធានាធិបតីអ៊ុយក្រែនលោក Volodymyr Zelenskyy បានសន្យាកាលពីថ្ងៃអង្គារថានឹងដណ្ដើមកាន់កាប់ឡើងវិញនូវតំបន់នានារបស់អ៊ុយក្រែនដែលកងទ័ពរុស្ស៊ីកំពុងត្រួតត្រានៅពេលបច្ចុប្បន្ន។
លោកក៏បានបញ្ជាក់ផងដែរថា ទោះបីជាប្រទេសជាច្រើននៅលើពិភពលោកមានចម្ងល់ក៏ដោយ ក៏«អ៊ុយក្រែនបានបង្ហាញថា ខ្លួនអាចយកឈ្នះបាន បើទោះបីជាមានការប្រឈមទាំងអស់ ជាពិសេសនៅក្នុងតំបន់សមុទ្រខ្មៅក៏ដោយ»។
កាលពីព្រឹកថ្ងៃអង្គារ ក្រសួងការពារជាតិរុស្ស៊ីបានបញ្ជាក់ថា ខ្លួនបានបំផ្លាញនាវាអ៊ុយក្រែន ៣ គ្រឿងនៅផ្នែកខាងជើងនៃសមុទ្រខ្មៅ។
រុស្ស៊ីក៏បានលើកឡើងផងដែរថា ខ្លួនបានធ្វើប្រតិបត្តិការ «ប្រឆាំងនឹងសកម្មភាពវិទ្ធង្សនា» នៅជិតកំពង់ផែ Sevastopol ដែលជាទីតាំងរបស់កងនាវារបស់ខ្លួននៅសមុទ្រខ្មៅ។
លោក Zelenskyy បានអះអាងកាលពីថ្ងៃអង្គារថា ការវាយប្រហារកាលពីពេលថ្មីៗនេះរបស់អ៊ុយក្រែនបានបង្អាក់ដល់មូលដ្ឋានសុវត្ថិភាពរបស់កងនាវារុស្ស៊ីនិងបានធ្វើឱ្យច្រករបៀងសមុទ្រនៅភាគខាងលិចនៃសមុទ្រខ្មៅមានសុវត្ថិភាព នៅពេលដែលទាហានអ៊ុយក្រែនមានបំណងគាបរឹតធ្វើយ៉ាងណាឱ្យកងទ័ពរុស្ស៊ីដែលត្រួតត្រានៅឧបទ្វីបគ្រីមា (Crimea) ចាកចេញពីទីនោះ។
តំបន់គ្រីមាជាកន្លែងផ្ដល់ការគាំទ្រខាងក្រោយសម្រាប់កិច្ចប្រឹងប្រែងរបស់រុស្ស៊ីនៅសមរភូមិនៅភាគខាងលិចបង្អស់ ហើយតំបន់នេះបានក្លាយជាគោលដៅវាយប្រហារជាញឹកញយរបស់កងទ័ពអ៊ុយក្រែនក្នុងអំឡុងសង្គ្រាមនេះតាំងពីពេលដែលរុស្ស៊ីបានឈ្លានពានអ៊ុយក្រែនមក៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។