យុវជនសំរាម! គឺជារហស្សនាមរបស់យុវជនមួយក្រុមមានមុខរបរចម្រុះគ្នា តែមានគោលបំណងរួមមួយ ដើម្បីកែប្រែលូទឹកស្អុយឲ្យក្លាយជារមណីយដ្ឋានតាមរយៈការចំណាយពេលវេលាផ្ទាល់ខ្លួន ធ្វើការស្ម័គ្រចិត្តប្រមូលយកសំរាមពីក្នុងលូទឹកស្អុយម្ដុំបឹងត្របែក ទាំងថ្ងៃ និងយប់។
យ៉ាងហោចណាស់ មានយុវជនប្រមាណជាង២០នាក់ បានចូលរួមជាប្រចាំរៀងរាល់ថ្ងៃដើម្បីប្រមូលកាកសំណល់ដែលគេបោះចោលក្នុងលូទឹកស្អុយ។ សកម្មភាពសម្អាតនេះបានចាប់ផ្ដើមតាំងពីដើមខែមីនា ហើយបានទាក់ទាញយុវជនច្រើនឡើងចូលរួមសកម្មភាពនេះ។
កំពុងដឹកនាំក្រុមយុវជនប្រមូលសំរាមទាំងមេឃកំពុងបើកថ្ងៃកម្ដៅជាង៣០អង្សា យុវជន សាន ដារ៉ាវីត ប្រាប់ថាមូលហេតុនៃការចាប់ផ្ដើម គឺដោយសារលោកឃើញមិត្តភក្តិរបស់លោកម្នាក់ជាជនបរទេស រិះគន់បញ្ហាសំរាមនៅកម្ពុជា។
បុរសវ័យ ២៩ ឆ្នាំរូបនេះបន្តថា លោកចាប់ផ្ដើមចាប់យកទីតាំងលូទឹកស្អុយបឹងត្របែកនេះ ដោយសារលោកតែងធ្វើដំណើរឆ្លងកាត់តំបន់នេះជាញឹកញយ ហើយឃើញសំរាមជាច្រើនកំពុងអណ្ដែតជាមួយក្លិនដែលពិបាកទ្រាំ។
លោក សាន ដារ៉ាវីត អ្នកផ្តើមគំនិតដឹកនាំក្រុមយុវជនប្រមូលសំរាមនៅលូទឹកស្អុយបឹងត្របែក រាជធានីភ្នំពេញ ផ្តល់បទសម្ភាសន៍ដល់ VOA រាជធានីភ្នំពេញ ថ្ងៃទី១១ ខែមីនា ឆ្នាំ២០១៩។ (កាន់ វិច្ឆិកា/VOA)
យុវជនដែលជាអ្នកផ្ដើមគំនិតដំបូងក្នុងការប្រមូលសំរាមនៅលូទឹកស្អុយបឹងត្របែកនេះ រំពឹងថា លូទឹកស្អុយនេះ នឹងក្លាយជាទីកន្លែងស្អាតនាពេលខាងមុខ តាមរយៈការអត់ធ្មត់ និងខិតខំប្រឹងប្រែងប្រមូលសំរាមឲ្យអស់ពីតំបន់នេះ។
លោកបញ្ជាក់ថា៖
«ទីតាំងនេះខ្ញុំគិតថាវាអាចចិញ្ចឹមត្រីបាន ខ្ញុំព្យាយាមធ្វើឲ្យទឹកពណ៌ខ្មៅនេះទៅជាថ្លា ហើយពួកយើងអាចធ្វើជាកន្លែងអង្គុយលេងអង្គុយអីទៅ។ អញ្ចឹងថ្ងៃក្រោយវាអាចទៅជារមណីយដ្ឋានបាននៅទីនេះ ព្រោះនៅទីនេះវានៅកណ្ដាលក្រុងដែរ អញ្ចឹងយើងមិនបាច់បារម្ភថាធ្វើរមណីយដ្ឋានអត់មានមនុស្សចូលរួមទេ»។
សាន ដារ៉ាវីដ បន្ថែមពីគោលបំណងសម្រាប់ក្តីស្រម៉ៃបន្ទាប់ថា៖
«និយាយទៅ ខ្ញុំចង់យកកន្លែងហ្នឹងធ្វើជាគំរូសិន យកអាហ្នឹងយកទៅដាក់នៅកន្លែងផ្សេងមួយទៀត»។
យុវជនទាំងនោះភាគច្រើនជាយុវជនមកពីទីកន្លែងផ្សេងៗគ្នានៅរាជធានីភ្នំពេញ និងមានមួយចំនួនមកពីតាមបណ្ដាខេត្ត ហើយពួកគេមិនធ្លាប់ស្គាល់គ្នា ព្រមទាំងមានមុខរបរផ្សេងៗគ្នា។ ក្នុងចំណោមពួកគេនោះ ខ្លះជាអ្នកលក់កាហ្វេ ខ្លះជាជាងជួសជុលរថយន្ត និងខ្លះទៀតធ្វើការនៅហាងកែសម្ផស្ស។
កំពុងឈរលើក្បូនធ្វើពីបន្ទះឈើ និងធុងជ័រ បណ្ដែតលើទឹកលូដែលមានពណ៌ខ្មៅដូចភក់ ព្រមជាមួយក្លិនស្អុយបណ្ដាលឲ្យឆួលច្រមុះ យុវតី ហាក់ ស្រីពៅ កំពុងកាន់កញ្ច្រែងដួសសំរាមដែលភាគច្រើនជាប្លាស្ទិក កំពុងអណ្ដែតត្រៀបត្រាក្នុងលូបង្ហូរទឹកស្អុយនៅតំបន់បឹងត្របែកនោះ។
ស្រីពៅ បន្តថា នាងគឺជាអ្នកធ្វើការនៅហាងកែសម្ផស្សមួយនៅម្ដុំបឹងកេងកង ហើយនាងទើបចាប់ផ្ដើមចូលរួមប្រមូលសំរាមជាមួយក្រុមយុវជនសំរាមនេះ បន្ទាប់ពីជិះកង់កាត់ម្ដុំលូទឹកស្អុយបឹងត្របែកជាច្រើនដង។
យុវតីវ័យ ១៨ ឆ្នាំរូបនេះនិយាយថា៖
«ចង់ឲ្យប្រជាពលរដ្ឋហ្នឹងគាត់មានសុខភាពល្អដែរអញ្ចឹង ព្រោះអីណាមួយទីក្រុងយើងសំរាមច្រើនអញ្ចឹងទៅមើលភាគច្រើនគេមកមើលអត់ល្អអញ្ចឹង ចង់ចែករំលែក ហើយណាមួយដើម្បីសុខភាពបងប្អូនយើងនៅទីហ្នឹងផង។ ក៏មិនដឹងដែរ [រយៈពេលនៃការចូលរួមប្រមូលសំរាម] បើសិនគាត់ចូលរួមអាចចូលរួមជាមួយគាត់រហូតដែរ»។
ក្រុមយុវជនកំពុងប្រមូលសំរាមពីលូទឹកស្អុយបឹងត្របែក នៅថ្ងៃទី១១ ខែមីនា ឆ្នាំ២០១៩។ (កាន់ វិច្ឆិកា/VOA)
អស់រយៈពេលជិត ១ ខែមកហើយ ពោលគឺចាប់តាងពីថ្ងៃទី ៨ ខែមីនា ឆ្នាំ ២០១៩ មក មិនថាពេលថ្ងៃ ឬយប់ គេឃើញក្រុម«យុវជនសំរាម» ពេលខ្លះមានចំនួនជិត ១០ នាក់ ពេលខ្លះប្រមាណជា ២០ នាក់ តែងបែងចែកការងារគ្នាដើម្បីប្រមូលសំរាមពីលូទឹកស្អុយនោះ។ ពួកគេខ្លះចងបន្ទះឈើភ្ជាប់ជាមួយធុងជ័រដើម្បីដាក់បណ្ដែតទឹក ខ្លះប្រើកញ្ច្រែងដួសយកសំរាមចេញពីលូ ខ្លះជញ្ជូនសំរាមយកដាក់លើគោក និងខ្លះទៀតចាប់សំរាមដោយប្រើដង្កៀបជាដើម។
បុរសមាឌមាំ និងសម្បុរស្រអែម កំពុងឱនចងបន្ទះក្ដារភ្ជាប់ជាមួយធុងជ័រដើម្បីបណ្ដែតជាក្បូនធ្វើមធ្យោបាយប្រមូលសំរាមលើទឹកម្នាក់ លោក មាស ស៊ីនឿន និយាយថា លោកបានចំណាយពេលថ្ងៃអាទិត្យ និងពេលយប់ ក្រោយបញ្ចប់ការងារជាជាងជួលជុលរថយន្ត ដើម្បីជួយប្រមូលសំរាម ពីលូទឹកស្អុយនេះ។ លោករំពឹងថា តាមរយៈការសកម្មភាពការងាររបស់ក្រុម«យុវជនសំរាម» ប្រជាពលរដ្ឋ និងអ្នកពាក់ព័ន្ធ នឹងរួមគ្នាក្នុងការទុកដាក់ និងសម្អាតសំរាមនៅកម្ពុជា។
បុរសវ័យ ២៦ ឆ្នាំរូបនេះបន្ថែមទាំងមានញើសលើថ្ងាសបន្តិចផងថា៖
«យើងធ្វើនេះគឺចង់ឲ្យប្រជាពលរដ្ឋផ្លាស់ប្ដូរផ្នត់គំនិតពីការបោះចោលសំរាមចូលក្នុងទឹកឲ្យមានសណ្ដាប់ធ្នាប់ ហើយពួកយើងព្រមធ្វើធុងសំរាមឲ្យពួកគាត់ហ្នឹង ដើម្បីឲ្យគាត់បោះចោលក្នុងធុងសំរាម ដើម្បីឲ្យវាល្អ កុំឲ្យគាត់អារាត់អារាយអញ្ចឹង ហើយច្បាប់ក៏គេហាមឃាត់ដែរ។ គេមានទាំងការផាកពិន័យ ពេលបោះចោលខុសកន្លែងទីតាំងអញ្ចឹង គេមានការផាក វាអស់លុយអស់អី។ សំខាន់ពេលគេផុស [បង្ហោះលើបណ្ដាញសង្គមហ្វេសប៊ុក] ទៅវាខ្មាសគេទៀត។ វាអត់ល្អទេ»។
ក្រុមយុវជនកំពុងប្រមូលសំរាមពីលូទឹកស្អុយបឹងត្របែក នៅយប់ថ្ងៃទី២១ ខែមីនា ឆ្នាំ២០១៩។ (កាន់ វិច្ឆិកា/VOA)
កាលពីសប្ដាហ៍ទី ៣ នៃសកម្មភាពសម្អាតលូទឹកស្អុយបឹងត្របែក ក្រុមយុវជនសំរាមទាំងនោះបានធ្វើធុងសំរាមពីធុងជ័រប្រមាណជា ៥០ ដោយមានបាញ់ថ្នាំលើធុងនោះថា «យុវជនសំរាម» ដើម្បីចែកចាយឥតគិតថ្លៃដល់ប្រជាពលរដ្ឋដែលរស់នៅទីនោះ។
កំពុងឈរមើលយុវជនកាយសំរាមពីលូទឹកស្អុយ ពលរដ្ឋម្នាក់រស់នៅតាមបណ្ដោយលូទឹកស្អុយនោះ លើកឡើងដោយសុំមិនបញ្ចេញឈ្មោះថា លោកគាំទ្រចំពោះសកម្មភាពរបស់ក្រុមយុវជនដែលចុះប្រមូលសំរាមទាំងនោះ។ បុរសវ័យជាង ៦០ ឆ្នាំរូបនេះបន្ថែមថា កន្លងមកលោកឃើញអាជ្ញាធរបានចុះកាយសំរាមជាច្រើនដងដែរ ប៉ុន្តែលោកថាអាជ្ញាធរមិនអាចកាយអស់ដោយសារអ្នករស់នៅទីនោះតែងចោលសំរាមជារៀងរាល់ថ្ងៃ។
បុរសមាឌមាំ សក់ល្បាយអាចម៍ខ្លារូបនេះបញ្ជាក់ថា៖
«លំបាកគឺលំបាកហើយ តែមិនដឹងធ្វើម៉េចបើយើងធ្វើអីមិនចេញដោះស្រាយវាមិនចេញ បានយុវជនស្ម័គ្រចិត្តមកជួយហ្នឹង សប្បាយចិត្តហ្មង។ អាជ្ញាធរមកកាយដែរ តែគាត់អត់មានកម្លាំងច្រើន គាត់មកតែម្នាក់ឯងគ្រាន់តែឆ្កឹះវាសអីបន្តិចបន្តួចហ្នឹង ដូចថាគាត់គ្មានកម្លាំងពលកម្ម។ វាមិនដូចយុវជនមកគ្នាច្រើនអញ្ចឹងហ្មង»។
បន្ទាប់ពីក្រុម «យុវជនសំរាម» ចាប់ផ្ដើមសកម្មភាពប្រមូលសំរាមនៅតាមលូទឹកស្អុយបឹងត្របែកនោះ គេឃើញអាជ្ញាធរដែលមានរដ្ឋបាលសាលារាជធានីភ្នំពេញ និងក្រសួងមួយចំនួន ក៏បានប្រើគ្រឿងចក្រចូកដី ដើម្បីកាយសំរាមនៅទីនោះ និងជួយជញ្ជូនសំរាមដែលប្រមូលបានពីក្រុម«យុវជនសំរាម»ដឹកយកទៅចាក់ចោលនៅទីលានចោលសំរាមផងដែរ។
ក្រុមយុវជនកំពុងប្រមូលសំរាមពីលូទឹកស្អុយបឹងត្របែក នៅថ្ងៃទី១១ ខែមីនា ឆ្នាំ២០១៩។ (កាន់ វិច្ឆិកា/VOA)
អ្នកនាំពាក្យសាលារាជធានីភ្នំពេញ លោក ម៉េត មាសភក្តី មិនទទួលទូរស័ព្ទដោយគ្រាន់តែប្រាប់ VOA តាមបណ្ដាញសង្គមហ្វេសប៊ុកយ៉ាងខ្លីក្នុងន័យដើមថា៖
«យើងធ្វើការងារអនាម័យ បរិស្ថាននេះជាប្រចាំរួចហើយ តែយ៉ាងណាក៏អរគុណការចូលរួមរបស់យុវជនក្នុងន័យជំរុញការយល់ដឹងអំពីបញ្ហាសំរាមនេះ»។
កម្ពុជាមានអនុក្រឹត្យស្ដីពីការគ្រប់គ្រងសំរាម និងសំណល់រឹងទីប្រជុំជន កាលពីខែសីហា ឆ្នាំ ២០១៧ ដែលមានគោលបំណងគ្រប់គ្រងសំរាម និងសំណល់រឹងតាមទីប្រជុំជនឲ្យមានប្រសិទ្ធភាព។ អនុក្រឹត្យនោះ ក៏មានចែងពីការពិន័យជាប្រាក់ចាប់ពី ១ម៉ឺនរៀលដល់ ២លានរៀល ចំពោះអ្នកដែលគ្រប់គ្រងសំណល់មិនបានត្រឹមត្រូវ ព្រមទាំងបុគ្គល ឬស្ថាប័នដែលធ្វើឲ្យប៉ះពាល់ដល់បរិស្ថានផ្សេងៗ។
អនុក្រឹត្យស្ដីពីការគ្រប់គ្រងថង់ប្លាស្ទិកដែលបានប្រកាសឲ្យប្រើកាលពីថ្ងៃទី ១០ ខែតុលា ត្រូវចាប់ផ្ដើមអនុវត្តនៅតាមផ្សារទំនើបគ្រប់រាជធានីខេត្ត មុននឹងអនុវត្តនៅតាមគ្រប់កន្លែងលក់ទំនិញទូទាំងប្រទេសក្នុងឆ្នាំ ២០២០ ខាងមុខ។ អនុក្រឹត្យនោះក៏មានកំណត់ពីទំហំថង់ប្លាស្ទិកដែលត្រូវប្រើមិនឲ្យតូចជាង ២៥សង់ទីម៉ែត្រ ចំណែកកម្រាស់មិនឲ្យស្ដើងជាង ០.៣មីលីម៉ែត្រ ព្រមទាំងត្រូវកំណត់តម្លៃបន្ថែមសម្រាប់អ្នកដែលប្រើប្រាស់ថង់ប្លាស្ទិកនានា។
រដ្ឋមន្ត្រីក្រសួងបរិស្ថានលោក សាយ សំអាល់ បដិសេធមិនធ្វើអត្ថាធិប្បាយ ខណៈដែលលោក នេត្រ ភក្រ្តា អ្នកនាំពាក្យក្រសួងមួយនេះ ចុចបិទទូរស័ព្ទរបស់ VOA ជាច្រើនដង។
ប្លាស្ទិកត្រូវបានគេដឹងថាជាសារធាតុដែលមិនងាយរលាយ និងអាចបញ្ចេញសារធាតុគីមីដែលមានគ្រោះថ្នាក់ទៅក្នុងបរិស្ថាន និងសុខភាពមនុស្ស។ កម្ពុជាកំពុងប្រឈមនឹងការបំពុលបរិស្ថានដោយសារតែការប្រើប្រាស់ថង់ប្លាស្ទិកច្រើន ហើយសេវាកម្មនៃការគ្រប់គ្រងកាកសំណល់មិនបានល្អ។
ក្រុមយុវជនកំពុងប្រមូលសំរាមនៅលូទឹកស្អុយបឹងត្របែក នាយប់ថ្ងៃទី២១ ខែមីនា ឆ្នាំ២០១៩។ ក្រុមយុវជនបានបញ្ជាក់ថា ពួកគេបានបង្កើតធុងសំរាមទាំងនេះសម្រាប់បេសកកម្មសម្អាតសំរាមនៅតំបន់លូទឹកស្អុយមួយនេះ។ (កាន់ វិច្ឆិកា/VOA)
ដបប្លាស្ទិកនិងវត្ថុធ្វើពីជ័រកៅស៊ូដែលមានសារធាតុគីមី ត្រូវបានគេទទួលស្គាល់ថាបង្កឱ្យមានជំងឺមហារីក។ ការបំពុលដោយប្លាស្ទិកគឺជាការរួមចំណែកចម្បងចំពោះការធ្វើឲ្យមានបម្រែបម្រួលអាកាសធាតុនៅកម្ពុជា។
ការស្ទង់មតិមួយកាលពីចុងឆ្នាំ ២០១៥ ស្ដីអំពីការប្រើប្រាស់ថង់ប្លាស្ទិកនៅកម្ពុជា ដោយអង្គការ ACRA ដែលធ្វើការប្រឆាំងនឹងភាពក្រីក្រ បង្ហាញថា ប្រជាជនកម្ពុជាម្នាក់ជាមធ្យមប្រើប្រាស់ថង់ប្លាស្ទិកចំនួន ២០០ថង់ក្នុងមួយខែនិងជាង ២០០០ថង់ក្នុងមួយឆ្នាំ។
ការស្ទង់មតិនោះបញ្ជាក់ថា ថង់ប្លាស្ទិកមួយគីឡូមានតម្លៃជាមធ្យម ៨០០០រៀល និងថា ជារៀងរាល់ឆ្នាំ រដ្ឋាភិបាលកម្ពុជាបានខាតបង់ថវិកាអស់រាប់រយលានដុល្លារពីកាកសំណល់ថង់ប្លាស្ទិកនេះ។
បើទោះបីជាប្លាស្ទិក កំពុងអណ្ដែតជាមួយក្លិនស្អុយឆួលពីលូបឹងត្របែកក្ដី ក៏លោកសាន ដារ៉ាវីត ដែលជាអ្នកដឹកនាំការរើសសំរាមនោះ នៅតែបន្តដោយរំពឹងថាប្រជាពលរដ្ឋនឹងអាចផ្លាស់ប្ដូរការចោលសំរាមរបស់ពួកគេ តាមរយៈសកម្មភាពរបស់យុវជនសំរាម។
សាន ដារ៉ាវីត និយាយថា៖
«យើងអត់អាចបន្ទោសនរណាគេថាចោល ឬរើស ឬក៏យ៉ាងម៉េចទេ ប៉ុន្តែបើសិនជាអ្នករើសច្រើនជាងអ្នកចោល សំរាមលែងមានហើយ»។
ទោះជាថង់ប្លាស្ទិកនិងសំរាមនានានៅតែមានវត្តមានអណ្ដែតតាមទឹកលូបឹងត្របែកជាច្រើនជារៀងរាល់ថ្ងៃ ក៏យុវជនមួយក្រុមនេះនៅតែបង្ហាញសុឆន្ទៈមោះមុត ក្នុងការសម្អាតសំរាមទាំងនោះបន្តទៅទៀត៕