អ្នកវិទ្យាសាស្រ្តនៃរដ្ឋាភិបាលអាមេរិកបានចេញរបាយការណ៍កាលពីថ្ងៃពុធថា ឆ្នាំមុនគឺជាឆ្នាំដែលក្តៅជាងគេបំផុតក្នុងប្រវត្តិសាស្រ្ត។
ទាំងទីភ្នាក់ងារធាតុអាកាសនិងលំហអាកាសរបស់អាមេរិកបានឲ្យដឹងថា សីតុណ្ហភាពកាលពីឆ្នាំ២០១៥ គឺជាកម្រិតមួយដែលខ្ពស់បំផុតក្នុងរយៈពេល១៣៦ឆ្នាំចាប់តាំងពីឆ្នាំ១៨៨០មក ដែលនេះបណ្តាលមកពីបរិយាកាសបន្តផ្ទុកទៅដោយឧស្ម័នផ្ទះកញ្ចក់ដូចជា ឧស្ម័នកាបូនិចនិងមេតានដែលស្រូបយកកម្តៅ។
រដ្ឋបាលផ្នែកមហាសមុទ្រនិងបរិយាកាសជាតិបានឲ្យដឹងថា សីតុណ្ហភាពមធ្យមកាលពីឆ្នាំ២០១៥ គឺ ១៤,៧៩អង្សារសេ គឺមានកម្រិត០,៩អង្សារសេខ្ពស់ជាងសីតុណ្ហភាពមធ្យមក្នុងសតវត្សរ៍ទី២០ និង០,១៦អង្សារសេខ្ពស់ជាងសីតុណ្ហភាពឆ្នាំ២០១៤ដែលខ្ពស់បំផុត។
រដ្ឋបាលផ្នែកអាកាសចរនិងលំហអាកាសជាតិ ដែលបានវាស់ស្ទង់សីតុណ្ហភាពខុសគ្នា ក៏បានឲ្យដឹងថា ឆ្នាំ២០១៥មានសីតុណ្ហភាពខ្ពស់បំផុត ថ្វីដ្បិតតែសីតុណ្ហភាពដែលបានវាស់មានកម្រិតទាបជាងទីភ្នាក់ងារធាតុអាកាសក៏ដោយ។
វាគឺជាលើកទី៤ហើយក្នុងរយៈពេល១១ឆ្នាំ ដែលសីតុណ្ហភាពខ្ពស់បំផុតត្រូវបានកំណត់។
ក្រុមអ្នករក្សាឯកសាររបស់រដ្ឋាភិបាលបាននិយាយថា សីតុណ្ហភាពទាំងនៅលើម៉ាសដីនិងសមុទ្រគឺជាអត្រាមួយដែលខ្ពស់ជាងគេបំផុតដែលមិនធ្លាប់មានពីមុន មក ហើយខ្ពស់ខ្លាំងជាងសីតុណ្ហភាពមធ្យមនៅសតវត្សរ៍ទី២០ថែមទៀតផង៕