ប្រតិកម្មចម្រុះដូចជាភាពរន្ធត់ សោកសៅ និងការសើចចំអកនៅតែបន្តឮ ពីជុំវិញពិភពលោកទាក់ទងនឹងការសម្រុកចូលវិមានសភាសហរដ្ឋអាមេរិក កាលពីថ្ងៃពុធ ដោយអ្នកគាំទ្រលោកប្រធានាធិបតី Donald Trump ចំពោះបរាជ័យរបស់លោកនៅក្នុងការបោះឆ្នោតប្រធានាធិបតីកាលពីខែវិច្ឆិកា។
ប្រធានាធិបតីបារាំងលោក Emmanuel Macron បាននិយាយនៅក្នុងសារជាវីដេអូមួយ នៅលើTwitter កាលពីល្ងាចថ្ងៃពុធថា៖ «អ្វីដែលបានកើតឡើងនៅថ្ងៃនេះនៅរដ្ឋធានីវ៉ាស៊ីនតោន មិនមែនសហរដ្ឋអាមេរិកទេ។យើងជឿជាក់លើកម្លាំងប្រជាធិបតេយ្យរបស់យើង។យើងជឿជាក់លើកម្លាំងប្រជាធិបតេយ្យរបស់សហរដ្ឋអាមេរិក»។
We believe in democracy.#WeAreOne pic.twitter.com/dj3hs66KKn
— Emmanuel Macron (@EmmanuelMacron) January 7, 2021
នៅក្នុងសេចក្តីថ្លែងការណ៍ចេញនៅលើគណនី Twitter របស់នាយករដ្ឋមន្រ្តីឥណ្ឌា លោកNarendra Modi បាននិយាយថា លោកមាន «ការព្រួយបារម្ភ» ដែលបានឃើញ «កុបកម្មនិងអំពើហិង្សា» នៅក្នុងរដ្ឋធានីវ៉ាស៊ីនតោន។ ការផ្ទេរអំណាចដោយមានសណ្តាប់ធ្នាប់និងដោយសន្តិភាពត្រូវតែបន្ដ។ ដំណើរការប្រជាធិបតេយ្យមិនអាចត្រូវបានអនុញ្ញាតឱ្យបង្វែរ តាមរយៈការតវ៉ាខុសច្បាប់ទេ»។
Distressed to see news about rioting and violence in Washington DC. Orderly and peaceful transfer of power must continue. The democratic process cannot be allowed to be subverted through unlawful protests.
— Narendra Modi (@narendramodi) January 7, 2021
នៅក្នុងសេចក្តីថ្លែងការណ៍មួយដែលបានចេញផ្សាយកាលពីថ្ងៃព្រហស្បតិ៍ ក្រសួងការបរទេសតៃវ៉ាន់បានសម្តែងការសោកស្តាយចំពោះអំពើហិង្សានេះ។ ក្រសួងបានឲ្យដឹងថា ខ្លួនបានបញ្ជូនសេចក្តីជូនដំណឹងបន្ទាន់មួយទៅកាន់ពលរដ្ឋតៃវ៉ាន់ ដើម្បីបង្កើនការប្រុងប្រយ័ត្ននិងយកចិត្តទុកដាក់ចំពោះសុវត្ថិភាព ទាក់ទងនឹងបម្រាមគោចររបស់មន្ត្រីក្នុងរដ្ឋធានីវ៉ាស៊ីនតោន។
អ្នកនាំពាក្យក្រសួងការបរទេសប៉ាគីស្ថានលោក Zahid Hafeez Choudhri បានប្រាប់ក្រុមអ្នកយកព័ត៌មាន កាលពីថ្ងៃព្រហស្បតិ៍ថា រដ្ឋាភិបាលកំពុងតែតាមដានយ៉ាងដិតដល់នូវការវិវត្តនៅក្នុងរដ្ឋធានីវ៉ាស៊ីនតោន។
លោក Choudhri មានប្រសាសន៍ថា៖ «យើងសង្ឃឹមថា ស្ថានភាពនេះនឹងធម្មតាឡើងវិញ ហើយមិនប៉ះពាល់ដល់ដំណើរការផ្ទេរអំណាចទេ»។
លោក Raoof Hasan ជំនួយការពិសេសរបស់នាយករដ្ឋមន្រ្តីប៉ាគីស្ថានលោក Imran Khan បានប្រាប់វីអូអេអំពីរូបភាពរបស់ក្រុមជ្រុលនិយម ដែលគាំទ្រលោក Trump ដែលបានសម្រុកចូលទៅក្នុងសម័យប្រជុំសភានិងព្រឹទ្ធសភា ខណៈអ្នកតាក់តែងច្បាប់កំពុងបញ្ជាក់អំពីជ័យជម្នះនៃសំឡេងប្រតិភូរបស់ប្រធានាធិបតីជាប់ឆ្នោតលោក Joe Biden បញ្ជាក់ថា សហរដ្ឋអាមេរិកបញ្ជាភាពស្របច្បាប់តាមក្រមសីលធម៌ខ្លះតាមគោលការណ៍ប្រជាធិបតេយ្យ ដែលទទួលបាននៅក្នុងប្រទេសដទៃទៀត។
លោក Hasan បាននិយាយនៅលើបណ្តាញសង្គម Twitter ថា៖ «ប្រសិនបើសហរដ្ឋអាមេរិកបានឃើញអ្វីដែលសហរដ្ឋអាមេរិកកំពុងធ្វើនៅសហរដ្ឋអាមេរិក សហរដ្ឋអាមេរិកនឹងលុកលុយសហរដ្ឋអាមេរិក ដើម្បីរំដោះសហរដ្ឋអាមេរិកពីភាពវឹកវររបស់សហរដ្ឋអាមេរិក»៕