ពីការផ្សាយតាមទូរទស្សន៍រូបច្បាស់ high-definition ទៅដល់ក្រាហ្វិកថ្មីនៅលើកញ្ចក់ទូរទស្សន៍រហូតដល់វីដេអូប្លក់។ល។ បណ្តាញផ្សាយព័ត៌មានរដ្ឋនៃប្រទេសកូរ៉េខាងជើងបានធ្វើការកែលម្អថ្មី។ ក៏ប៉ុន្តែការផ្លាស់ប្តូរទាំងនេះមិនអាចកែប្រែការយល់ឃើញថា ប្រទេសកូរ៉េខាងជើងជាប្រទេសមួយក្នុងបណ្តាប្រទេសមានការត្រួតពិនិត្យការផ្សព្វផ្សាយតឹងរ៉ឹង និងឯកោជាងគេបំផុតក្នុងពិភពលោកនោះទេ។
នៅពេលលោកអ្នកគិតអំពីទូរទស្សន៍រដ្ឋនៃប្រទេសកូរ៉េខាងជើង នេះជាអ្វីដែលអ្នករំពឹងទុកក្នុងចិត្ត។
អ្នកអានព័ត៌មានម្នាក់ស្លៀកពាក់សម្លៀកបំពាក់ប្រពៃណីកូរ៉េច្រៀងសរសើរមេដឹកនាំជាទីស្រឡាញ់។
ក៏ប៉ុន្តែនៅពេលបច្ចុប្បន្ននេះ បណ្តាញផ្សាយព័ត៌មានរដ្ឋនៃប្រទេសកូរ៉េខាងជើងមានការផ្សាយដូចតទៅ៖
«ទិវាសួស្តីអស់លោកអ្នក និងមិត្តគ្រប់គ្នា។ អស់លោកអ្នកសុខសប្បាយឬទេនៅពេលបច្ចុប្បន្ននេះ»។
ស្ត្រីអ្នកនិយាយតាមទូរទស្សន៍នេះឈ្មោះ Un-A ដែលហៅខ្លួនឯងថា ជានារីកូរ៉េខាងជើង«ធម្មតា» ម្នាក់។
ក្នុងពេល៦ខែមុននេះ នាងបានបង្ហាញខ្លួនក្នុងវីដេអូប្លក់ ដោយនិយាយជាភាសាអង់គ្លេសនៅពេលនាងធ្វើដំណើរក្នុងក្រុងព្យុងយ៉ាង។
«សួស្តីលោកអ្នកនាងជាទីមេត្រី ខ្ញុំ Un-A ពីក្រុងព្យុងយ៉ាង។នៅថ្ងៃនេះ ខ្ញុំសួមជូនបច្ចុប្បន្នភាពអំពីសាធារណរដ្ឋប្រជាធិបតេយ្យប្រជាមានិតកូរ៉េ»។
វីដេអូទាំងនេះមានការចូលមើល១លាន៦សែនតាម YouTube។
លោក Collin Zwirko នៃ NK News មានមូលដ្ឋានក្នុងក្រុងសេអ៊ូលនិយាយថា វីដេអូទាំងនេះក៏បានត្រូវផ្សាយតាមគណនី ធ្វីតធើមានឈ្មោះថា «Coldnoodlefan...» ដែលមានចំណងទាក់ទងជាមួយរដ្ឋាភិបាលកូរ៉េខាងជើងដែរ។ លោក Zwirko និយាយថា៖
«នេះជាឧបាយកលមួយ។ មិនមែនមានតែមនុស្សម្នាក់នៅក្នុងក្រុងព្យុងយ៉ាងរាយការណ៍អំពីអ្វីដែលគេស្រឡាញ់ប្រទេសនេះទេ»។
លោក Collin Zwirko និង NK News បានតាមមើលគណនី «Coldnoodlefan» ច្រើនឆ្នាំមកហើយ។ ហើយលោកនិយាយថាលក្ខណៈរបស់ទូរទស្សន៍នេះបានផ្លាស់ប្តូរច្រើន។ លោក Collin Zwirko និយាយថា៖
«កាលពីចុងឆ្នាំ២០១៧ និងដើមឆ្នាំ២០១៨ ពួកគេបានសរសេរថា ពួកគេជាមនុស្សក្រីក្ររស់នៅក្នុងប្រទេសជប៉ុន។ ហើយបន្ទាប់មកពួកគេក្លាយទៅជាជនជាតិរុស្ស៊ីម្នាក់ឈ្មោះ Yulia។ នៅពេលនេះពួកគេតំណាងលក្ខណៈនៃស្ត្រីតាមកាមេរ៉ានៅក្នុងរដ្ឋធានីនៃប្រទេសកូរ៉េខាងជើង»។
វីដេអូមានរូបនាង Un-A បានត្រូវថតសម្រាប់ពួកអ្នកមើលជាជនបរទេសដោយមានគោលដៅកែលម្អមុខមាត់ប្រទេសកូរ៉េខាងជើងនៅលើឆាកអន្តរជាតិ។
ក៏ប៉ុន្តែការផ្សាយក្នុងប្រទេសក៏បានត្រូវកែលម្អដែរ។
កាលពីប៉ុន្មានឆ្នាំថ្មីៗនេះ ទូរទស្សន៍រដ្ឋនៃប្រទេសកូរ៉េខាងជើងប្រើប្រព័ន្ធរូបភាពច្បាស់ high-definition។ អ្នកនិយាយតាមទូរទស្សន៍នេះក៏មានវ័យក្មេងជាងអ្នកមុនៗ បន្ទប់ផ្សាយក៏ទំនើបជាងមុនហើយរឿងថ្មីៗរបស់ពួកគេក៏ប្រើបច្ចេកទេសទំនើបជាងមុនដែលមានប្រើនៅក្នុងការផ្សាយទូរទស្សន៍បរទេស ដោយមានរួមបញ្ចូលបន្ថែមពីលើនិងទិដ្ឋភាពរួម។ ទូរទស្សន៍នេះក៏បានសាកល្បងប្រើក្រាហ្វិកព័ត៌មានជារូបភាព 3D សាំញ៉ាំផងដែរ។
ការផ្លាស់ប្តូរទាំងនេះហាក់ដូចជាការទទួលស្គាល់ថា បណ្តាញផ្សាយព័ត៌មានកូរ៉េខាងជើងប្រឈមនឹងការប្រជែងរបស់បណ្តាញព័ត៌មានទំនើបក្នុងប្រទេសកូរ៉េខាងត្បូង និងកន្លែងឯទៀតៗ។ ការផ្សាយទំនើបបែបនេះជាច្រើនត្រូវបានលួចនាំចូលឆ្លងកាត់ព្រំដែនផងដែរ។
លោក Martyn Williams ជាអ្នកស្រាវជ្រាវដែលតាមពិនិត្យមើលបណ្តាញផ្សាយព័ត៌មានរដ្ឋរបស់កូរ៉េខាងជើង។ លោកបាននិយាយថា៖
«បើលោកអ្នកមើលរឿងភាគតាមទូរទស្សន៍កូរ៉េខាងត្បូង ផលិតកម្មមានគុណភាពល្អជាងទូរទស្សន៍រដ្ឋកូរ៉េខាងជើង។ ដូច្នេះពួកអ្នកមើលទូរទស្សន៍ចាប់ផ្តើមរំពឹងចង់មើលកម្មវិធីទូរទស្សន៍ល្អជាងមុន។ នេះជាការប្រជែង។ ហើយពួកកូរ៉េខាងជើងត្រូវការឱ្យមានអ្នកមើលទូរទស្សន៍ខ្លួនច្រើនជាងមុន...»។
លោក Martyn Williams និយាយថា នៅពេលដែលការផ្សាយទូរទស្សន៍នេះមានការចូលចិត្តជាងមុនក៏ដោយ តែគេមិនដឹងទេថា តើវាមានប្រសិទ្ធភាពជាងមុនឬយ៉ាងណាទេ -- មួយផ្នែក ពីព្រោះការផ្លាស់ប្តូរទាំងនេះគ្រាន់តែជាធ្វើឱ្យល្អមើលពីក្រៅប៉ុណ្ណោះ។ លោក Williams ថ្លែងថា៖
«អ្វីដែលគ្មានការផ្លាស់ប្តូរគឺកម្មវិធីផ្សាយនៃទូរទស្សន៍នេះ។ វាជាកម្មវិធីនាំឱ្យធុញទ្រាន់ដដែលៗ។ វាជារបាយការណ៍អំពីអ្វីៗដែលលោក Kim Jong Un ធ្វើ។ នៅពេលណាលោកមិនបានធ្វើអ្វីទេ ទូរទស្សន៍នេះផ្សាយអំពីកន្លែងដែលលោកបានទៅមើលកាលពីមួយឆ្នាំ ពីរឆ្នាំ ឬបីឆ្នាំមុននេះ»។
វីដេអូប្លក់របស់អ្នកស្រី Un-A ក៏មានការទ្រគោះដែរ។
«សួស្តី»
នៅក្នុងវីដេអូនេះ Un-A ទៅរត់យឺតៗ។ នេះជាឱកាសមួយដើម្បីបង្ហាញផ្នែកខ្លះនៃក្រុងនេះដែលមានធនធានច្រើនជាងប៉ែកឯទៀតៗរបស់ប្រទេសនេះ។
«ថ្ងៃនេះខ្ញុំនឹងបង្ហាញលោកអ្នកអំពីអ្វីដែលប្រជាជនកូរ៉េធ្វើនៅពេលទំនេរ»។
ក៏ប៉ុន្តែនៅពេលកាមេរ៉ា ថតទិដ្ឋភាពក្រុងនេះ ផ្នែកដែលបង្ហាញសង្កាត់ជាច្រើនក្នុងក្រុងនេះមិនច្បាស់ទេ -- ដែលហាក់ដូចជាការត្រួតពិនិត្យដែល Un-A មិនបានពន្យល់ទេ។
នេះជាការរំឭកថា ទោះណាជាកូរ៉េខាងជើងខិតខំកែលម្អមុខមាត់ខ្លួនក៏ដោយក៏ការផ្លាស់ប្តូរពិតប្រាកដហាក់ដូចជានៅឆ្ងាយឯជើងមេឃឯណោះ៕
ប្រែសម្រួលដោយលោកឈឹម សុមេធ