ប្រធានាធិបតីសហរដ្ឋអាមេរិកលោក Joe Biden បានបើកកិច្ចប្រជុំកំពូលជាមួយមេដឹកនាំបណ្តាប្រទេសអាស៊ីអាគ្នេយ៍ ដោយសន្យាថា នឹងចំណាយទឹកប្រាក់ ១៥០ លានដុល្លារ លើវិស័យហេដ្ឋារចនាសម្ព័ន្ធ សន្តិសុខ ការត្រៀមទប់ទល់នឹងជំងឺរាតត្បាត និងកិច្ចប្រឹងប្រែងផ្សេងៗទៀត ក្នុងគោលបំណងទប់ទល់នឹងឥទ្ធិពលរបស់ចិន ដែលជាដៃគូប្រជែងរបស់អាមេរិក។
កាលពីថ្ងៃព្រហស្បតិ៍ លោក Biden បានបើកកិច្ចប្រជុំកំពូលរយៈពេលពីរថ្ងៃជាមួយតំណាងប្រទេសទាំង ១០ របស់សមាគមប្រជាជាតិអាស៊ីអាគ្នេយ៍ហៅកាត់ថា អាស៊ាន នៅរដ្ឋធានីវ៉ាស៊ីនតោន ដោយបានទទួលទានអាហារពេលល្ងាចជាមួយគ្នា នៅសេតវិមាន មុននឹងជួបពិភាក្សាគ្នានៅក្រសួងការបរទេសនៅថ្ងៃសុក្រនេះ។
លោក Biden ញញឹមប្រឹមប្រិយ នៅពេលលោកបានថតរូបជាមួយក្រុមមេដឹកនាំអាស៊ាននៅសួនច្បារខាងត្បូងសេតវិមាន មុននឹងទទួលទានអាហារពេលល្ងាចរួមគ្នាជាមួយតំណាងប្រទេសព្រុយណេ ឥណ្ឌូណេស៊ី កម្ពុជា សិង្ហបុរី ថៃ ឡាវ វៀតណាម ម៉ាឡេស៊ី និងហ្វីលីពីន។
ស្របពេលដែលការឈ្លានពានរបស់រុស្ស៊ីលើអ៊ុយក្រែនក៏ស្ថិតនៅក្នុងរបៀបវារៈ រដ្ឋបាលលោក Biden សង្ឃឹមថា កិច្ចប្រឹងប្រែងនានា នឹងបង្ហាញបណ្តាប្រទេសអាស៊ានថា រដ្ឋាភិបាលអាមេរិកនៅតែបន្តយកចិត្តទុកដាក់លើតំបន់ឥណ្ឌូប៉ាស៊ីហ្វិក និងកត្តាប្រឈមរយៈពេលវែងពីចិន ដែលអាមេរិកចាត់ទុកថាជាដៃគូប្រជែងចម្បងរបស់ខ្លួន។
ឆ្លើយតបនឹងការសន្យារបស់លោក Biden ជាទឹកប្រាក់ចំពោះអាស៊ាន ក្រសួងការបរទេសចិន ថ្លែងថា ចិនស្វាគមន៍រាល់កិច្ចសហប្រតិបត្តិការដែលលើកកម្ពស់ការអភិវឌ្ឍប្រកបដោយចិរភាព និងភាពរីកចម្រើនទៅមុខនៅក្នុងតំបន់។
លោក Zhao Lijian អ្នកនាំពាក្យក្រសួងការបរទេសចិន បានថ្លែងប្រាប់អ្នកសារព័ត៌មាននៅទីក្រុងប៉េកាំង កាលពីថ្ងៃសុក្រថា៖ «ចិននិងអាស៊ាន មិនទាក់ទងគ្នាបែបឈ្នះចាញ់ទេ ហើយក៏មិនជំរុញឱ្យមានភាពតតាំងដាក់គ្នារវាងប្លុក(តំបន់)ដែរ»។
គ្រាន់តែក្នុងខែវិច្ឆិកា ឆ្នាំមុន ចិនបានសន្យាផ្តល់ទឹកប្រាក់ ១.៥០០លានដុល្លារជាជំនួយអភិវឌ្ឍដល់បណ្តាប្រទេសអាស៊ាន ក្នុងរយៈពេលបីឆ្នាំ ដើម្បីប្រយុទ្ធប្រឆាំងនឹងជំងឺកូវីដ១៩ ហើយស្តារសេដ្ឋកិច្ចឡើងវិញ។
មន្ត្រីអាមេរិកជាន់ខ្ពស់មួយរូបរបស់រដ្ឋបាលលោក Biden បានប្រាប់អ្នកសារព័ត៌មានថា៖ «យើងត្រូវតែបង្កើនសកម្មភាពរបស់យើងនៅក្នុងតំបន់អាស៊ីអាគ្នេយ៍។ យើងមិនគួរធ្វើឱ្យប្រទេសទាំងនេះត្រូវជ្រើសរើសរវាងសហរដ្ឋអាមេរិកនិងចិននោះទេ។ យ៉ាងណាក្តី យើងចង់បញ្ជាក់ឱ្យច្បាស់ថា សហរដ្ឋអាមេរិកចង់បានទំនាក់ទំនងដ៏រឹងមាំជាងមុន»។
ការប្តេជ្ញាចិត្តដោយផ្តល់ជាទឹកប្រាក់ថ្មីមួយនេះរបស់សហរដ្ឋអាមេរិក រួមមានការបណ្តាក់ទុនជាទឹកប្រាក់ ៤០ លានដុល្លារ ក្នុងវិស័យហេដ្ឋារចនាសម្ព័ន្ធ ដោយផ្តោតលើការជួយកាត់បន្ថយឧស្ម័នកាបូននៅក្នុងប្រព័ន្ធផ្គត់ផ្គង់ថាមពលរបស់តំបន់អាស៊ីអាគ្នេយ៍ ទឹកប្រាក់ ៦០ លានដុល្លារ ក្នុងវិស័យសន្តិសុខដែនសមុទ្រ និងជាង ១៥ លានដុល្លារទៀត ក្នុងការឧបត្ថម្ភដល់វិស័យសុខាភិបាលនិងជំនួយសម្រាប់ស្រាវជ្រាវរកឃើញឱ្យបានឆាប់នូវជំងឺកូវីដ១៩ និងជំងឺរាតត្បាតប្រព័ន្ធដកដង្ហើមផ្សេងៗទៀត។ នេះបើតាមការបញ្ជាក់របស់មន្ត្រីអាមេរិកមួយរូប។ ថវិកាបន្ថែមនឹងជួយដល់បណ្តាប្រទេសទាំងនេះ បង្កើតច្បាប់ស្តីពីសេដ្ឋកិច្ចឌីជីថល និងច្បាប់ស្តីពីបញ្ញាសប្បនិម្មិត (AI)។
ឆ្មាំសមុទ្រអាមេរិកក៏នឹងបញ្ជូននាវាមួយគ្រឿងទៅកាន់តំបន់នេះ ដើម្បីជួយនាវានេសាទក្នុងតំបន់ទប់ទល់នឹងអ្វីដែលរដ្ឋាភិបាលអាមេរិកនិងបណ្តាប្រទេសមួយចំនួនក្នុងតំបន់ បានចាត់ទុកថាជាសកម្មភាពនេសាទខុសច្បាប់របស់ចិន។
ក៏ប៉ុន្តែ ការប្តេជ្ញារបស់អាមេរិកទាំងនេះ ហាក់មិនអាចប្រៀបនឹងចំណងដ៏ជិតស្និទ្ធនិងឥទ្ធិពលរបស់ចិនបានឡើយ។
លោក Biden កំពុងបង្កើតគម្រោងផ្តួចផ្តើមបន្ថែមទៀត រួមមាន ការបណ្តាក់ទុនហេដ្ឋារចនាសម្ព័ន្ធ «កសាងពិភពលោកជាថ្មីឱ្យប្រសើរ» (Build Back Better World) និងក្រមខណ្ឌសេដ្ឋកិច្ចឥណ្ឌូប៉ាស៊ីហ្វិក (IPEF)។ ប៉ុន្តែមកទល់ពេលនេះ គម្រោងទាំងនេះមិនទាន់រៀបរៀងឡើងឱ្យស្រេចបាច់នោះទេ។
កិច្ចប្រជុំកំពូលពិសេសអាមេរិក-អាស៊ាននេះ កត់សម្គាល់នូវការជួបជុំគ្នាជាក្រុមលើកដំបូងរបស់មេដឹកនាំអាស៊ាន នៅសេតវិមាន និងជាកិច្ចប្រជុំលើកដំបូងដែលត្រូវបានរៀបចំឡើងដោយប្រធានាធិបតីសហរដ្ឋអាមេរិក បើគិតចាប់តាំងពីឆ្នាំ ២០១៦ មក៕