ប្រធានាធិបតីសហរដ្ឋអាមេរិកលោក Joe Biden និងលោកស្រី Jill Biden ដែលជាភរិយាបានស្វាគមន៍អតីតប្រធានាធិបតីសហរដ្ឋអាមេរិកលោក Barack Obama និងលោកស្រី Michelle Obama ដែលជាភរិយានៅឯសេតវិមានកាលពីថ្ងៃពុធ សម្រាប់ការដាក់បង្ហាញនូវរូបថតផ្លូវការរបស់លោកទាំងពីរដែលគូរដោយសិល្បករពីររូបគឺលោក Robert McCurdy និងអ្នកស្រី Sharon Sprung។
នៅក្នុងពិធីដាក់បង្ហាញរូបថតនេះ លោក Biden បានថ្លែងអំពីទំនាក់ទំនងជិតស្និទ្ធដែលលោកមានជាមួយនឹងលោក Obama។
លោក Biden បាននិយាយដូច្នេះថា៖ «សម្រាប់រយៈពេល ៨ ឆ្នាំ យើងបានក្លាយជាគ្រួសារមួយដោយឆ្លងកាត់ទាំងពេលរីករាយនិងពេលលំបាក។ គ្រួសារដែលមានប្រវត្តិផ្សេងគ្នាបានមកជួបគ្នាដោយសារគុណតម្លៃរួមនិងរឿងរ៉ាវផ្សេងទៀតដែលគ្រួសារទាំងពីរបានធ្វើរួមគ្នា។ ខ្ញុំគិតថាប្រហែលជាមានទំនាក់ទំនងផ្សេងទៀតដូចនេះរវាងប្រធានាធិបតីនិងអនុប្រធានាធិបតី ប៉ុន្តែខ្ញុំមិនទាន់គិតឃើញនៅឡើយទេនៅពេលនេះ»។
លោក Biden បាននិយាយទៅកាន់លោក Obama ថា៖ «លោកប្រធានាធិបតី! នេះជាមូលហេតុដែលសហរដ្ឋអាមេរិកជ្រើសរើសលោកឱ្យធ្វើជាប្រធានាធិបតីពីរដង។ នេះជាមូលហេតុដែលលោកនឹងត្រូវបានគេចាត់ទុកថា ជាប្រធានាធិបតីមួយរូបក្នុងចំណោមប្រធានាធិបតីដ៏សំខាន់បំផុតនៅក្នុងប្រវត្តិសាស្ត្ររបស់សហរដ្ឋអាមេរិក រួមជាមួយនឹង [ភរិយារបស់លោក] ដែលនឹងត្រូវបានគេចាត់ទុកថាភរិយាប្រធានាធិបតីដ៏សំខាន់បំផុតមួយរូបផងដែរ»។
លោក Obama បានឆ្លើយតបទៅនឹងលោក Biden វិញថា៖ «ដោយសារតែភាពគួរសមរបស់លោក ដោយសារតែភាពម៉ឺងម៉ាត់របស់លោក និងជាពិសេសដោយសារតែភក្ដីភាពរបស់លោកចំពោះលទ្ធិប្រជាធិបតេយ្យរបស់យើងនិងពលរដ្ឋអាមេរិកាំង សហរដ្ឋអាមេរិកមានភាពប្រសើរជាងមុននៅពេលដែលលោកបានចូលកាន់តំណែង [ជាប្រធានាធិបតី]»។
លោក Obama បានបន្ថែមថា៖ «លោក Biden! ឥឡូវនេះវាគឺជាវាសនាល្អរបស់សហរដ្ឋអាមេរិកដែលមានលោកជាប្រធានាធិបតី»។
ទស្សនកិច្ចនៅសេតវិមានលើកនេះរបស់លោក Obama គឺជាទស្សនកិច្ចលើកទី ២ តាំងពីពេលដែលលោកបានបញ្ចប់អាណត្តិជាប្រធានាធិបតីមក។ ទស្សនកិច្ចលើកទីមួយរបស់លោកគឺបានធ្វើឡើងកាលពីខែមេសាដើម្បីប្រារព្ធខួបទី ១២ នៃការអនុម័តច្បាប់ធានារ៉ាប់រងសុខភាព Affordable Care Act ដែលគេស្គាល់ថាច្បាប់ Obamacare ដែលលោកបានចុះហត្ថលេខាកាលពីឆ្នាំ ២០១០៕