នៅថ្ងៃពុធនេះ លោកនាយករដ្ឋមន្ត្រី ហ៊ុន សែន បានប្រាប់ឲ្យមន្ត្រីសុខាភិបាល និងស្ថាប័នពាក់ព័ន្ធដាក់អាទិភាពលើការសិក្សារកវិធានការនានាដើម្បីទប់ទល់ការរីករាលដាលជំងឺកូវីដ១៩ ករណីដែលជំងឺនេះឆ្លងមកដល់ប្រទេសកម្ពុជា។
លោក ហ៊ុន សែន ថ្លែងនៅក្នុងការបិទសន្និបាតសុខាភិបាលលើកទី៤១ថា៖
«ប៉ុន្តែក្នុងករណីកូវីដ[១៩] ចាប់ផ្តើមចូលមកដល់ក្នុងប្រទេសយើង ហើយមានល្បឿនលឿន និងមានទ្រង់ទ្រាយធំ វិធានការដែលត្រូវប្រកាន់យក គឺជាអ្វី អ្វីខ្លះ? [...] ឧទាហរណ៍ យើងលើកទាក់ទិនថា ចាប់ផ្តើមមានកូវីដ[១៩] ដំបូងថាយើង នៅខេត្តមួយ បន្ទាប់ទៅរាលដល់ខេត្តមួយ បន្ទាប់ ទៅរាលដល់ខេត្តមួយទៀត តើវិធានការអ្វីខ្លះដែលត្រូវប្រកាន់យក បិទសាលារៀនឬទេ? នេះទាំងអស់នេះសុទ្ធតែជាវិធានការហើយ ប៉ុន្តែកន្លងទៅខ្ញុំមិនទាន់អោយឯកឧត្តមលោកជំទាវធ្វើកិច្ចការងារនេះ ដោយសារកាភ័យខ្លាចច្រើនហួស»។
លោកនាយករដ្ឋមន្ត្រីបានបន្ថែមថា៖
«ប៉ុន្តែសម្រាប់ប្រជាពលរដ្ឋ តើយើងត្រូវដោះស្រាយជាមួយពួកគាត់យ៉ាងម៉េច ត្រូវលើកចេញជាវិធានការជាក់លាក់មួយ ហើយប្រសិនបើវារីកធំទូលាយជាងនេះ នៅក្នុងក្របខណ្ឌនៅក្នុងឃុំនោះ ឬក្នុងស្រុកនោះ តើគួរត្រូវបិទសាលារៀនឬទេ? តើយើងត្រូវចលនាទៅដល់ព្រះសង្ឃកុំអោយមានការប្រមូលផ្តុំនៅរាល់ថ្ងៃសីលនៅតាមទីអារ៉ាមទេ? ត្រូវចលនាទៅដល់វិហារសាសានាអ៊ីស្លាមកុំអោយថ្វាយបង្គុំជុំគ្នានៅថ្ងៃសុក្រនោះទេ? តើយើងឈានទៅនិយាយទៅដល់ព្រះវិហារគ្រឹស្តកុំអោយមានការជួបជុំគ្នាដែលនាំទៅដល់ការឆ្លងនេះទេ? នេះគ្រាន់តែជាញ្ហាដាក់ចេញទេ ជាបញ្ហាដើម្បីលើកយកអោយធ្វើកាពិក្សាអំពីបញ្ហានេះអោយបានល្អិតល្អន់ ដោយគិតអំពីកត្តាវេជ្ជសាស្ត្រ និងកត្តាផ្សេងៗដែលទាក់ទងនឹងបញ្ហាហ្នឹង ជាសង្គម និងជានយោបាយ ចិត្តសាស្ត្រផងដែរ។ ត្រូវរៀបចំផែនការនេះ»។
លោក ហ៊ុន សែន ស្នើឲ្យក្រសួងសុខាភិបាលដាក់ចេញនូវវិធានការលម្អិតដើម្បីទប់ទល់ជំងឺCOVID-19 ដែលអាចនឹងកើតមាននៅកម្ពុជានៅពេលខាងមុខ។
លោកបានថ្លែងថា៖
«ប៉ុន្តែប្រសិនជា អាផ្ទុះឡើងនៅក្នុងប្រទេសរបស់យើង ត្រួតត្រាលែងបាន ប្រហែលជា អាការប្រគំតន្ត្រីក៏ត្រូវផ្អាក ការជួបជុំស្អីៗក៏ត្រូវឲ្យផ្អាកដែរ»។
លោកក៏បានដាក់ចេញនូវសំណួរប្រសិនបើមានករណីនេះកើតមានលើសមាជិកនៃគ្រួសារណាមួយនៅក្នុងប្រទេស។
លោក ហ៊ុន សែន និយាយថា៖
«ក្រៅពីជំនួយចំពោះកម្មករដែលអត់មានការងារធ្វើ តើយើងនឹងត្រូវផ្តល់ជំនួយទៅដល់ក្រុមគ្រួសារដែលមានអ្នកកើតជំងឺហ្នឹងហើយត្រូវដាក់ឲ្យគាត់ស្ថិតនៅដាច់ដោយឡែករយៈពេលថា១៤ថ្ងៃ តើយើងត្រូវជួយឧបត្ថម្ភគាត់ឬទេ? នេះជាគោលនយោបាយគាំពារសង្គមមួយទៀតដែលធ្វើក្នុងថេរវេលាមានកូវីដនេះ»។
លោក ហ៊ុន សែន ក៏បានប្រាប់ឲ្យប្រជាពលរដ្ឋអនុវត្តវិធានការនានាដើម្បីការពារពួកគេកុំឲ្យឆ្លងមេរោគផងដែរដូចជាការប្រើប្រាស់ក្រម៉ា នៅពេលក្អកឬកណ្តាស់ និងអនុវត្តការលាងដៃ ឲ្យញឹកញាប់ និងជំរាបសួរគ្នា ជាជាងចាប់ដៃក្នុងការប្រាស្រ័យទាក់ទង។
លោកបានមានប្រសាសន៍ដូច្នេះថា៖
«ចាប់ពីពេលនេះទៅ ក្នុងចំណោមប្រជាពលរដ្ឋក្នុងចំណោមមន្ត្រីរាជការរបស់យើង សូមអនុវត្ត គេហៅថាអនុវត្តវិធីប្រើវប្បធម៌ខ្មែរ គឺលើកដៃសំពះគ្នារួចហើយមិនចាំបាច់ចាប់ដៃទេ។ ជាវិធីងាយៗ ព្រោះគេថាចាប់ដៃគ្នាវាងាយឆ្លង»។
កាលពីខែមុន លោក ហ៊ុន សែន បានអះអាងថា ប្រទេសកម្ពុជាមិនមានជំងឺកូវីដ១៩ នោះទេ លុះត្រាណាតែមានថ្ងៃទី ៣១ ខែកុម្ភៈ ។
«ថ្ងៃទីមួយខែកុម្ភៈទើបមានជំងឺហ្នឹង។ អើបើអត់មានថ្ងៃទី៣១[ ខែកុម្ភៈ]អាហ្នឹងវាចប់ហើយ។វាមានស្អី»។
តាមវិធានទប់ទល់ការឆ្លងជំងឺកូវីដ១៩ កន្លងមក លោកនាយករដ្ឋមន្ត្រី ហ៊ុន សែន មានប្រសាសន៍ថា មិនតម្រូវឲ្យមានការបិទជើងហោះហើរពីប្រទេសចិនទេ បើទោះជាលោកថាមានប្រជាពលរដ្ឋស្នើសុំឲ្យគិតគូរលើវិធានការនេះ។
លោក ហ៊ុន សែន បានប្រាប់ក្រសួងពាក់ព័ន្ធផ្សេងៗទៀតឲ្យចេះសន្សំ និងកាត់បន្ថយការចាយវាយតាមក្រសួងនានាតាមលទ្ធភាពដែលអាចធ្វើបាន។
លោកបានថ្លែងថា៖ «ឥឡូវបើធ្លាប់ទិញប៊ិច១០០ ទិញតែ៥០ បានហើយ សម្រាប់យកមកប្រើប្រាស់។ ធ្លាប់ទិញសម្ភារៈអីប៉ុន្មានកាត់បន្ថយវា។ ធ្លាប់ចេញទៅក្រៅប្រទេស មិនចាំបាច់មិនទៅ។ ហើយបើចាំបាច់ណាស់ធ្លាប់ទៅ៥នាក់ ទៅតែ២នាក់ឬ ៣នាក់បានហើយ។ គឺប៉ុណ្ណឹង»។
ក្រោយចប់សន្និបាតសុខាភិបាល អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន និង លោក លី សូវ៉ាន់ បានបញ្ជាក់ប្រាប់ថា មិនទាន់រកឃើញករណីឆ្លងជំងឺកូវីដ១៩ នៅកម្ពុជាទេត្រឹមល្ងាចថ្ងៃពុធនេះ។
លោក លី សូវ៉ាន់ បានប្រាប់វីអូអេថា៖
«ម៉ោង ៦:៣៣ [ល្ងាច] នេះ យើងអត់ទាន់រកឃើញ ករណីថ្មីនៅឡើយទេ។ តែលទ្ធភាពនៃការរកឃើញនឹងអាចមានទៀត ដោយសារមានការរាតត្បាតនៅប្រទេសចិន និងប្រទេសដទៃទៀត»។
ឯអ្នកស្រី ឱ វណ្ណឌីននិយាយថា៖ «ចាំស្អែកទៅក្មួយ។ ចាំស្អែកមីងធ្វើសន្នីសីទកាសែត។ [...] ស្អែកធ្វើសន្និសីទកាសែត ក្មួយចង់សួរអីក៏សួរទៅ»។
មេរោគនេះបានឆ្លងរាលដាលដល់ជាង ៧០ប្រទេស ដែលអ្នកឆ្លងជំងឺនេះសរុបដល់ជាង ៩៣ ០០០ នាក់។ ប្រទេសកូរ៉េខាងត្បូង អ៊ីតាលី និងអ៊ីរ៉ង់មានករណីឆ្លងច្រើនជាងគេបន្ទាប់ពីប្រទេសចិន។ ធនាគារពិភពលោកបញ្ចេញថវិកាជាង ១២ ពាន់លានដុល្លារ សម្រាប់ឲ្យប្រទេសកំពុងអភិវឌ្ឍប្រើប្រាស់ក្នុងការទប់ស្កាត់ការឆ្លងរីករាលដាលនៃជំងឺកូវីដ១៩នេះ៕